I le fa’aautuina ai o le fu’a a Amerika Samoa i lenei tausaga i le autu o “Tupulaga mo Taeao”, ua manatu ai fo’i le Komiti Fa’afoe e ala i se fautuaga mai le afioga i le ali’i kovana o le atunu’u, ina ia fa’ataua fa’atasi atu ai a tu ma agaifanua a Samoa sa masani mai ai i tausaga ua mavae, e aofia ai ta’aloga, pese ma uiga fa’aalia o tagata.

O le fonotaga a le kovana ia Lolo Matalasi Moliga ma lana Kapeneta i le vaiaso na te’a nei, na fa’alauiloa ai e le ta’ita’i o le atunu’u polokalame fa’ataoto mo le fu’a o lenei tausaga, atoa ai ma galuega fa’atino a Komiti eseese o loo galulue mo le fa’amautuina o fuafuaga uma mo sauniga o le fu’a.

O le aso Gafua, 17 Aperila 2017 ua fa’atulaga e sisiina ai le fu’a i le malae taalo o le Veterans Memorial Stadium i le taeao, ma fa’agasolo ai lava polokalame mo le fa’amanatuina o le atoaga o le 117 tausaga talu ona osi feagaiga Amerika Samoa ma le Iunaite Setete o Amerika, ma tapunia ai lava sauniga o le fu’a i le afiafi o le aso lava lea.

“Ua i ai le fuafuaga a le malo o le a autu polokalame o le fu’a mo lenei tausaga, i le fa’atauaina lea o Tupulaga talavou, aua e i ai le talitonuga o alo ma fanau a le atunu’u o le lumana’i lea o le malo ma le atunu’u mo a taeao, e tatau fo’i ona fa’atulaga e le malo polokalame eseese uma e fa’ailoa ai le fa’atauaina o Tupulaga talavou”, o se vaega lea o le saunoaga a le ali’i kovana.

O le aso Gafua e oo atu i le aso Tofi, Aperila 10-13 ua fa’atulaga e fa’agasolo ai le Fa’aaliga o Oloa eseese i le malae o le Su’igaula a le Atuvasa i Utulei, ma maua ai fo’i le avanoa o le atunu’u latou te molimauina ai nei fa’aalia eseese.

E le gata i le fa’aaliga o Oloa a le aufai pisinisi lea e fa’atautaia e le Matagaluega o Fefa’atauaiga ma Alamanuia (DOC), ae o le a fa’agasolo ai fo’i isi polokalame e pei o le Fa’aaliga a le Aufai Fa’atoaga, fa’apea ai ma le Fa’aaliga a le Soifua Maloloina, lea e fa’alauiloa ai ituaiga taumafa eseese e aofia ai ma Taumafa Samoa o aso anamua.

O Fa’aaliga eseese uma nei e 3 e amata mai i le itula e 8:00 i le taeao seia oo atu i le itula e 5:00 i le afiafi, ae o le itula e 6:00 i le afiafi e oo atu i le itula e 9:00 o le a fa’ataunu’uina ai fa’afiafiaga mai ausiva ma au fa’afiafia eseese i le atunu’u, lea o le a fa’atautaia e le Ofisa o Tu ma Agaifanua a le atunu’u (Arts Council).

Ua i ai fo’i fuafuaga a le Komiti o le Fu’a o le a aofia ai i polokalame eseese mo le vaiaso o le fu’a le fa’ataunu’uina o Taaloga Fa’a Samoa, ina ia mafai ai ona toe fa’atepa le atunu’u aemaise ai tagata mai fafo o le a molimauina lenei fa’amoemoe atoa, i ituaiga ta’aloga fa’a Samoa sa ta’aalo ai Tuaa i aso ua mavae, ma o ni isi o ia ta’aloga e aofia ai Taga Ti’a, a’e i le Niu, Tuuga Paopao, atoa ai ma Tuliga Pua’a.

