Ads by Google Ads by Google

Fo’i fiafia to’atele o tagata faigaluega i aiga ina ua maua siaki o lafoga


Fa’atumulia le Ofisa autu o le malo i Utulei i le taeao ananafi, le EOB i le to’atele o le atunu’u na lolofi atu mo le pikiina o latou siaki o lafoga ua maua. [ata AF]
ausage@samoanews.com

E na o lagona o le fiafia ma foliga tausa’afia na molimauina e le Samoa News i le to’atele o tagata faigaluega o le atunu’u ananafi, ina ua o latou taulimaina siaki mai a latou lafoga ua silia i le 4 masina o fa’atalitali. E tusa ma le $2.4 miliona le aofa’i o le tupe na fa’amatu’u atu e le malo o Amerika Samoa i tagata totogi lafoga i le aso ananafi, mo i latou sa faila a latou lafoga mai le aso 2 e oo atu i le 17 Fepuari 2017

 

Na molimauina le fa’atumulia o le nofoaga autu o le Ofisa o le malo i Utulei, le EOB i le to’atele o tagata faigaluega na lolofi atu e piki a latou siaki o lafoga, i le mae’a ai lea ona latou maua o le fa’amaoniga mai le Ofisa o Tupe a le malo, o le taeao ananafi e piki ai siaki o latou lafoga.

 

O ulugali’i ma latou fanau sa molimauina le fa’atumulia ai o lalo o le Ofisa autu a le malo, e fa’atalitali ai le taimi e piki ai a latou siaki o lafoga ua maua.

 

O ni isi sa latou fa’aalia le tele o manaoga tau tupe i totonu o aiga e fa’aalu i ai le siaki o lafoga, ae o ni isi sa manatu e fa’aalu le tupe o le lafoga e tapena ai fanau mo le toe a’e i aoga i le masina fou.

 

“Fa’afetai i le Atua ina ua maua lenei tupe e fesoasoani ai i le aiga, e fa’afetai fo’i i le malo ina ua tafa lo latou finagalo e fa’amatu’u mai siaki o lafoga a tagata ua lata i le 5 masina o fa’atali, e ui lava i le laititi o lenei tupe, ae o le a fa’aaoga tatau i manaoga o le aiga”, o le saunoaga lea a le susuga ia Vincent Uili, o se ali’i e galue i le kamupani i’a o le Starkist Samoa, lea na i ai uma ma lona faletua ma nai o la alo e to’a 3 i le pikiina o le la siaki ma lona faletua sa faila fa’atasi le la lafoga.

 

Ae mo le Tina ia Tamara Uatisone, o lana siaki o le lafoga lea ua fa’amoemoe e totogi ai pasese o lana fanau e malaga ai i Samoa mo le tu’uaga o aoga.

 

“Ua leva ona fia ave si a’u fanau e tuua i o’u matua i Apia, ae o le avanoa lelei la lenei e fa’ataunu’u ai loa le la malaga, aua o lea ua maua le tupe e totogi ai a la pasese”, o le saunoaga lea a Uatisone.

 

E ui e le tetele ni siaki na maua e ni isi o tagata faigaluega a le atunu’u, ae sa latou fa’aalia i le Samoa News le agaga fa’afetai ina ua mafai ona maua lenei tupe e fesoasoani ai i le taliina o manaoga o le aiga.

 

Na taua e ni isi o i latou lo latou fa’anaunauga o lo o i ai, ina ia tafa le finagalo o le malo ae sui le tulafono o lafoga, ina ia mafai ai ona feololo se vaega tupe latou te maua pe a toe faila a latou lafoga i le lumana’i.

 

Ae pei ona fa’aalia e le afioga i le ali’i kovana ia Lolo Matalasi Moliga ma lana faigamalo, i fa’amaumauga ua tu’uina atu i luma o le Fono Faitulafono a le atunu’u, o se tasi o pili ua fuafua le malo e fa’aulu i luma o le Fono i lana tauaofiaga lea ua nofoia nei, o le pili e faia ai suiga i le tulafono o lafoga o loo i ai, ina ia mafai ai ona si’itia le aofa’i o fa’amanuiaga tau tupe e maua tagata o le atunu’u.

 

O le taimi nei e pei ona taua e le malo i lana folasaga ua mae’a ona taoto i luma o le Fono, o lo o fa’aaoga e le malo le lisi o lafoga faila o le tausaga 2000 (2000 Tax Table), peita’i o le suiga ua fuafua e faia i le tausaga fou 2018 pe afai ae pasia e le Fono Faitulafono la latou tulafono taufa’aofi, o le a fa’aaoga ai e le malo le lisi o lafoga faila o le 2004 (2004 Tax Table), ma fa’aauau atu ai lava seia oo atu i le tausaga e 2022, ae fetaui loa fo’i ma le fa’aaoga o le lisi o lafoga faila o le 2022 (2022 Tax Table).

 

E leai se tupe maua a le malo e maua mai i le suiga o le lisi o lafoga faila, ae o le a maualuga se vaega tupe e le mafai e le malo ona toe maua mai, lea e amata atu lava i le $400,000 mai le ulua’i tausaga e faia ai lenei suiga seia oo atu lava i le $4 miliona i le tausaga e 2022.

 

Ae ui i le tele o lenei vaega tupe o le a le toe maua e le malo mai tulaga o lafoga faila mai tagata faigaluega, ona o le suiga ua fuafua e faia, ae talitonu le afioga i le ali’i Kovana ia Lolo, o se tasi lenei o itu taua e tatau i le malo ona fai, o le saili lea o tulafono e manuia ai tagata lautele i tulaga o fa’amanuiaga tau tupe, ona o lea fo’i ua finau le malo e si’i lafoga i ni isi o oloa ma uta mai fafo.