E lei nofo lelei i finagalo o ni isi o afioga i Faipule le auala na fa’amatala ai e le Kapeteni o le MV Manu’atele tulaga fa’aletonu ua mafua ai ona taofia malaga a le va’a mo Manu’a, ina ua ia taua i luma o afioga i Faipule i le taeao ananafi, ua mafua ona tu le va’a ona o loo i ai “se tama’i fa’aletonu” i le afi ua mafua ai ona taofia ana malaga, e fa’atali ai le taunu’u mai o le totoga o le va’a lea ua oka i fafo.

Na fa’ailoa e le sui fofoga fetalai ia Fetui Fetu Jr i molimau na oo atu i le iloiloga e fa’atatau i tulaga fa’aletonu ua oo i le va’a fou a le malo, e leai se fa’aletonu e ta’u “o se tama’i fa’aletonu”.

“Atonu o se tama’i fa’aletonu i la outou vaai ae o le silasila a le Fono ma le itumalo o se matua fa’aletonu tele lava. Ana o se tama’i fa’aletonu semanu e le taofia ai fua malaga a le va’a, ao lea la ua tu le va’a ua le alu, ua lava lena e ta’u mai ai e le laititi le vaega o le va’a lea ua fa’aletonu”, o le saunoaga lea a Fetu Jr ma lona si’ufofoga ua amata ona si’isi’i i luga.

“E $13 miliona ma ona tupu le tupe a le malo na fa’aalu e aumai ai le va’a i Amerika Samoa, e le o se tupe laititi la le tupe lena, afai la o se tama’i fa’aletonu i la outou vaai ae o le maitau atu a le sui lenei ma le itumalo e le laititi le faaletonu lea ua tula’i mai. Va’a fou lava ao lea ua fa’aletonu”, o le isi lea saunoaga a Fetu Jr.

Sa fa’ailoa atili e Fetu Jr i le tama’ita’i fa’atonusili o le Pulega o Uafu ma Malaeva’alele ia Taimalelagi Dr. Claire Poumele, lea sa i ai i le taimi o le iloiloga lona talitonuga o lo o i ai e fa’apea, e i ai lava lona talitonuga e tatau lava ona fa’asala tagata faigaluega a le malo e fa’aletonu ai meatotino a le malo, ona e le o se taimi muamua lenei ua alia’e mai ai tulaga fa’apenei i va’a a le malo, ae le o i ai lava ni faaiuga o faia i tagata o loo mafua mai ai ia fa’aletonu.

Na faamalamalama e le ali’i inisinia ia Jimmy Lang i luma o le komiti se vaega laititi o le afi o le va’a na fa’aletonu i lana malaga i Manu’a, e mafua mai i le malosi o le sami, ma tuuina mai ai loa le fautuaga a le US Coast Guard ina ia tu le va’a ae oka le vaega ua fa’aletonu ina ia mafai ai ona toe fa’aleleia le va’a.

O le va’a lea e taunu’u mai i le po o le aso Faraile nei lea ua fa’amoemoe e taunu’u mai ai le vaega o le afi o le va’a sa oka, ma toe fa’apipi’i ai loa lea vaega i le vaiaso fou, ma toe fuafua ai loa se isi aso e toe malaga ai le va’a pe a mae’a ona toe fa’ata’ita’i le va’a.

Na faamanino e Taimalelagi i luma o le komiti ni isi o lu’itau sa feagai ma le va’a fou a le malo, ina ua amata mai lana malaga mai le aai o Seattle ma fa’asolo mai ai i Hawaii seia oo mai lava i Amerika Samoa nei, ona o le vaega lea na fausia ai le va’a ma faia ai ana fa’ata’ita’iga i Amerika, sa fa’ata’ita’i lava i luga o le vai e malu e le sou, ae ina ua oo mai le va’a i luga o le sami, o iina na amata ai loa ona vaaia le tele o le lu’itau i le Kapeteni ma le auva’a, ona o le sou ma le malosi o le sami.

“Ou te fia fa’ailoa atu i le mamalu o le maota, e i ai fo’i isi vaega o le va’a e ono tula’i mai ai ni fa’aletonu i lenei tausaga, aua o lea lava e fa’agasolo ana galuega fa’atino i le va o Tutuila ma Manu’a, ae afai e i ai ni isi tulaga fa’apena e tula’i mai, o le a logo mai fo’i le Fono e tusa ai o ia fa’aletonu ina ia mafai ai ona outou silafia tulaga o loo i ai le tautua a le va’a.

O se tasi o fesili sa fesiligia e faipule, pe aisea e le tutusa ai va’a a malo ma va’a a le malo o Samoa e aofia ai le Lady Naomi, e tiga lava ona tele tausaga o malaga mai iinei ae le o i ai lava se taimi e fa’aletonu ai.

Na fa’afetaia e afioga i faipule le ali’i inisinia ia Lang i le ofoina mai o lona taimi ma le tomai, e fesoasoani ai i le tausia lelei o le va’a fou a le malo, aemaise ai o lona sauni e aoao ma fesoasoani i alo ma fanau a le atunu’u o loo latou galulue i galuega fa’a inisinia mo va’a i le taimi nei.