Ads by Google Ads by Google

Fa’atula’i e se ali’i talavou lu’itau mo fanau aoga uma i AS

Le susuga a Tuafaleloa Fanolua, o se tasi o tama fanau a le atunu’u o lo o galue i lalo o le polokalame lea na fa’atula’i e le afioga i le ali’i kovana ia Lolo Matalasi Moliga, e maua ai avanoa o fanau ua fa’au’u mai i aoga i fafo ma fa’ailoga e galulue ai i Ofisa o le malo.  [ata AF]
ausage@samoanews.com

Na fa’aaoga e le susuga a Tuafaleloa Fanolua lona avanoa na avea ai o ia o se tasi o Failauga fa’apitoa, i le sauniga a le malo e aloaia ai tautua a tagata faigaluega uma i le atunu’u i le vaiaso na te’a nei, na ia fa’atula’i ai se lu’itau mo alo ma fanau uma a le atunu’u o lo o i totonu o faleaoga iinei ma atunu’u i fafo, ina ia fa’amaoni i a latou a’oa’oga ma ia toe fo’i mai e tautua le atunu’u ma le malo, ona o i latou o lo o fa’amoemoe i ai le lumana’i o Amerika Samoa.

 

I le fiu ai e tau saili sana galuega e galue ai ina ua mae’a ona fa’au’u mai o ia mai le Iunivesite a Hilo i Hawai’i, na taua ai e Fanolua le fa’ateia o ia i se tasi aso ina ua maua atu lana telefoni mai lona Tina, ma ia fa’ailoa atu ia te ia, o lea ua mae’a ona totogi e lona Tama lona pasese e toe malaga mai ai i Amerika Samoa i le fa’aiuga o le tausaga e 2014.

 

Na taua e Fanolua le tu’utaia o ana taumafaiga uma mo le tau sailia o sona lumana’i manuia i Amerika Samoa nei, ina ua taunu’u mai i le tausaga e 2014 ae fetaui ma le fa’amalosia e le kovana ia Lolo Matalasi Moliga o lana poloaiga, e taofia ai le toe fa’a faigaluegaina o ni isi tagata faigaluega fou i le malo, taofi le faia o si’itaga fa’aopoopo i totogi o tagata faigaluega, ona o tulaga fa’aletonu ua i ai le tamaoaiga o le atunu’u i lena vaitau.

 

“Ina ua ou fa’alogoina lenei tala fa’anoanoa, sa oo mai ia te a’u le fa’avaivai ma ua ou le mana’o fo’i e saili sa’u galuega i lena taimi, peita’i na toe oso mai isi mafaufauga ia te a’u fai mai, e sili ai loa le saili o soo se galuega lava ou te maua, ina ia maua ai se tupe e fa’atupu mo le totogiina o lo’u pasese ou te toe fo’i atu ai i Hawai’i, atonu e maua ai sa’u galuega ou te ola ai”, o le saunoaga lea a Fanolua.

 

E ui i lagona fa’avaivai na oo i lenei ali’i talavou, ae sa avea le fa’amalosi atu o lona Tina ia te ia ma fa’ailoa atu le polokalame fou lea na amata e le ali’i kovana i le tausaga na te’a nei, e maua ai le avanoa mo alo ma fanau ua fo’i mai ma fa’ailoga e galulue ai i Ofisa o le malo, ma auala na aga’i atu ai loa le susuga a Fanolua ma fa’atumu lana pepa talosaga mo se galuega, ona o lona naunau lava ia maua se galuega e fa’aaoga i ai le poto sa foa’i atu e le Atua ia te ia.

 

“E ui o lea ua fa’ailoa mai e lo’u Tina le polokalame a le ali’i kovana ua fa’atula’i mo fanau aoga a le atunu’u ua fo’i mai ma fa’ailoga, peita’i i le taimi lea i lo’u mafaufau, o lo o o’u tu ai i tua ma va’ava’ai mai i totonu o le malo, ma ou maitauina ituaiga tagata faigaluega o lo o galulue mo le malo i le taimi lea, lea e mafuli lava i tagata matutua ua tele tausaga o latou nofoia galuega a le malo”, o le isi lea saunoaga a Fanolua.

