Ads by Google Ads by Google

Fausia le malae HandBall Talaane o le Maliu Mai Beach Resort

O le amataga o le galueaina o le Malae Hand Ball i autafa o le Maliu Mai Beach Resort i Fogagogo, ma ua iloga fo'i le alofagia o lenei galuega e ala i foa'i a le mamalu lautele o le atunu'u i a latou sailiga tupe o fa'atautaia nei. Ua toetoe a mae'a lenei malae mo le amataga o le ta'amilosaga Hand Ball  i le masina fou.  [ata: foa'i]

Ua toe tolopoina le tufatufaina o fa'ailoga ma le fiafia a le 'au U17 HandBall Team a tama'ita'i lea sa tu'upoina mo le masina nei, ina ia tatalia le mae'a o le latou malae ua alo atu nei e fa'amae'a le fausaga ina ia fa'atino ai latou ta'amilosaga e afua i le masina o Oketopa se'ia mae'a le tausaga a'oga lenei.

O le fa'amoemoe sa i ai, e faia le fiafia lea ma fa'asoa atu ai pine ma fa'ailoga mo tama'ita'i talavou uma sa tauva fa'avaomalo i lenei ta'aloga o le Handball.

Peita'i, ona o le tulaga le avanoa o le to'atele o malo fa'aaloalogia mai le Malo e o'o fo'i i le ASNOC i ona sui tofia e auai i lenei fa'amoemoe, na toe tolopo ai nei, ae fa'aauau le fuafuaga e fa'agaoioia loa le latou malae i le eleele ua toina mai e le ali'i faipisinnisi o Paepaetele Mapu Jamias ma le falesua o Iliganoa.

O Paepaetele o le Peresetene o le Asosi Fusu a Amerika Samoa.

"O lea eleele ua fa'amatu'uina mai lava e lea uso faipisinisi ma o se tasi fo'i ua iloga lana tautua alofa i alo talavou o le atunu'u e ala i le auaunaga fo'i i le Polokalama a le JROTC, ina ia faia ai le matou malae, ma matou fa'amamaina fo'i lea lava laueleele, ina ia atia'e le Ta'aloga Handball i Amerika Samoa,” o se tala lea a Carl Floor Sr., peresitene o le American Samoa Handball Association.

O le galuega mo lenei malae ua fa'amoemoe e mae'a lelei i le amataga o OKetopa, ae o le aso 13 Oketopa, 2017, o le a amatalia ona fa'aaoga i ta'aloga a le fanau a'oga lea o le a amatalia i le a'oga a Lupelele Elementary, mai le vasega 3 ma le 4 mo le lua masina, soso'o lea o le vasega 5 & 6, ae fa'ai'u i le isi lua masina mo le vasega 7 & 8.

"E ala ona amata mai le tapenaga i le a'oga a Lupelele ona o lea e latalata mai i le nofoaga ua fa'atuina ai le malae lenei, ma o le vave lava ona a'oa'o o fanau talavou i lea ta'aloga, e o'o atu lava i latou i a'oga maualuluga, ua seti mai pea le latou tomai e tauva ai, ma fa'aleleia atili ai le malosi e tu'ufa'atasia ai se isi 'au lelei fa'avaomalo a le tatou malo i tausaga o lumana'i,” o a Floor lea.

O le malae fo'i lenei e le fa'aaogaina na'o tama'ita'i, ua fuafua mo 'au uma lava a teine ma tama, ma ua iloga mai o se tasi o ta'aloga e matua tele le agava'a ai o fanau talavou a Samoa na lua, aua e ola mai le fanau ua iloa lelei togitogi mamao ma e masau fo'i latou togi.

"O tatou talavou e fiafia tele i le togitogi aua e pei o le auupega a Samoa i taua e togi ma velo, a'o o le polo o se mea e mama tele pe a e fua atu i le mamafa o tao ma ma'a e masani ona autogi ai e tatou fanau mea e manana'o e pa'u'u mai i lalo mai la'au e pei o niu e a toli popo, po'o ulu pe a le lava a'e i le ulu,” o se tala le a Floor.

I le fiafia lea sa faia, sa manatu ina ia taua'aoina atu ai ni sikolasipi a le Handball i le fanau teine e to'afa ua agava'a e amatalia ai i le tausaga a'oga fou i Kalefonia. O lea lava avanoa e mafai ai ona fa'aauau ona ta'a'alo i latou a'o a'o'oga i fafo i aoga maualuluga.

Lona lua e fa'aleleia atili ai latou tomai i metotia e fa'aaoga i le ta'aloga, ae a o'o ina masi'i 'au a Amerika Samoa i tauvaga fa'avaomalo, e malaga lava nei tama'ita'i e suia Amerika Samoa i le Handball.

"O lea faiga e maua ai e tatou fanau le lelei atili ma agava'a e tauva ai, aua o lo'o a'otauina fa'atasi ma 'au ta'a'alo i Kalapu a Amerika, lea fo'i e fili mai ai latou 'au fa'avaomalo a le Iunaite Setete atoa."

Ua i ai nei le atali'i e to'atasi o Amerika Samoa o lo'o a'oga i lana sikolasipi mai le Handball i Phoenix, Arizona, ma ua faaauau pea ona ta'a'alo i lea Kalapu Handball a Arizona.

Ona o le galuega o faia nei ua tauau ina uma atu ai ma le tupe fa'asoa a le Hand Ball Association, lea ua fa'ailoa mai, ua amatalia fo'i latou sailiga tupe ma ua faia le latou laulau mo foa'i i luma o le Cost-U-Less i Tafuna. O le latou ulua'i aso To'ona'i na maua ai le a'ao foa'i o le mamalu o le atunu'u e sili ma le $1,000.

O lo'o fausia lenei malae i le fausaga fa'atulaga e pasia lelei mo le fa'atautaiga o ta'aloga ma ta'amilosaga fa'avaomalo a le Ta'aloga Hand Ball ma ua le taugofie ai lona fausaga. Ua manatu fo'i e fa'aauau lava se'ia mae'a ma ni fale matamata e mafai ona maimoaina ai ta'aloga.

E ese mai le a'oa'oina o fanau a'oga i a'oga tulaga muamua i le atunu'u, ae ua fa'atulaga fo'i le fa'asolo atu i a'oga maualuluga i le tausaga a'oga fou, ae maise o le fa'atasi atu o le Au Hand Ball lenei a tama'ita'i e tauva i Ausetalia i le ta'amilosaga fa'avaomalo a le Oceania lea e faia ai ia Fepuari 2018.

Ona toe tauva lea i le ta'amilosaga i Kalefonia i le masina o Iulai 2018, i le tu'ua ai o a'oga ae tapena ai ma le fanau e to'afa o le a umia sikolasipi nei e amata a'o'oga ma ta'a'alo i Kalefonia i le tausaga a'oga fou ia Aukuso 2018.

E ese mai le sailiga tupe i le Faleoloa o le Cost U Less, ua faia fo'i le ala o sailiga tupe fesoasoani i luga o le latou Upegatafailagi i le Facebook - Go Fund Me - American Samoa Hand Ball Association.

O lenei ta'aloga sa fa'ato'a amatalia i le teritori i le tausaga 2014, ma ua fa'afetaia tele e le Peresetene ma le Laulauatofi le sapaia e le DOE ma le tatou atunu'u, aua o lea ua va'aia ni fua lelei mai lenei taumafaiga. O le tatou 'au lenei e masi'i fo'i i ta'aloga a le Youth Olympics i Argentina.