“O lenei, o le a sa tatou upu i nei mea, afai ua ‘au i tatou ma le Atua, o ai se fa’asagatau mai!… Aua ua tatou manumalo a’ia’i i nei mea uma lava, aua o Ia ua alofa tele mai ia te’i tatou….” Roma 8:31-37.

O le Upu lea a le Atua na auaí i ai manatu o le failauga, a’o taumafai o ia e fa’amaise i le loto mafatia ona o le valevale alofa fa’amatua, fa’aleuso, fa’aleuo sa lagona i toe sauniga o Toeseinuupotopoto Ulima Ume, ua goto lona la, a’o talavou lava o ia. Na fa’atumulia le malu o le Atua, Le Papa Oe, Ekalesia Metotisi i Futiga, i lona toe sauniga, i le masii atu o le US Army Reserve, fa’apea ma le aiga i ona itu tetele ae tainane o uo mamae a le ali’i talavou, ua moe nei.

Sa maliu Ume i se fa’alavelave mata’utia na tupu i le masina ua te’a i le lotoa a le Manu’a Store i lona nofoaga i le Tafuna Industrial Park. O ia e to’atolu ai i latou sa maliliu i lenei fa’alavelave.

I le sauniga, na matu’u lava le taimi atofa mo faiteu a le Mafutaga a le Au Uso, ona soso’o atu ai loa ma le faiteu a kamupani a Manu’a ma Tutuila Stores, lea sa galue ai Ume i le Manu’a Store.

Ina ua to’ai mautu le faiteu i luma ona tutula’i lea o le fa’atina o le Kamupani a Manu’a ma Tutuila ma ia tolaulauina le feau fa’amaise mai le Faipule i Uosigitone Aumua Amata, e avea ma latou fa’amaise fa’atasi mo le paia o aiga, uso ma tuafafine ae maise o matua o le latou uo fa’apelepele i le galuega o Ume.

Mai lona tina, Masina Ume, sa ia fa’ailoa ai, “O lenei tama e tali lava i le ata mea uma, pe ote pe vala’au atu, ae tali muamua lava i le ata. A oo fo’i ina fia sasa ia te ia, e toe sologamalie mea uma pe a oo ina fa’aata mai ita, ae le’i oo atu se ta. O lana upu e sili ona ou fa’amoemoe i ai i so’o se taimi o lana fa’amalosi’au mai ia te a’u pe a vevesi i se mea, ‘Mom se soia, o lea e lelei lava mea uma. Fa’alalo mai le toto maualuga’. Talofa ou te le toe lagona lava ia upu.”

Mai lona uso matua, Ulima Ume, sa ia fa’apea ai, “Ua tasi se mea ua misi i le tina, o le ali’i lenei e matua tumu i le kuluku o ona uiga. E fai aso tele ia a’u, ae su’e atu lava, ua oso e Taebo ae le faia se fe’au. E faatele ana tala malie, ae fai lava ma ana togafiti e sola ai e Taebo ae le faia mea o mana’o ai Mama. E i ai fa’aaliga i le miti ua ou va’ai i ai, e i ai ma se fe’au taua ua fa’aoo mai ai. Ua ou va’aia le fa’aaliga ma ou iloa ai, e oti lava o ia. Ua ou iloa fo’i o ia fa’ailoa mai, aua ou te popole ua ou alu ma le fiafia. Ae ua fesiligia mai ai a’u, poo lava lo’u fa’atuatua. O le a fai fo’i ma se mea e toe fafagu ai ia te a’u, lea e fa’amalosi’au, ia talitonu a’ia’i i le Atua e oo mai ai le fesoasoani.”

Mai le vaega a le US Army Reserve, sa latou saunia le fa’aalo fa’aaloalo i lea taimi o molimau, sa faia le tauvala’auga, ae ua le tali lana susuga le Fitafita Fa’aagaaga mai Futiga. Ina ua vala’au fa’atolu lona igoa ae le tali lava, ona fa’apa fa’atolu fo’i lea o le fa’ailo fa’aaloalo i fana, aua ua malolo fitafita ma ua sauni e lagemau i lona aiga.