I tuaga o Tuuga Fautasi, ua i ai le fuafuaga o le a taoto atu lava i le Komiti le fa’atulagaina o aso o le tuuga. O le fonotaga a le Komiti ma Kapeteni i le vaiaso nei na fa’alauiloa ai ni isi o fuafuaga e pei ona fuafuaina mo le tuuga fautasi i lenei tausaga, e aofia ai le vaevaeina lea o le tuuga i Vaega e 2, ona filifili mai ai loa lea o Sa e tolu pito i luga mai Vaega e 2 e tausinio mo le sailiina o le siamupini mo lenei tausaga, lea ua fuafua e faia lea i le taeao o le aso Toona’i, Aperila 15, 2017.

O lo o i ai le fuafuaga a le Komiti o le a amata mai tai tuuga mo Vaega e 2 i le ulua’i aso o le tuuga, ae o le aso o le sailiina o le siamupini, o le a amata atu ai i uta i le tini le tuuga ma aga’i atu ai i tai i le mamao e 5 maila, ma toe tini mai ai i uta i le vaega na amata atu ai le tuuga.

“O le agaga atoa o le Komiti o le Fu’a, ia maua e tagata uma le agaga fiafia ao alo atu ai Amerika Samoa i le fa’amanatuina o lana sisigafu’a o lenei tausaga”, o le saunoaga lea a le afioga i le Lutena Kovana ia Lemanu Palepoi Peleti Mauga, o ia fo’i lea o le Taitaifono o le Komiti o le Fu’a o lenei tausaga.

Talu ai o ni isi o fa’afitauli sa alia’e mai i tuuga mai ni isi o tausaga ua mavae, na mafua ai ona toe fa’amalosia ai e Lemanu sui o afioaga o loo i ai a latou fautasi o loo avea ma sui o le Kapeneta a le kovana, ina ia fa’amuamua pea le agaga na mafua ai ona fa’atula’i mai tuuga fautasi i taimi o sisiga fu’a, o le taumafai lea ina ia saili ni auala e fa’a fealofani ai tupulaga talavou.

“E le aoga nei tuuga fautasi pe afai ae ma’imau ai se soifua o se tasi, pe le maua ai fo’i le agaga fealofani ma le nonofo fa’atasi o tupulaga talavou, aua o le agaga atoa o le afioga i le ali’i kovana, ia avea tuuga fautasi o se auala e mafuta fa’atasi ai tupulaga o afioaga eseese i le atunu’u”, o le saunoaga lea a Lemanu.

O le itula e 2:30 i le aoauli o le Aso Sa, Aperila 16 ua fa’atulaga e faia ai le sauniga lotu e tatala aloaia ai sauniga o le fu’a o lenei tausaga, lea ua fa’amoemoe e faia i le maota o le Lee Auditorium i Utulei, ao lumana’i ai sauniga o le fu’a i le taeao o le aso Gafua e sosoo ai.

O Autalavou mai Ekalesia tetele e 3 i le atunu’u lea ua filifilia latou te tapenaina fa’afiafiaga o pese ma siva fa’aleaganu’u, fa’apea ai ma le valaaulia e tasi mai Samoa, lea ua sauni mai i ai le afioaga o Sapunaoa mai Faleali’i.

O le Autalavo a le Ekalesia EFKAS o le a tatalaina fa’afiafiaga o le fu’a i le mae’a ai o le taumafataga o le aoauli, sosoo ai le Autalavou a le Katoliko, Autalavou Metotisi, ae taualuga e le au fa’afiafia mai Sapunaoa.

O le aso Faraile o le vaiaso nei lea ua fa’atulaga e faia ai le ulua’i tapenaga a matagaluega uma o le malo, mo le teuteuina fa’amatagofie o tafaala atoa ai ma nofoaga eseese i le atunu’u, ao lumana’i ai sauniga o le fu’a.

O le aso Gafua, Aperila 10 lea ua fa’atulaga e faia ai le fonotaga fa’ai’u a Kapeteni o Fautasi ma le Komiti, mo le fa’alauiloaina o tulafono e apalai i le tuuga ao lumana’i ai le fa’ataunu’uina o tuuga fautasi.