Ads by Google Ads by Google

Fesiligia Faipule atina’e ma pisinisi fausia nofoaga malae va’alele


Le afioga i le faipule ia Kitara Vaiau [ata AF]
ausage@samoanews.com

O le fesiligia ai e afioga i Faipule o atina’e fou ma pisinisi ua molimauina le amata fausia i le fanua o le malae va’alele a le malo i Tafuna, na latou faaaogaina ai le avanoa na feiloa’i ai ma le Faatonu o Uafu ma Malae Va’alele i le vaiaso nei e fesiligia ai le mafua’aga o nei atina’e, ae aisea fo’i ua manatu ai le Pulega o Malae Va’alele e fausia nei atina’e i le nofoaga e latalata i le malae va’alele.

 

Na fa’afetaia e le sui fofoga fetalai ia Fetu Fetui Jr atina’e ma suiga tetele ua molimauina i le malae va’alele fa’avaomalo a le atunu’u, peita’i o lona atugaluga o lo o i ai ua avea fale fou ia ua fausia i fanua o le malae va’alele ma itu ua pupuni ai ni isi o vaaiga matagofie i totonu o le atunu’u.

 

Na fa’amanino e Taimalelagi Dr. Claire Tuia-Poumele i le komiti e fa’apea, o le fale fou lea ua molimauina e le atunu’u le fausia i totonu o le fanua o le malae va’alele, o se tasi lea o pisinisi fou ua mae’a ona sainia sa latou lisi ma le pulega a le malae va’alele, ma ua taliaina fo’i e le Vaega a le Feterale (FAA) o loo pulea malae vaalele le lisi ma le kamupani lea.

 

E lei fa’ailoa e Taimalelagi le igoa o le kamupani, sei vagana ai lona fa’ailoa i afioga i faipule e fa’apea, o se tasi o fuafuaga mo fanua o le malae va’alele, o le fausia ai lea o atina’e ma pisinisi mo soo se pisinisi i le atunu’u.

 

Na fesiligia e ni isi o faipule le mafua’aga e ala ai ona fausia pisinisi ma atina’e i totonu o le fanua a le malae va’alele, ae le fausia i isi nofoaga o loo fa’atulaga e le malo e fausia ai pisinisi i totonu o le Industrial Park, peita’i na fa’amanino e le Tama’ita’i Fa’atonu e fa’apea, e le o lona Ofisa o loo tatalaina atu le avanoa, ae o le fa’atonuga mai le Ofisa a le FAA.

 

Na fa’auilavea le affoga i le ali’i faipule ia Kitara Vaiau ma ia saunoa e fa’apea, e leai se malosi o le FAA na te faia ai ni fa’aiuga e atagia mai ai le pulea o fanua o le malae va’alele a Amerika Samoa.

 

“E leai se malosi o le FAA latou te pulea ma faatoutonuina ai atina’e ma fuafuaga e fausia i le fanua o le malae va’alele, pau le vaega e gata ai la latou malosi o le vaega atoa lava o loo sese’e ai va’alele, ae o le fanua atoa e le au ai lo latou malosi e pei ona faamanino mai i le Tulafono Toe Teuteu a Amerika Samoa”, o le saunoaga lea a Kitara.

 

Saunoa atili Kitara e fa’apea, afai o le tulaga lea o le a fa’agaioi ai e le FAA lona malosi e pulea ai malae va’alele, lona uiga ua atagia mai ai le taumafai o le FAA e pulea ma fa’atonutonu mea uma tau malae va’alele i le atunu’u.

 

Na fa’amanino atili e Taimalelagi le taua tele o le sao o le FAA i le tau atina’eina o le malae va’alele a le atunu’u, e aofia ai ma le fa’amatu’uina mai o tupe e fesoasoani ai i le fa’aleleia o le malae va’alele, e pei o le vaega tupe e aveese ai tane suauu o loo i ai ae fa’aavanoa le malae va’alele mo le toe fausia o isi vasega ina ia fa’aleleia atili.

 

Na fa’afetaia e le to’atele o faipule le tautua a le matagaluega o Pulega o Uafu ma Malae Va’alele, i le fa’atinoina o tautua eseese mo le siitia o le tulaga o le tautuaina o le atunu’u.

 

O le fa’aiuga o le tausaga nei e pei ona saunoa Taimalelagi, ua faamoemoe e maea ai le fausiaina o le nofoaga fou lea ua faamoemoe e sii i ai tane suauu o loo i ai i le vaega e paka ai ta’avale i le malae va’alele.