E le o toe umi se taimi ae motusia loa le avanoa sa maua e le mamalu o le itumalo o Manu’a, e malaga fua ai i le va’a a le malo atoa ai ma le la’uina o uta, ona o lea ua sauni le malo e fa’ae’e le totogi mo nei tautua.

O le fonotaga a le afioga i le ali’i kovana ia Lolo Matalasi Moliga ma lana Kapeneta i le vaiaso na te’a nei, na talanaoina ai lenei mataupu, ma maua ai le avanoa o le sui Fa’atonusili o le Pulega o Uafu ma Malaeva’alele e fa’amanino ai fuafuaga a le latou Ofisa e fa’atatau i le fa’atulagaina lea o totogi mo pasese ma uta mo Manu’a.

I le mae’a ai ona fesiligia e Lolo o le sui faatonu ia Chris King po o afea lea ua fuafua lona Ofisa e amata fa’amamalu ai totogi o pasese ma uta mo Manu’a, sa ia talosagaina ai loa le aua ne’i soona fa’amamafaina totogi mo uta ma pasese mo Manu’a, ona o le fa’amoemoe e su’e ai ni tupe mo le malo, “ae tau lava o nai totogi e fa’apaleni ai le kesi atoa ai ma le tausia leleiina o le va’a a le malo o lo o tautuaina le itumalo o Manu’a”.

“O le agaga atoa o le malo, ia maua se avanoa e totogi ai e tagata o le itumalo ni nai tupe, ina ia mafai ai ona maua se fesoasoani e tausi ma fa’aleleia ai le tatou va’a”, o le saunoaga lea a le ali’i kovana i le fonotaga a le Kapeneta.

Na fa’amautu atili e King le fuafuaga mo le fa’ae’eina atu lea o totogi i pasese ma uta mo Manu’a i le taimi o le fonotaga, ae le i fa’alauiloaina le maualuga o le a fa’atulaga ai totogi mo nei tautua a le malo.

I le tatalaina ai o tautua a le Ofisa o le Eletise ma le Suavai (ASPA) i Ta’u ma Ofu i Manu’a i le tausaga lenei, le auaunaga lea e maua mai ai le eletise i le malosi’aga o le La, o le isi lenei mataupu sa aofia i le fa’afetai a Ta’ita’i o le itumalo o Manu’a i le taimi na latou fa’afetaia ai le kovana ma le malo i le fa’aauau pea lea o le faia o galuega lelei mo Manu’a, o le avanoa o lo o malaga fua ai Manu’a i va’a a le malo e le o totogiina ni pasese ma uta.

Ae na taua e ni isi o tagatanu’u o le itumalo o Manu’a i le Samoa News, ua tatau ona fa’ae’e ni totogi mo pasese ma uta a tagata Manu’a, ina ia mafai ai ona fesoasoani lea vaega tupe i le fa’aleleia o auala o femalagaaiga mo le itumalo.

“E faafetai i le kovana ma le faigamalo ona o le agaga e fia fesoasoani mo itumalo o Manu’a, ae i lo’u lava taofi na o a’u, e tatau fo’i ona i ai se sao o Manu’a i le fa’aleleia o va’a a le malo o lo o tautua ai tagata Manu’a, aua o tupe lava o lo o mana’omia e fa’aleleia ai le va’a pe a o o ina tulaga fa’aletonu, o le mafua’aga fo’i lena ou te lagolagoina ai le tatau lea ona totogi uta ma pasese mo le itumalo o Manu’a”, o le saunoaga lea a se tasi o Tama mai Manu’a e le i finagalo e fa’ailoa lona suafa.

E eseese lagona o ni isi o tagata o le itumalo i le fuafuaga lea ua sauni le malo e fa’ataunu’u, ona e talitonu i latou, o tupe o lo o aumai e le malo tele e fesoasoani ai i le atina’eina o Tutuila ma Manu’a, o tupe na e tatau ona fa’aalu e fa’aleleia ai atina’e ma auala o femalagaaiga e aofia ai ma le va’a o le Manu’atele o lo o la’u ai tagata ma uta i Manu’a, ae leai se mea o le a toe tigaina ai fua tagata Manu’a e toe totogi ni isi tupe mo pasese ma uta.