Ads by Google Ads by Google

Fau ma soloi uta o oloa ma taumafa mo le itumalo o Manu’a


Se vaaiga i le taimi na taunu’u ai le va’a a le Manu’atele i Manu’a i le aso Lua o le vaiaso nei. [ata foa’i]
ausage@samoanews.com

Ua uma vaitaimi na tele ai lagona le fiafia ma le fa’asea mai ni isi o le itumalo o Manu’a, i le fa’aletonu lea o femalagaaiga i luga o le sami mo le itumalo, aemaise lava taimi ia e silia ai i le ta’i 2 pe sili atu fo’i masina o leai ni malaga a le MV Sili mo le momoliina atu lea o uta ma fa’amomoli mo le itumalo i tausaga ua mavae.

 

Talu ona amata le tautua a le va’a fou a le malo o le MV Manu’atele mo le itumalo o Manu’a i le masina na te’a nei seia oo mai i le vaiaso nei, ua na o le leo o le alaga fiafia ua fa’alogoina mai tagata o le itumalo, ina ua molimauina le le toe i ai o se fa’aletonu i tulaga o femalagaaiga i luga o le sami.

 

“O le tulaga lea ua i ai, ua matua fau ma soloi uta o oloa ma taumafa mo Manu’a i le taimi nei, ua le toe i ai lava se itu e fa’asea ai aiga ta’itasi, ona o lea ua lelei femalagaaiga a le va’a i taimi masani e malaga mai ai”, o le saunoaga lea a se tasi o Tama matua mai Manu’a i luga o le telefoni i le taeao ananafi.

 

Na taua atili e le Tama matua lea e fa’apea, e le gata i le tulaga lelei o femalagaaiga ua i ai mo Manu’a i le taimi nei, ae ua molimauina fo’i le saogalemu o soo se faigamalaga a le va’a fou lea ua i ai nei, i lalo o le ta’ita’iga a le ali’i Kapeteni ia Loleni Fiaai ma le au va’a.

 

“Ua tele lava suiga ua i ai malaga mo Manu’a i le taimi nei talu ona taunu’u mai le va’a fou, ua fa’amalosia i lalo o tulafono mo le saogalemu le fa’aaoga o vaega fa’aola e pasese uma e malaga i totonu o le va’a, ua tele fo’i le suiga i le manaia o potu toe ola le ea malulu, ma ua atili ai ona lelei femalagaaiga mo le itumalo”, o le saunoaga lea a le Tama.

 

Ae na taua e se Tina mai Ofu le tulaga lelei ua i ai mea uma e moomia mo le soifua o tagata ta’ito’atasi i totonu o aiga i le Luanu’u i le taimi nei, talu ona lelei femalagaaiga i luga o le sami.

 

“Ua le toe i ai se mea e oi ai le itumalo, ua maua uma uta ma oloa e mana’omia i soo se taimi, e fa’amalo atu ai i le kovana ma le malo ona o lenei fesoasoani tele mo Manu’a”, o le saunoaga lea a le Tina.

 

E pei ona masani ai i malaga e 4 a le MV Manu’atele ua mavae atu, e le ulufale le va’a i le uafu i Faleasao, ae taula mai tua o le aau, ona fa’aaoga lea o va’a laiti e lau ai tagata ma fa’amomoli i uta.

 

O le taeao ananafi na fa’amae’a ai le la’uina o uta ma fa’amomoli mo le Faletolu, ma toe malaga mai ai loa le MV Manu’atele i le po anapo i Tutuila nei.

 

Saunoa le afioga i le ali’i faipule ia Vesi Talalelei Fautanu Jr e fa’aleo lagona fiafia o ni isi o Tama ma Tina matutua o le itumalo, ona o loo tulaga lelei ua i ai le tautua a le va’a fou mo Manu’a.

 

“Pau nai vaega laiti o loo matou galulue atu i ai ma ni isi o afioga i Faipule mai Manu’a, o le toe fa’amanatu lea i le Fa’atonusili o le Pulega o Uafu ma Malaeva’alele le iugafono lea ua mae’a ona pasia, mo le fausiaina lea o se pusaaisa i luga o le uafu i Fagatogo, e teu i ai uta o oloa tu’uaisa a tagata o le itumalo i le taimi e la’u mai ai ae le taunu’u ona malaga le va’a, ina ia mautinoa e le fa’aleaogaina le tautiga o tagata i le fa’atauina o fa’amomoli mo aiga i le itumalo”, o le saunoaga lea a Vesi.