Ads by Google Ads by Google

Falepuipui le ali’i na fa’ao’olima i lona to’alua i le agaese

ausage@samoanews.com

O le ali’i lea na ia fa’aaoga le ‘au o le sapelu e fa’ao’o ai manu’a i le tino o si ona to’alua fa’aipoipo, ua fa’asala nei o ia e le fa’amasinoga e taofia i le toese i Tafuna mo le 20 masina, ina ua ta’usala o ia i le moliaga mamafa o le fa’ao’olima i le tulaga lua.

 

Na ulua’i tu’uaia e le malo le ali’i o Ioane Gali i le moliaga pito sili ona mamafa o le fa’ao’olima i le tulaga muamua, lea e mafai ona fa’asala ai se tasi i le toese mo le umi e mafai ona oo atu ai i le solo atoa i le falepuipui, poo le taofia mo le umi e le itiiti ifo i le 10 tausaga ae le sili atu fo’i ma le 30 tausaga.

 

Ae i lalo o se maliliega na sainia e Gali ma le malo, lea fo’i ua talia e le fa’amasinoga, na malie ai le itu a le malo latou te toe faia se teuteuga i le ulua’i moliaga sa faia fa’asaga i lea ali’i, ina ia fa’ailoa ai le moliaga feololo o le fa’ao’olima i le tulaga lua, lea e na o le 5 tausaga e mafai ona taofia ai se tasi i le falepuipui, po o le fa’asala foi i le salatupe e $5,000.

 

E pei ona manino i fa’amaumauga a le fa’amasinoga, le matuia tele o manu’a na a’afia ai le tino o le to’alua a le ua molia, e mafua mai ina ua ia fa’ao’olima i ai.

 

Na fa’atoese Gali i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Na taua e le ua molia lona matua salamo e tusa ai o lana gaioiga sa faia, ma ua ia a’oa’oina fo’i se lesona aoga mo le lumana’i.

 

Sa ia fa’ailoa atili i ali’i fa’amasino e fa’apea, ina ua ia toe to manatu i le fa’alavelave sa tupu, ua ia iloa ai le leaga o le mea sa ia faia, ma ua ia manatu ai ua tatau ona fai se suiga mo lona olaga. E le i fa’atoese le ua molia i lona to’alua.

 

Na taua e le loia a Gali ia Douglas Fiaui le leai o se isi manatu na te toe fa’aopoopo i totonu o le ripoti na saunia e le Ofisa Faanofovaavaaia e tusa ai o lenei mataupu, ae ua atoatoa lona lelei e tusa ai o fautuaga, pau le itu e fia talanoa i ai, ua lagona e Gali le salamo moni e tusa ai o lana gaioiga sa faia, ma ua sauni fo’i o ia e talia soo se fa’aiuga e tu’uina atu e le fa’amasinoga.

 

Sa ia taua atili fo’i lona lagolagoina o le fautuaga a le Ofisa Faanofovaavaaia, i le tatau lea ona tu’uina atu se fa’asalaga fa’anofovaavaaia ia Gali, e aoaoina ai lona mafaufau mai le solitulafono sa ia faia.

 

I le fa’afinauga a le loia a le malo ia Christy Dunn, sa ia lagolagoina ai le tatau lea ona fa’asala le ua molia i se fa’asalaga faanofovaavaaia, ina ia mafai ai ona toe aoaoina se isi lesona taua, ma ia auai i ni aoaoga fa’a faufautua e fesoasoani ai i le tulaga o le ita.

 

Na pau le itu sa fia manino i ai ali’i fa’amasino, po o ai le tagata o le aiga lea o lo o taua i le ripoti a le Ofisa Fa’anofovaavaaia na a’afia i le gaioiga a le ua molia, ae pe sa i ai fo’i ni manu’aga matuia na a’afia ai lea tagata.

 

Saunoa le afioga i le ali’i fa’amasino sili ia Michael Kruse e faapea, e ui sa fa’aaoga e le ua molia le ‘au o le sapelu e fa’ao’o ai manu’a i lona to’alua ae taofi i lona lima le lau o le sapelu, sa lava a lea e oo ai manu’a tuga i le tino o le fafine.

 

Sa taua fo’i e Kruse le fiamalamalama o le fa’amasinoga i le tulaga o lo o i ai le ulugali’i a le ua molia ma lona to’alua, ona o lea sa i ai le talosaga mo se teeaga fa’aletulafono, ae ua maua e le fa’amasinoga le fa’amatalaga ua mana’o le fafine e toe tatala i tua lea talosaga ae toe tu’u fa’atasia le la aiga.

 

Na fa’amaonia mai e le fafine i le Samoa News, le mae’a lea ona toe fa’aleleia le la aiga ma o lo o fa’aauau pea le mafutaga e pei ona sau ai i le amataga, e ui i le fa’alavelave e pei ona tula’i mai.

 

E 5 tausaga i le toese ma le salatupe e $5,000 na manatu le fa’amasinoga e fa’asala ai Gali, peita’i ua fa’amalumalu lona tuliina i le fa’asalaga fa’a falepuipui, ae ua poloaina le faanofovaavaaia o ia mo le 5 tausaga i lalo o tuutuuga e ao ona usita’i i ai.

 

O ni isi o tuutuuga e aofia ai le taofia o ia i le falepuipui mo le umi e 20 masina, totogi le salatupe e $150 ae fa’amalumalu le isi vaega o loo totoe ai, auai i aoaoga fa’a faufautua e fesoasoani ai i le ita, ma ia aua lava ne’i ona toe tagofia le ‘ava malosi po o ni fualaau fa’asaina.

 

Talu ai e le o manino i le fa’amasinoga le tulaga o le la aiga, ua fa’asa ai o ia ona toe alu i le aiga o lona to’alua.