E to’atele afioga i Senatoa sa latou fesiligia sui o le Komiti Fa’afoe o le Puleaga o le Eletise ma le Suavai (ASPA) i le iloiloga sa faia i le vaiaso na te’a nei, i le mafua’aga e totogi ai e le to’atele o le atunu’u tupe mo auaunaga latou te le o mauaina.

O le iloiloga e fesiligia ai totino o le Komiti Fa’afoe a le ASPA, sa taitaia lea e le afioga i le ali’i senatoa ia Misaalefua J. Hudson, ma faia ai loa le fa’aiuga ina ia pasia uma sui e to’a 5 o le Komiti Fa’afoe ina ua mae’a le iloiloga a le Komiti sa fa’atinoina.

O finagalo fa’aalia mai ni isi o afioga i Senatoa sa fa’aleo i le taimi o le iloiloga, na manino mai ai le to’atele o le atunu’u o lo o fa’asea i le tele o tupe o lo o latou totogiina mo ni isi o auaunaga a le ASPA e pei o le suavai taumafa ma le lapisi, ae latou te le o mauaina lava ia auaunaga.

Mo se fa’ata’ita’iga e pei ona saunoa le afioga i le ali’i senatoa ia Magalei Logovi’i, e le o i ai se tautua o le ‘sewer line system’ i lona itumalo ae o lo o fa’aauau pea ona totogi e le to’atele o aiga e aofia ai ma lona aiga le pili mo le “underground water protection fee” i masina ta’itasi, ae o le pili lea e tatau ona totogi e tagata o loo latou fa’aaogaina le auaunaga o le ‘sewer line system’.

E o o fo’i i le tautua o le lapisi, o le tele o aiga e le o nofoia o latou fale e pei o faletalimalo ma fale’afa, sei vagana ai le uila o loo ola i fale nei, ae o lo o fa’aauau pea fo’i ona totogi e nei aiga le tupe mo le pili o le lapisi, ae leai lava ni lapisi o i ai, e le o afea fo’i e ni Loli lapisi nei aiga mo le pikiina o le lapisi.

“O le a se finagalo a la outou Komiti Fa’afoe e tusa ai o le mataupu lenei o loo fa’asea ma tu’u fesili ai le to’atele o lo’u itumalo, e talafeagai le totogi e le tagata o se pili i se auaunaga na te le o fa’aaogaina”, o le fesili lea a Magalei, ae na saunoa le Ta’ita’ifono o le Komiti Fa’afoe ia Fonoti Perelini e fa’apea, e i ai le talitonuga a le Komiti Fa’afoe atoa ai ma le Pulega a le ASPA o lo o talafeagai pea le totogi e tagata o pili e pei ona fesiligia, ona o lo o i ai fo’i isi auala o loo penefiti mai ai i latou i tautua a le ASPA.

Na fa’amanino atili e Fonoti i luma o le senate e fa’apea, o siitaga uma i totogi e pei ona fa’atinoina e le ASPA, e le mafai ona pasia ma aloaia suiga e aunoa ma le pasia atu e le Komiti Fa’afoe.

Saunoa atili le afioga a Magalei e fa’apea, e talitonu atoatoa lona taofi e le o talafeagai le auala o lo o fa’atinoina e le ASPA, o le latou fa’aee atu lea o ni pili e totogi e tagata e aunoa ma le ofoina atu o ni tautua mo ia tagata.

O afioga i ali’i senatoa ia Tuiagamoa Tavai, Paepae Faiai, Faamausili Mau Jr ma Levu Solaita sa latou fa’aleoina le mataupu lava lea e tasi i sui o le Komiti Fa’afoe a le ASPA, i le totogi e tagata o pili i ni tautua latou te le o mauaina.

Na fautuaina e Tuiagamoa le Komiti Fa’afoe ina ia toe silasila i lisi a le ASPA ma aiga o loo ofo atu a latou fanua e fausia ai pamuvai, ina ia mautinoa o loo talafeagai tupe o loo maua e aiga ma le tetele o fanua o loo fa’aaogaina.

Sa fautuaina e le afioga i le ali’i senatoa ia Paepae le Komiti Fa’afoe ina ia toe silasila i le nofoaga lea o loo lafoa’i ai le lapisi i Futiga, ina ia toe iloilo le fuafuaga lea ua leva ona taoto i le va o lona aiga e ana le fanua ma le ASPA, mo le suia lea o le fanua e si’itia i ai le lapisi, ona o lea ua toeititi lava tumu le fanua o lo o i ai le lapisi i le taimi nei.

Sa ia talosagaina fo’i ni moli i tafatafa o le auala mo lona itumalo i Alataua, ona o le tele o vaega o le itumalo e pogisa atoa i le po ona e leai ni moli.

O se tasi o itu na fesiligia e le afioga i le ali’i senatoa ia Fa’amausili, o tupe o loo totogi ai konekarate e 3 o loo aoina le lapisi i le taimi nei. Saunoa Fa’amausili e fa’apea, i lana suesuega sa faia ma maua ai, e laititi atu le tupe na fa’aalu e le ASPA i le taimi ao 8 konekarate sa latou aoina le lapisi i tausaga ua mavae, ao lea ua fa’aitiitia mai i le na o le 3 konekarate, ao lea ua matua tele le tupe ua alu ai, ae na saunoa Fonoti e fa’apea, o le ogatotonu o le tausaga nei e fa’amuta ai konekarate o loo i ai ma toe faia ai loa le isi tauofoga fou.

I le faa’iuga o le iloiloga, sa fa’afetaia ai e afioga i Senatoa sui o le Komiti Fa’afoe e tusa ai o galuega lelei o lo o fa’atinoina mo le atunu’u, pau le fautuaga sa tu’uina atu i ai, ia saili auala eseese e fa’ataugofie ai le tau o le eletise i le atunu’u.

E ta’i 15-0 le palota na pasia uma ai e le Senate suiga o Fonoti Perelini, Peter Crispin, Isabel Hudson, Daniel King ma Solip Hong, e toe fa’aauau ai la latou tautua i le Komiti Fa’afoe a le ASPA.

Ae mo le maota o sui, e 13-3 le palota na pasia ai e faipule le suafa o Fonoti, 14-1 le palota na pasia ai le suafa o Crispin, 15-1 le palota na pasia ai le suafa o Hudson ma King, ae 16-1 le palota na pasia ai le suafa o Hong.