 

Na taua e lenei ali’i talavou e fa’apea, ina ua tau lona mafaufau i tagata matutua ua tele tausaga o latou nofoia galuega a le malo, sa ia manatu ai loa e fa’apea, ailoga e i ai se avanoa na te maua ai se galuega i le malo, seiloga lava e malolo litaea tagata matutua o lo o galulue, ona fa’atoa maua lea o ni avanoa faigaluega o tupulaga talavou e i ai o ia.

 

Sa ia fa’atulou i le mamalu o Tama ma Tina matutua ua loa la latou tautua i totonu o le malo, peita’i o lana fa’amatalaga, sa manatu e fai ma lu’i i isi uma tupulaga talavou a le atunu’u o loo i totonu o faleaoga, aemaise ai i latou ua i’u mai ma fa’ailoga, ina ia tu’uina atu la latou fa’atuatuaga i le malo e maua ai se toomaga mo i latou, ma maua ai galuega e tausi ai o latou aiga mo le lumana’i.

 

“O lo’u tula’i atu la i o outou luma i lenei taeao (taeao o le aso Faraile na te’a nei), o a’u o se totino o le polokalame lea sa fa’atula’i e le afioga i le ali’i kovana i le tausaga na te’a nei, ina ia maua ai avanoa o fanau aoga ua fo’i mai ma fa’ailoga i fafo e pei o a’u, e galulue ai i galuega eseese i totonu o le malo, ina ia fa’amasani ai i latou i auala e fa’atinoina ai galuega a le malo, ma ua ou iloa ai le taua o le avea ma tagata faigaluega, e le gata e maua ai le agava’a, ae unaia ai le mafaufau ina ia fa’ataunu’u lo’u tofiga sa valaauina ai a’u e le Atua, o a’u fa’apea ai fanau uma a le atunu’u, o le lumana’i o le atunu’u ma le malo i le lumana’i”, o le saunoaga lea a Fanolua.

 

“Tupulaga e o Amerika Samoa, o oe o le lumana’i o le atunu’u, o loo ia te oe le meaalofa e mafai ai ona avea oe o se meatotino taua mo Amerika Samoa i le lumana’i. Fa’afetai fo’i i Tuaa sa latou asaina mai le fita o le galuega, aemaise ai Matua sa tausia i matou, ma ta’ita’i o le atunu’u sa fa’atulagaina nei polokalame, lea ua mafua ai ona matou selesele fa’amanuiaga e tele”, o le saunoaga lea a Fanolua.

 

I le fa’aiuga o lana saunoaga fa’aumiumi, sa ia fa’atula’i ai se lu’i i tupulaga uma a le atunu’u, ina ia fa’aaoga tatau lo latou taimi i totonu o faleaoga, ina ia lava tapena i latou e avea ai ma ta’ita’i o le atunu’u i le lumana’i.

 

O isi failauga fa’apitoa o le aso e aofia ai le afioga i le ali’i kovana, aemaise ai le Faipule mai Uosigitone, le tofa a Aumua Amata, lea sa la fa’asoa le taua o le sao o tagata faigaluega uma i totonu o le atunu’u.

 

Saunoa Aumua e fa’apea, ana leai tagata faigaluega uma i totonu o le malo ma kamupani tua, e leai se mea lelei e mafai ona tupu i totonu o le at unu’u, aua o galuega o lo o latou fa’atinoina o lo o afua mai ai tulaga manuia i totonu o le malo, nu’u, itumalo ma le atunu’u atoa.

 

Ae na taua e le afioga i le ali’i kovana i lana saunoaga lona fa’afetaia o tagata faigaluega uma i totonu o le atunu’u, aemaise ai tama fanau o lo o latou tauina le taua i atunu’u i fafo, ona o le tautua o lo o latou fa’atinoina pea mo le atunu’u i soo se aso.

 

“A leai ni tagata faigaluega, e le manuia se malo, pisinisi ma se atunu’u, fa’afetai tele i tagata faigaluega uma a Amerika Samoa e tusa ai o la outou sao”, o le saunoaga lea a le ali’i kovana.