Ads by Google Ads by Google

Fa’ataua le moni o le alofa i fanau ma tupulaga talavou


Nisi o fanau laiti ua tapena atu mo le Lotu a Tamaiti i lenei tausaga. [ata AF]
ausage@samoanews.com

A o sauni atu ai le Lalolagi atoa e aofia ai ma Amerika Samoa e fa’amanatu le Aso Sa Pa’epa’e mo Fanau i le fa’aiuga o le vaiaso nei, ua talosagaina ai e le afioga i le ali’i kovana ia Lolo Matalasi Moliga le atunu’u atoa, ina ia fa’ailoa e tagata uma e aofia ai ma matua le moni o le alofa i fanau ma tupulaga talavou, e ala i lo latou lagolagoina ma le agaga fiafia o le latou aso fa’apitoa mo lenei tausaga.

 

O le vaiaso nei na sainia ai e le afioga i le ali’i kovana ia Lolo se feau fa’amanuia mo fanau uma o Amerika Samoa, ina ia latou maua se aso fiafia ma fa’apitoa mo i latou.

 

I le sainia ai e Lolo o lenei feau fa’apitoa mo fanau a le atunu’u, na atagia mai ai le laina tutusa o upu o lenei feau ma le agaga o lo o fa’atinoina e ni isi o Ekalesia i totonu o le atunu’u, i lo latou fa’atauaina lea o fanau ua matua oti, fa’apea ai fanau ua maliliu ona o ma’i ma fa’alavelave na a’afia ai o latou soifua.

 

“A o tatou fa’atalitali atu i le fa’amanatuina o le Aso Sa o le Lotu a Tamaiti o lenei tausaga, ia tatou manatua ma talosia pea i loto ma agaga nai fanau ua maliliu, aemaise ai i latou ua fa’asauaina ma feagai pea i le ola mativa ma sauaga o le taua, fa’apea nai fanau ua tu’ulafoa’i e o latou aiga ma matua”, o se vaega lea o le tusi a le ali’i kovana.

 

Sa ia taua fo’i le tatau lea ona talosia atu ai pea ma nai fanau ua leai ni matua, fa’apea ai i latou ua le mafai ona lagona ma fa’amafanafanaina i le alofa.

 

“E ui i le tele o fa’afitauli ua amata ona a’afia ai le tele o tatou fanau, o lo o maua pea e le tatou atunu’ le sa’olotoga ma le filemu, o lea, ia tatou fa’afo’i ai pea le viiga ma le fa’afetai aemaise le ola auauna mo le Atua aua lona alofa ma lona agalelei i o tatou fanau ma tupulaga lalovaoa”, o se vaega lea o le feau fa’amanuia a le afioga i le ali’i kovana ia Lolo.

 

Saunoa atili le ali’i kovana e fa’apea, e tasi lava lenei aso fa’apitoa o le tausaga ua atofaina mo tamaiti uma o le lalolagi, o le mafua’aga fo’i lea e tatau ai ona fa’afouina pea le moni o le alofa mo tatou alo ma fanau, fa’apea tupulaga o le atunu’u, aemaise le foa’i atu pea o mea silisili ma mea lelei uma mo i latou.

 

I le fa’atauaina ai e le faigamalo a Lolo ma Lemanu o tupulaga talavou a le atunu’u talu ona tula’i mai le la nofoaiga i le 3 tausaga talu ai, na taua ai e le ali’i kovana e fa’apea, “O alo ma fanau a le atunu’u o tofi ma fa’amanuiaga mai le Atua, o le ala fo’i lea e tatau ai ona fa’apelepele ma faamaoni le alofa i fanau ma tupulaga, aua o i latou o loo valoia e le Tusi Paia lo latou sao mo aiga uma”.

 

“I le agaga maualalo ia te a’u ma lo’u to’alua ia Cynthia Moliga ma le aiga, fa’apea ai le afioga i le Lutena Kovana ia Lemanu Peleti Mauga ma le aiga, matou te fa’amanuia tele atu ai le Aso Sa o le Lotu a Tamaiti i alo ma fanau uma aemaise tupulaga talavou uma o Amerika Samoa”, o le saunoaga atoa lea ma le feau fa’amanuia mai le afioga i le ali’i kovana o le atunu’u.

 

Sa molimauina i totonu o le atunu’u i lenei vaiaso le pisi o Ekalesia i le tapenaina o polokalame fa’aleagaga ma tala faaletusi paia mo fanau i le latou aso fa’apitoa, ae le gata i lea, sa molimauina fo’i le pisi o le pito laau a matua i le tau tapenaina lea o fa’atau ma fuafuaga eseese mo le Aso Sa faapitoa o le fanau.

