Fesiligia Faipule malosi o le Komesina e fa’a a’upegaina ai Leoleo


Sui Fofoga Fetalai, afioga Fetui Fetu Jr. [ata AF]
ausage@samoanews.com

Ua fesiligia e le afioga i le Sui Fofoga Fetalai o le maota o sui le malosiaga lea ua mafua ai ona faia e le Komesina o Leoleo le fa’aiuga, e fa’aaupega ai ali’i ma tama’ita’i Leoleo i le taimi e fa’atino ai a latou tiute tauave.

 

I le taimi o folafolaga a le maota o sui ananafi, na tula’i ai le afioga a Fetui Fetu Jr ma ia fa’aleo lona atugaluga ua i ai, e mafua mai i ripoti ua salalau e fa’atatau i le aoga e fa’aaupega ai ali’i ma tama’ita’i leoleo ua mae’a, atoa ai ma le fuafuaga a le Komesina o Leoleo ina ia tauave e Leoleo a’upega i taimi e fa’atino ai a latou galuega, aemaise lava i le Vaega Faapitoa lea ua galulue e saili fualaau fa’asaina i le atunu’u.

 

Saunoa Fetui, o se tasi fo’i sa tautua i le galuega fa’a leoleo i tausaga ua mavae e fa’apea, na te le tete’e i le fuafuaga e fa’a a’upega Leoleo, pau le itu o lo o fia malamalama i ai lona sui, o le malosiaga ua faia ai e le Komesina lenei fa’aiuga, ae sa tatau ona tu’uina atu i le Fono mo se fa’atanaga.

 

“I lo’u lava taofi, e tatau ona i ai se finagalo o le Fono Faitulafono i le mataupu lenei, a o le i aloaia ma pasia, ina ia mautinoa o lo o puipui fo’i le Fono i le fa’atinoina o galuega a le Ofisa o Leoleo,” o le saunoaga lea a Fetui na lagolagoina e ni isi o afioga i Faipule.

 

Saunoa le afioga i le ali’i faipule ia Samuel Ioka Ale Meleisea e fa’aali lona finagalo e fa’atatau i lenei mataupu.

 

Saunoa Meleisea e fa’apea, na te le teena taumafaiga ina ia fa’aaupegaina ali’i ma tama’ita’i Leoleo, pau lona popolega, o le tulaga i le feavea’i lea e Leoleo o a’upega i le taimi e fa’atino ai a latou galuega i soo se taimi, ona e tatau ona i ai se puipuiga mo le atunu’u lautele.

 

Sa ia taua atili fo’i lona lagolagoina o taumafaiga a le Vaega Faapitoa a Leoleo ina ia saili ma pu’e fa’apagota i latou o lo o fa’aaogaina fualaau fa’asaina. Sa ia taua sona manatu o lo o i ai, pe tatau ona tuuina atu lenei mataupu e talanoaina e le Fono Faitulafono, ae foliga mai o lea ua fa’aaoga le poloaiga a le Kovana e fa’atino ai le fa’amoemoe o le Komesina ma le Ofisa o Leoleo.

 

Na toe fa’amanino e Fetui e faapea, o lo o i ai i le tulafono le malosi e fa’aaupega ai leoleo, ae se’i vagana o ni tulaga faapitoa e tutupu mai, ae le o taimi uma e pei ona aga’i i ai fuafuaga a le Komesina.

 

Na talosagaina e Gafatasi Afalava se iloiloga ma le Komesina o Leoleo, tofa Le’i S. Thompson tusa lava pe malolo le Fono, se’i fa’amanino ai le mataupu e pei ona atugalu i ai afioga i Faipule.

 

E ui na te le tete’e i fuafuaga ina ia fa’aaupega Leoleo, ae sa ia taua le tatau lea ona ona manino lelei le Fono Faitulafono i le tulaga tonu e tatau ona taoto i ai lenei mataupu.

 

Na faafetaia e le fofoga fetalai ia Savali Talavou Ale finagalo fa’aalia o afioga i Faipule, ina ia puipuia le saogalemu o tagatanu’u atoa ai ma Leoleo. I lona talitonuga, o se tulaga lelei le tatau lea ona valaauina se iloiloga, se’i fa’amanino ai e le Komesina lenei mataupu i luma o le maota o sui.

Comment Here