Ua fa’amaonia i se tusi mai le Pule o le Ofisa a le CDBG (Community Development Block Grant) o lo o i lalo o le Matagaluega o Fefa’atauaiga ma Alamanuia a le malo ia Magdalene Lina Petaia, le maua lea o se vaega tupe e fa’atupe ai le fausiaina o le malae ta’alo mo le aoga tulaga muamua a Tafuna.

I se tusi mai ia Petaia sa tu’uina atu i le afioga i le tama’ita’i faipule ia Vui Florence Saulo, o lo o ia taua aloaia ai le maua o se vaega tupe e fa’atupe ai lenei galuega taua na amata talosagaina mai e Vui i le tausaga na te’a nei.

Ona o lea tala fiafia, na tu’uina atu ai loa se tusi fa’afetai mai le afioga a Vui i le tama’ita’i pule o le Ofisa o le CDBG ia Petaia, i lona galue malosi e saili lenei vaega tupe e fesoasoani ai i le fa’aleleia o vaega e fa’aaoga e fanau aoga a le atunu’u.

Na taua e Vui i lana tusi i le aso 3 Iuni 2017 lona fa’afetaia o le tama’ita’i Pule ia Petaia ma le Ofisa, i le galulue malosi e saili vaega tupe e fesoasoani i le atina’eina o vaega mo fanau aoga, fa’apea ai atina’e eseese i le atunu’u.

“E pei ona taua i ni isi o su’esu’ega sa faia, e o fa’atasi lava tulaga i aoaoga fa’apea ai ma aoaoga i ta’aloga, e pei ona fesoasoani ai i le atina’eina o fanau aoga a le atunu’u”, o se vaega lea o le tusi a Vui ia Petaia.

“I le avea ai o a’u o se tasi o faipule mai le itumalo o Tualauta, o se tasi lenei o vaega e ave i ai la’u fa’amuamua, o tulaga i aoaoga a fanau, o le mafua’aga lena ua fa’amalieina ai lo’u loto ina ua maua mai lenei tala fiafia e fa’atatau i le vaega tupe e fausia ai le malae taalo mo fanau aoga i le aoga tulaga muamua i Tafuna”.

Saunoa atili Vui e fa’apea, e talitonu lona taofi o le lelei o tulaga tau aoaoga o le malosi fo’i lea o le lumana’i o le teritori, o le mafua’aga lena e tatau ai ona fa’aleleia nofoaga mo aoaoga ina ia fiafia ma naunau i ai fanau aoga.

I le fa’aiuga o lana tusi, sa ia fa’afetaia faapitoa ai le afioga i le ali’i kovana ia Lolo Matalasi Moliga ma lana faigamalo, ona o le fesoasoani malosi pea i le atina’eina o tulaga tau i aoaoga i le atunu’u, e pei ona tu’uina mai ai lana saini e aloaia ai le fausiaina o le malae ta’alo.

I se fa’atalatalanoaga ma le Samoa News i le vaiaso nei na fa’amaonia mai ai e Vui lona taulimaina o se tusi mai ia Petaia e fa’amaonia atu ai le vaega tupe ua maua, atoa ai lana tusi e fa’afetaia ai lea galuega taua.

“O le masina o Mati i le tausaga na te’a nei na tu’uina atu ai la’u talosaga i le Ofisa a le CDBG mo se vaega tupe e fausia ai le malae ta’alo mo Tafuna Elementary, ae o le masina o Ssetema o le tausaga lava na te’a nei, na maua mai ai le tusi ua talia le talosaga, ae o lo o fa’atali mo se vaega tupe e fa’atino ai le galuega, ae o lea la ua maua mai le tusi e fa’amaonia mai ai le i ai o le vaega tupe e fa’atupe ai le galuega”, o se vaega lea o le saunoaga a Vui.

O le vaiaso nei fo’i lea na asia ai loa e sui o le Ofisa le nofoaga e fausia ai le malae taalo, i tua lava o le vaega o lo o i ai le aoga tulaga muamua a Tafuna, ma ua fa’amoemoe o se taimi e le o toe mamao e amata fa’atino ai loa lenei galuega.