Ina ua mae’a lea fa’aaloalo ona tutula’i lea o le susuga le taita’i fa’alotoifale a le US Army Reserve 1Lieutenant Gregory Hotaling, o le ta’ita’i i le Bravo “Bulldogs” Company Commander mo lana molimau i le tautua a Ume i le US Army i Amerika Samoa.

“O lenei ali’i e laufofoga fiafia, e le iloa se aso ua usu atu ai i le galuega ae fa’asiasia, peita’i, ua to’atele i matou ua fa’asiasia ma fa’anoanoa o matou agaga, ina ua le toe i ai o ia i le matou mafutaga. E fa’aaloalo i ta’ita’i, e faia ona tiute ma le atoatoa ua ia iloa, ae maise, e matua fa’afiafia loto i aso uma, ae maise i ana pa’aga Samoa, o isi uso a fitafita.  Sa ia tau’ave one tiute ma le to’a, fiafia ma le fa’amaoni, e le fefe i se mea, e loto tele i ona uiga fa’aalia ma ola ai. O ia o le fitafita ua agave’a mo le US Army Reserve i ala uma e ao ina tautua ai. Matou te fa’aleo foi le agaga fa’amaise, mai le taele o matou loto faavauvau, ona ua amia le uso, ae le’i mae’a ona faiva. Amuia o ia e vala’auina, a’o tautua pea!”

E le gata i lea, ae sa i ai foi sui o le JROTC Staff Sargeant Retired Reserve Pitoitua Samuelu, sa fai ma sui o le Polokalama sa iloga ona fa’ailo ai e Ume lona tomai fa’afitafita a’o aoga i Tafuna High.

“O ia lenei e leiloa se mea e le gafatia e ia ona fa’atino, e matua ulavale, ae poto i mea uma a le JROTC, o lona uiga, o le ituaiga tonu lea e moomia i lenei tautua. E tusa pe ulavale, ae mo’omia le poto i ona faiva, ua taulia oe o se tasi e mana’omia tele, aua o uiga ia e iloa ai le toa e fa’atino tiute fa’afitafita i so’o se taimi. O ia o le tamaititi fa’auu mai Tafuna High, i le tausaga 2012, ma ua iloga lona mata’alia i ona tiute uma, a’o aotauina mai lona soifua talavou i tiute fa’amiliteri.”

Na fa’aiu molimau i se upu na fofoga e le tama o le galuega, o lea sa fai ma se tasi e talia le vala’au a le faletua fa’atina o le galuega i le Papa Oe, “Ua le toe tali mai Toese i se taumanuo a le tina e fia fai se fe’au i le maota o le galuega, poo le malu o le Atua, a’o le laufanua fo’i o le ekalesia. E ui ina fa’aataata mai isi molimau ma fa’apea e faitogafiti le ali’i ua masoe nei, ae o le tala a lo’u tama o le galuega, o se tasi e tasi lava le vala’au a le tina oso mai le latou fale, ma tali le mana’oga o ia ma’ua. Ua le toe vaaia lona tino, ae o mea sa ia faia, ua tumau pea e fai ma va’aiga i lana tautua, ao se talavou aoga i le Aufaipese, Autalavou, ma le Ekalesia i fe’au fa’atalavou e ao ina fa’atino.”

I le toe sauniga o lona falelauasiga, sa fa’atino ai tiute o le US Army Reserve e ala i le agiagia mo le tina e na te teuina. Ua fa’apea fo’i ona faia le sauniga i totonu o le malumalu a’o le’i tu’ua le sauniga, ma tauaao ai seevae o le atali’i i lona tina na te teuina. Peita’i o le puloutau ma le la’au malosi sa avea ma ana auupega, ua toe fa’afo’i nei i le US Army Reserve. O le agiagia na taua’ao i le tina i le tu’ugamau, ma sa fa’atino lea tiute e le susuga le ta’ita’i o le US Army Reserve i Amerika Samoa, 1Lieutenant Gregory Hotaling.