Ads by Google Ads by Google

Fefiloi lagona tagata Manu’a i le fa’aletonu soo o le MV Sili


MV Sili i le uafu i Fagatogo ao sauni mo lana malaga i Manu’a i le po o le aso Lulu na te’a nei. [ata AF]
ausage@samoanews.com

E ui o le po o le aso Lulu na te’a nei na aloaia ai loa le ulua’i malaga a le va’a o le malo mo Manu’a, le MV Sili, talu ona tula’i mai ai ni fa’aletonu laiti i le tele o vaiaso ua tuana’i atu, na maitauina e le Samoa News le fefiloi o lagona o ni isi o le itumalo ina ua fesiligia i latou e tusa ai o le avanoa lea ua maua e toe fa’aauau ai le tautua a le va’a.

 

O le aso Lulu atoa na fa’atumulia ai luga o le uafu i Fagatogo i le to’atele o tagata o le itumalo na aga’i atu mo le la’uina o a latou uta i luga o le va’a mo Manu’a. O le tele o uta na alu ma le MV Sili e aofia ai ta’avale e silia i le 5, o uta mo galuega tetele a le malo o lo o fa’agasolo i le taimi nei i Manu’a, fa’apea ai fa’amomoli a aiga e aofia ai ma oloa mo pisinisi.

 

Na fa’amaonia e le Pulesili a le Ofisa o le Vaega Tosova’a ia Moefa’auo Bill Emmsley i luma o le fonotaga a le Kapeneta i le vaiaso na te’a nei, le mae’a aloaia lea o le toe fa’aleleia o ni isi o totino o le va’a sa moomia le toe fa’aleleia, ma ua sauni e toe fa’aauau lana tautua mo Manu’a i le vaiaso nei.

 

Na fa’aaoga e Moefa’auo le avanoa sa ia maua i le fonotaga a le Kapeneta e fa’aleo ai le agaga fa’amaualalo i le itumalo o Manu’a, ona o le tele o vaiaso sa taofia ai femalagaaiga mo Manu’a, e mafua mai i vaega o le va’a sa moomia le toe fa’aleleia.

 

Na taua e Moefaauo e fa’apea, e ui i le to’atele o le mamalu o le itumalo o lo o telefoni atu ma fesiligia le tulaga ua i ai galuega fa’aleleia mo le va’a, aemaise ai o lo latou naunau ina ia vave mai se taimi e toe fa’aauau ai le tautua a le MV Sili, peita’i na taua e le ali’i Pulesili le maualuga i o latou manatu o le saogalemu o tagata femalagaa’i i le va o Tutuila ma Manu’a.

 

“E ui i le naunau mai o le itumalo ina ia vave loa ona toe fa’amatu’u atu le va’a mo le toe fa’aauauina o lana tautua, peita’i sa fa’amuamua lava i le matou Ofisa le saogalemu o soifua o tagata o le a femalagaa’i, aemaise lava fo’i i le aufaigaluega, ona o galuega ia sa fa’atonuina e le vaega a le US Coast Guard e toe fa’aleleia, o vaega e taua tele ma e moomia ai le fai ia mae’a lelei, o lea la ua mae’a galuega uma mo le va’a, ma ua sauni le va’a e toe malaga mo Manu’a ao lei oo i le Kerisimasi ma le Tausaga fou”, o le saunoaga lea a Moefa’auo.

 

Na fa’afetaia e le ali’i kovana le silasila mamao a le ali’i Pulesili ma lona Ofisa, fa’atasi ai ma lana fa’aoloolo maau ina ia silasila toto’a i auala e fa’aleleia atili ai le tautua a le MV Sili.

 

E ui o lea ua toe fa’aauau le tautua a le va’a mo Manu’a, sa lei avea lea ma itu na taofia ai le naunau o ni isi o le itumalo e fa’aleo o latou lagona fa’anoanoa i le tula’i soo mai pea o lenei fa’aletonu i le tautua a le malo mo Manu’a.

 

Na taua e le Tina matua ia Faanati Olo e fa’apea, sa naunau lava e fia la’u uta mo fa’auuga mo tapenaga o polokalame a Ekalesia ma nu’u mo le fa’aiuga o lenei tausaga i Manu’a, atoa ai uta ma fa’amomoli mo aiga, ae na poloka fuafuaga uma ona o le umi ona fa’aletonu o le MV Sili.

 

“E tatau lava i le malo ona silasila toto’a i auala e fa’atumauina ai le lelei o le va’a, ina ia aua ne’i toe tula’i mai se isi fa’aletonu i le tautua a le MV Sili i le fa’aiuga o lenei tausaga, e ui fo’i o lea e fa’atali le itumalo i le taunu’u mai o le va’a fou a le malo lea ua fuafua na te tautuaina le itumalo o Manu’a, ae tatau lava fo’i ona lelei pea le MV Sili ina ne’i tuai ona taunu’u mai le va’a fou, toe fa’aletonu atu ma le MV Sili i le fa’aiuga o lenei masina, ona tulaga pagatia ai loa lea o Manu’a i le fa’aiuga o lenei tausaga”, o le saunoaga lea a le tina matua ia Olo.

 

Sa ia taua fo’i lona le toe fia manatuaina o ni isi o Kerisimasi ma Tausaga fou ua mavae atu, lea fo’i na pagatia ai le itumalo i le tau totogiina o va’alele ma va’a a kamupani tua e la’u ai a latou uta mo Manu’a, i le taimi na toso ai le MV Sili mo le fa’aleleia o vaega sa fa’aletonu.

 

Na taua e se tasi o ali’i faipisinisi mai Ta’u e fa’apea, i le taimi atoa sa fa’aletonu ai le va’a a le malo, sa fa’aaoga ai le va’alele e la’u ai ni isi o uta e mana’omia mo lana pisinisi, ae o isi taimi e fa’aaoga ai le va’a a se tasi o ali’i faipisinisi i le atunu’u, lea e masani ona totogi e le itumalo ae malaga e la’u uta i Manu’a e aofia ai sapalai a le Ofisa o le Pulega o le Eletise ma le Suavai (ASPA).

 

Na taua e le to’atele o tagata o le itumalo sa i ai i luga o le uafu i le vaiaso nei, lo latou naunau ina ia vave ia se taimi e o o mai ai le va’a fou a le malo lea ua fa’amoemoe e sui tulaga i le MV Sili.

 

E tusa ai o le kalena fa’ataoto a le malo mo le masina fa’ai’u lenei o Tesema, o le aso 28 ma le 29 ua fa’amoemoe e faia ai se sauniga fa’apitoa i Manu’a, mo le fa’apaiaina o ni isi o galuega a le malo.

 

E pei ona fa’amanino e le afioga i le Lutena Kovana ia Lemanu Peleti Mauga, o le aso 28 Tesema e fa’apaia ai le maota o le malo, le EOB lea ua mae’a ona fausia i Ofu, ae o le aso 29 Tesema e tatala aloaia ai le galuega tele a le ASPA i Ofu, o le fa’aaogaina lea o le malosi o le la e maua mai ai le eletise mo le Luanu’u i Ofu ma Olosega/Sili.