Ads by Google Ads by Google

Fesiligia e le Fono mafua’aga ua fa’aletonu ai afi o le va’a fou a le malo


Le taimi na fa’atoa taunu’u mai ai i Amerika Samoa le va’a fou a le malo, le MV Manu’atele. [ata AF]
ausage@samoanews.com

O le vaiaso na te’a nei na lagalaga ai finagalo o afioga i Senatoa ma Faipule o le Fono Faitulafono, ina ua latou fesiligia le mafua’aga ua ala ai ona fa’aletonu afi o le va’a fou a le malo o le MV Manu’atele, ma mafua ai ona taofia femalagaaiga a le va’a mo se taimi le tumau.

 

I luma o le maota maualuga i le aso Faraile na te’a nei, na fesiligia ai e le afioga i le ali’i senatoa ia Tuaolo M. Fruean le mafua’aga ua taofia ai femalagaaiga a le va’a mo Manu’a, ma ia talosagaina ai le Taitaifono o le Komiti o Pulega o Uafu ma Malaeva’alele a le maota ina ia fa’atulaga se iloiloga e fesiligia ai le Fa’atonusili e uiga i lenei mataupu.

 

“O ituaiga mataupu taua ia ma aoga e tatau ona aumai i luma o le maota tatou te talanoa ma fesiligia, ae le o le aumaia fua o isi mau mataupu e le aoga ma taua”, o le saunoaga lea a Tuaolo.

 

“O lea ua ou fa’alogo ua taofia malaga a le MV Manu’atele mo Manu’a ona ua fa’aletonu le isi afi o le va’a, o lea e le’i i ai se taeao o le va’a fou a le malo ao lea ua leaga, ae faitau miliona ma miliona tupe na fa’atau mai ai, e sili ona aami le Fa’atonusili se’i oo mai iinei se’i fa’amalamalama mai i le Fono le mafua’aga o lenei fa’afitauli”, o le saunoaga lea a Tuaolo na lagolagoina e le peretene o le senate, le afioga i le Tama’ita’i o le Ao ia Gaoteote Palaie Tofau.

 

Saunoa Gaoteote e fa’apea, pau lava le auala e mafai ai ona malamalama le Fono i mataupu eseese o loo tutupu mai, o le aami o ta’ita’i o matagaluega e oo mai e fa’amanino tulaga o lo o i ai auaunaga a matagaluega eseese, e aofia ai ma le mataupu i le MV Manu’atele.

 

I luma o le maota o sui, na fesiligia ai fo’i e ni isi o afioga i Faipule le mataupu e fa’atatau i le tautua a le va’a fou a le malo, atoa ai ma tulaga fa’aletonu ua tula’i mai. O le fa’anaunauga o afioga i Faipule, e tatau ona fa’aeteete le malo i le tupu soo mai o le tulaga lea sa a’afia ai le MV Sili i le tele o tausaga ua mavae, o le fai lava ma leaga afi o le va’a, ina ne’i avea ma itu e fa’aletonu ai le va’a fou a le malo lea e lei atoa se tausaga talu ona fealua’i.

 

O se tulaga fa’aletonu i se tasi o afi o le va’a fou a le malo, na mafua ai ona faia le fautuaga a le Vaega o le Puipuiga o le Saogalemu a le malo tele i luga o le sami (US Coast Guard) ina ia taofia malaga a le va’a ae se’i fa’aleleia tulaga e pei ona tula’i mai ai le fa’aletonu.

 

I se fa’atalatalanoaga a le Samoa News ma le Ta’ita’i o le US Coast Guard i Amerika Samoa ia Joe Twiddy i le vaiaso na te’a nei, na ia fa’amaonia mai ai le tulaga fa’aletonu e pei ona a’afia ai le va’a, ina ua leaga le isi ona afi i lana malaga i Manu’a i le vaiaso na te’a nei.

 

Na faamaonia atili mai e Twiddy i le Samoa News e fa’apea, o lo o i ai le isi afi e lua i ai afi o le va’a, peita’i e le mafai e le afi e tasi ona tauaveina le mamafa o le galuega e moomia ai le malosi tau eletise i le tino atoa o le va’a, aemaise lava pe a alu i luga o le sami mo sana malaga.

 

O se tasi o mafua’aga na faia ai le faaiuga a le US Coast Guard ina ia taofi malaga a le va’a se’i taunu’u mai le isi afi, ina ne’i tula’i mai se fa’aletonu i luga o le sami i se tagata e leiloa pe tafea, ona le mafai lea e le afi e tasi ona fa’atinoina le galuega o le sailia o se tagata, ae mafai ona fa’atinoina ia galuega pe afai e lua afi o loo fa’aaoga.

 

Na taua e Twiddy lo latou galulue vavalalata pea ma le Pulega o Uafu ma Malaeva’alele i le taimi nei, i le fa’atinoina lea o auala uma e vave ai ona toe oo mai le afi o le va’a o loo oka ma mafai ai loa ona toe fa’aauau le tautua a le va’a mo Manu’a.

 

O le vaiaso nei lea ua fa’atulaga ai iloiloga a maota e lua a le Fono Faitulafono, e fesiligia ai le tulaga ua i ai le tautua a le MV Manu’atele mo Manu’a.

 

Na taua e ni isi o tagata o le itumalo latou lagona popole ina ne’i avea tulaga fa’aletonu i le afi o le va’a ma auala e umi ai se taimi o taofia malaga a le va’a mo le itumalo. Ui o lea, sa latou fa’afetaia le tautua a le va’a fou talu ona taunu’u mai i le amataga o le tausaga nei, lea ua mafai ai ona tali manaoga i Manu’a, e ala i le momoliina atu lea o uta mo soo se manaoga i le itumalo.