Ads by Google Ads by Google

Fa’ataua Leoleo o le Malaeva’alele le saogalemu o le atunu’u lautele


Le taimi ao fa’atonutonu e le ali’i faiaoga ia Ernie Haleck ia Leoleo o le malaeva’alele i Tafuna i le auala e fa’atino ai le u’uina o le fana atoa ai ma le taimi e fa’apa ai, i se vaega o a latou aoaoga sa faia i Aoloau i le taeao ananafi. [ata AF]

Sauni ali’i ma tama’ita’i Leoleo o le malaeva’alele mo le tapenaina o a latou aupega mo le taimi o le latou aoga i luga i Aoloau i le taeao ananafi. [ata AF]

Le ali’i faiaoga o loo fa’atinoina aoga a Leoleo o le malaeva’alele i auala e fa’aaoga ai a’upega mo le puipuiga, susuga Ernie Haleck, o se Leoleo ua litaea mai i le Ofisa o Leoleo i Los Angles, i le taimi sa ia fa’ata’ita’iina ai a’upega e fa’aaoga i le taimi o le aoga i luga i Aoloau i le taeao ananafi. [ata AF]
ausage@samoanews.com

E to’a 30 ali’i ma tama’ita’i Leoleo o le Malaeva’alele i Tafuna o loo auai i se aoga o loo fa’agasolo i le vaiaso atoa lenei, mo le toe fa’afouina lea o lo latou tomai i auala e fa’aaogaina ai a’upega i le taimi e fa’atino ai la latou galuega o le puipuia lea atoa ai ma le leoleoina o le saogalemu o le atunu’u femalagaa’i i le malaeva’alele fa’avaomalo a le atunu’u i Tafuna.

 

O ni isi o vaega o a latou aoaoga e pei ona fa’amaonia mai e le Pulesili o le Vaega o Leoleo a le malaeva’alele, susuga Chief Na’oiamasionasoa Fetaiaiga Fanene Kava i le Samoa News ananafi, o le auai lea i aoaoga tusitusi fa’apea ai ma aoga e fa’ata’ita’i ai le fa’apaina o le fana atoa ai ma le fa’atinoina o gaioiga e tete’e atu ai i ni fa’alavelave e ono tula’i mai.

 

“Talu ona fa’aaupegaina mai Leoleo o le malaeva’alele a le atunu’u i le tausaga e 1990 e oo mai i le taimi nei, o lo o fa’aauau pea ona faia a matou aoaoga i tausaga uma lava, e toe fa’afou ai tomai o ali’i ma tama’ita’i Leoleo i le fa’aaogaina o ‘aupega, ina ia mautinoa o loo mulimuli ta’i i tulafono ma ta’iala o loo fa’atulaga mai e Ofisa a le feterale o loo puipuia ma vaavaaia malaeva’alele uma i totonu o setete ma teritori a le malo tele, le Ofisa o le FAA fa’apea ai ma le TSA”, o le saunoaga lea a Chief Kava.

 

O le ali’i faiaoga o loo ia fa’atinoina aoaoga a Leoleo a le malaeva’alele i tausaga uma lava, o se tasi o alo o le atunu’u ua malolo litaea mai i vaega o Leoleo i Los Angeles, susuga Ernie Haleck, fa’atasi ai ma le lagolagosua a ni isi o Ta’ita’i Sinia a le Ofisa o Leoleo a le malaeva’alele i Tafuna, e aofia ai le susuga i le ali’i faiaoga ia Lt. Tavui Toatelegese, Cdr. Peniamina R. Faumuina ma Cdr. Joshua Failautusi.

 

Saunoa atili Chief Kava e fa’apea, e taua tele le tatau lea ona fa’afou laisene a ali’i ma tama’ita’i leoleo o le malaeva’alele i tausaga uma lava mo le tauaveina atoa ai ma le fa’aaogaina o a’upega, ona o ni isi ia o ta’iala o loo fa’atonuina e le FAA ma le TSA le Pulega a le malaeva’alele e ausia.

 

“O le agaga atoa o nei aoaoga aemaise ai o le fa’afouina lea o laisene mo ali’i ma tama’ita’i Leoleo, ina ia mautinoa o loo lava tapena le aufaigaluega mo le puipuiga o le atunu’u i taimi e tutupu mai ai ni fa’alavelave fa’afuase’i i le malaeva’alele”, o le saunoaga lea a Chief Kava.

 

O fana o le ituaiga o le ‘Glock-17’ o lo o fa’aaupegaina ai Leoleo o le malaeva’alele, o a’upega fo’i ia sa fa’aaogaina i a latou aoga i lenei vaiaso.

 

O le mae’a ai o le la’asaga muamua o le aoga e toe fa’aa’oa’o ai le fa’apaina o le fana, na fa’ailoa ai e Haleck i ali’i ma tama’ita’i Leoleo tulaga faigata o loo feagai ma i latou i le tau toe fa’amasani e fa’aaoga a’upega, ona e na o le fa’atasi lava i le tausaga ona faia nei aoga.

 

O lo o i ai le fa’amoemoe o le mae’a ai o aoga o loo fa’agasolo mo ali’i ma tama’ita’i Leoleo o le malaevaalele i lenei vaiaso, e tatau ona pasia uma i latou i le umia atoa ai ma le fa’aaogaina o a’upega.