 

Na maua le avanoa o le Samoa News e asia ai ni isi o nofoaga eseese i le atunu’u o lo o pisi ai tapena mo le aso faapitoa o nai fanau, e pei o tapenaga a Ekalesia, atoa ai ma ni isi o Faleoloa o lo o pisi i le fa’atauina atu o oloa eseese e pei o laei ma ofu papa’e mo fanau i lenei vaiaso.

 

Na taua e le Ta’ita’i o le Mafutaga a Fanau mai se tasi o Ekalesia Kerisiano i Aua, le Lotu Porotesano lo latou fa’atauaina o tala mai le Tusi Paia e fa’atatau i le taua o fanau, aemaise ai o Tala e fa’atatau i le sao o fanau i le momoliina o le Talalelei ia Keriso.

 

“O le taua o polokalame ua matou sauni e fa’ataoto mo le Aso Sa faapitoa o fanau i lenei tausaga, o lo o a’oa’oina mai ai le taua o fanau i le finagalo o Iesu, aemaise ai tala e fa’atatau i le sao o fanau i le momoliina o le Talalelei a Keriso. I lo matou talitonuga, e leai lava se fanau e fa’atauva’a i le silasila a le Atua, o i latou o u fanafana i le lima o le Toa, o i latou fo’i o fa’amanuiaga i totonu o aiga”, o le saunoaga lea a le Faletua ia Catherine Tuala, o le Peresetene lea o le Mafutaga a Fanau i le Lotu Porotesano i Aua.

 

Ae na taua e le Faifeau o le Ekalesia Fa’atuatuaga o Keriso i Pago Pago, susuga Rev. Smith Potoa’e-Mauga e fa’apea, o le taua o le Aso Sa mo fanau i lenei tausaga, e le gata o se aso e fa’ataua ai la latou vaega fa’atino i totonu o le Ekalesia, ae fa’ailoa ai fo’i a latou taleni eseese ua foa’i atu i ai e le Atua.

 

“E tele naua taleni eseese o lo o maua e fanau a la matou Ekalesia, o ni isi o i latou nei e i ai taleni pese, ta piano, ae o isi fo’i o le fa’atinoina o tala, ae o le itu taua, ia fa’aaoga a latou taleni mo le Atua”, o le saunoaga lea a Rev. Potoa’e-Mauga.

 

Sa ia taua fo’i le i ai o a latou meaalofa ua mae’a ona tapena mo ni isi o fanau ua matua oti, atoa ai ma fanau e to’alua a le Ekalesia na maliliu i le tausaga lenei ona o ma’i o le tino.

 

“E le mafai ona fa’agaloina fanau ua maliliu ona o fa’alavelave po o ma’i fo’i o le tino, e pei ona taua e le afioga i le ali’i kovana i lana feau fa’amanuia, o le agaga fo’i lena o le Ekalesia, tusa lava pe ua maliliu i latou, ia tatou manatua pea ma fa’ataua i latou”, o le saunoaga lea a Rev. Potoa’e-Mauga.

 

Na taua e ni isi o Ekalesia sa mafai ona asia e le Samoa News, o a latou tala fa’atino fa’atoa fa’atinoina lea i le taimi o le Lotu afiafi, ona e tu’u le avanoa i le lotu o le taeao e fa’amuamua ai se feau filifilia mo le Aso Sa a le fanau, sosoo ai loa ma tala fa’atino i le afiafi.

 

Sa molimauina fo’i e le Samoa News ni isi o matua o lo o pisi i lenei vaiaso i fa’atauga mo le Aso Sa o fanau, ina ia mautinoa lava e saunia mea uma i tulaga o taumafa ma laei.

 

Na taua e le susuga a Tuputala Lafaitele, 56 tausaga o le soifua mai Fagatogo e fa’apea, e leai se isi mea e sili ona fiafia ai fanau i aso nei, nai lo le manaia o le ofu toe tele taumafa.

 

“Ua taoto lava nisi manaoga mo le aiga i le fa’aiuga o lenei vaiaso, ae ave le fa’amuamua i le fa’atinoina lea o manaoga o nai fanau i lo latou aso fa’apitoa, e le gata ua fa’atau lavalava fou ae ia mautinoa fo’i e lava ma totoe le itu tau taumafa”, o le saunoaga lea a Lafaitele.

 

E pei ona ripotia e le Matagaluega o Leoleo i le Aso Sa o tamaiti i le tausaga na te’a nei, e leai se fa’alavelave matuia na tula’i mai ai, po o se isi na ma’imau ai lona soifua. O le tatalo fo’i lena mo le atunu’u atoa i le Aso Sa o le Lotu a Tamaiti i lenei tausaga, ina ia maua e aiga uma le fiafia ma le agaga o le Atua, ae le o le misa ma fevaevaea’iga.