Foia fa’afitauli na tula’i mai tuai ona maua siaki tagata faigaluega malo


[ata: SN]
ausage@samoanews.com

E ui o lo o i ai pea se vaega laititi o tagata faigaluega a le malo e le o maua a latou siaki i taimi ma aso e totogi ai le malo, peita’i o le tulaga fiafia e pei ona fa’aalia e le Fa’atonusili o le Matagaluega o Tagata Faigaluega a le malo, ua fa’aitiitia le tulaga to’atele sa a’afia, ma ua maitauina le aga’i ina foia atu lea fa’afitauli.

 

O lenei mataupu na talanoaina i le fonotaga a le Kapeneta i le fa’aiuga o le masina na te’a nei, lea na fa’amaonia ai e le tama’ita’i Fa’atonusili ia Eseneiaso Liu le tele o piriota totogi a le malo o tula’i mai pea lenei fa’afitauli.

 

O le piriota totogi lea fa’atoa mae’a atu nei, ua maitauina ai le foia o lenei fa’afitauli, ona e to’alaititi lava se vaega na tuai ona maua a latou siaki.

 

Na taua e le Tama’ita’i Fa’atonusili e fa’apea, mai le tele o piriota totogi a le malo ua mavae atu, e silia i le ta’i 400 le aofa’i o tagata faigaluega a le malo e le maua a latou siaki i le taimi e totogi ai le malo.

 

E mafua lea tulaga e pei ona saunoa Liu i luma o le Kapeneta, e le o fa’autagia e Fa’atonusili o le tele o Matagaluega a le malo le fautuaga o lo o tu’uina atu, ina ia vave tuuina atu taimi faigaluega o tagata i le aso ma le taimi tonu e fa’amuta ai, ina ia fa’a faigofie ai la latou galuega.

 

Mo se fa’ata’ita’iga e pei ona saunoa Liu, o ni isi o Ofisa a le malo, e tu’uina atu taimi faigaluega ae leai ni fa’amaumauga e lagolago ma fa’amaonia ai taimi ua tuuina atu. E le mafai e lona Ofisa ona totogi se tagata faigaluega e aunoa ma le fa’amaonia atu o ona taimi faigaluega o lo o tu’uina atu i fa’amaumauga a le Ofisa.

 

O le isi fa’afitauli o tagata o lo o galulue i konekarate, e tuai ona fa’ailoa atu e le Fa’atonusili le taimi e fa’amuta ai le konekarate a le tagata, ina ia fuafua i ai le fa’agaioiina o lona totogi fa’ai’u.

 

O se tasi o fa’afitauli tuga e pei ona maitauina, e le o iloa e tagata o lo o gafa ma le fa’atulagaina o totogi ma taimi faigaluega a Matagaluega ta’itasi, aofa’i o tupe a latou Matagaluega o loo i totonu o teugatupe eseese, ona oo lea i le taimi e fa’agasolo ai le totogiina o tagata, ae emo ane e le o i ai se tupe i totonu o le teugatupe lea, aemaise lava pe afai o se teugatupe mo tupe mai le feterale, ona fa’aletonu ai loa lea o le totogiina o le tagata faigaluega, ma mafua ai ona le maua lona totogi i le taimi e totogi ai le malo.

 

O le afioga i le Kovana ia Lolo Matalasi Moliga ma le Pulesili o le Pulega o le Eletise ma le Suavai (ASPA) ia Utu Abe Malae, o i laua ia na maua le avanoa e fa’asoa ai o la finagalo e uiga i lenei mataupu.

 

Saunoa le ali’i Kovana e fa’apea, e le o se tulaga lelei le uma ona fa’atino e le tagata faigaluega o lana tautua i le malo, ae o o atu i le aso e maua ai lona totogi ua leai se mea e maua.

 

“O tagata faigaluega uma lava a le malo, o i latou ia o loo fa’alagolago i ai le manuia o latou aiga, o ni isi o aiga e na o le to’atasi lava le tagata o lo o faigaluega, ae a oo la i le taimi e fa’aletonu ai ma le maua le totogi a le tagata, o le a a’afia uma atu ai ma le aiga, le maua ai ma se meaai mo fanau. E tatau ia te outou Fa’atonusili ona mata’ala ina ia aua ne’i toe tula’i mai fa’afitauli fa’apenei i le lumana’i,” o le saunoaga lea a le ali’i Kovana.

 

Ae na saunoa Utu e fa’apea, o le isi itu o lo o mafua ai ona tutupu fa’afitauli fa’apenei, e le o lava le malamalama o tagata faigaluega i le fa’atinoina o a latou galuega, aemaise lava i tulaga o fa’amaumauga ma itu tau teugatupe.

 

Na fa’aigoa e Utu mea sese o lo o tutupu, “o mea laiti o le olaga”, ae foliga mai o lo o fa’atamala ai le to’atele o tagata faigaluega a le malo, ma i’u ina a’afia ai ni isi o tagata faigaluega.

Comment Here