Ads by Google Ads by Google

Fuafua auala e fa’aleleia atili ai faiga faiva i va’a fagota alia i Aunu’u


Le afioga i le ali’i faipule mai le itumalo o Saole e aofia ai le motu o Aunu’u ia Kitara Vaiau. [ata AF]
ausage@samoanews.com

O le fausia o se fale aisa e teu i ai i’a e maua mai i fagotaga a le au faifaiva o lo o fa’aaogaina va’a fagota alia i Aunu’u, o se tasi lea o auala ua fuafua le Matagaluega o le Puipuiga o le Gataifale ma le Vaomatua a le atunu’u (DMWR) e fausia, ina ia fa’aleleia atili ai tulaga o faiga faiva i totonu o le motu.

 

I se vaega o le ripoti mai le DMWR lea ua fuafua e folasia i luma o le Fonotaga lona 169 a le Komiti o Faiga Faiva i atumotu o le Pasefika, lea e usuia i Hawaii i le aso Lulu o le vaiaso fou, 22 Matai 2017, o lo o aofia ai fuafuaga a le Matagaluega mo le fausiaina lea o se fale aisa mo le motu o Aunu’u.

 

O lo o taua i lea ripoti e faapea, i le fonotaga lona 164 a le Komiti sa usuia mai i Amerika Samoa i le masina o Oketopa 2015, na maua ai le avanoa o sui o le Komiti latou te asia ai le motu o Aunu’u, ma latou molimauina ai loa le manaoga e pei ona taua, i le mae’a ai lea o se talanoaga sa faia ma ni isi o fa’auluuluga o le motu e tusa ai o le atina’e tau faiga faiva mo aiga o le motu.

 

E pei ona silafia e le Komiti, e tele naua ituaiga i’a o loo ta’atele i tuaau e maua i ogasami o Aunu’u, ma o iina tonu lea e fa’alagolago i ai le to’atele o aiga mo tupe maua atoa ai ma le tausiga o aiga, o le fa’atinoina lea o faiga faiva ef a’aaoga ai va’a alia, ma ua taoto fo’i e fuafuaga a le motu o Aunu’u, mo le fausia lea o se Asosi a le aufai faiva i va’a fagota alia, ina ia mafai ai ona saili ni auala e fa’aleleia ai lenei atina’e mo i latou.

 

O le isi la auala lea ua manatu ai le Komiti mai lana fonotaga sa usuia i le 2015, o le a mafai ona fesoasoani mai i le fa’atutuina o ni atina’e mo Aunu’u, e ala i le fausiaina lea o se fale aisa e fesoasoani ai i le aufai faiva mo le teuina lelei lea o a latou i’a e maua mai i faiga faiva, ae o se avanoa lelei fo’i lea e ofo mai ai ma ni isi fesoasoani mo le atina’eina o faiga faiva i Amerika Samoa.

 

O le fale aisa e pei ona finagalo malie i ai le Komiti i lana fonotaga ua mavae, o le a fausia lea i tafatafa o le vaega o le uafu o loo taunu’u atu i ai va’a i Aunu’u, ma o le a pulea ma vaaia lelei lea fale aisa e le pulega a ali’i ma faipule o le afioaga, e ala lea i le sainia lelei o se maliliega i le va o le Komiti ma sui o le afioaga.

 

Sa i ai fo’i se fale aisa sa fa’atupe ai e le Komiti se falei’a mo le aufai faiva i Fagatogo, e aofia ai fo’i ma le fausia o le fale aisa mo Manu’a, aemaise ai o le fa’atauina o kesi mo va’a fagota, ona o le naunau lava ina ia fa’aleleia le atina’e o va’a fagota alia i le atunu’u.

 

O se tasi o itu ua maitauina ai tulaga manuia o nei fuafuaga, o le galulue fa’atasi lea o le afioga i le ali’i Faipule fou mai le itumalo o Saole lea e aofia ai ma Aunu’u, le afioga a Kitara Vaiau ma le Matagaluega, ina ia mautinoa e taunu’u ma le manuia lenei fa’amoemoe.

 

O le afioga a Vaiau, o ia fo’i o se tagata fai faiva alia, lea fo’i ua fa’aalia lona agaga fiafia ina ua mafai ona tatala mai lenei faitoto’a e fesoasoani ai i atina’e mo tagata o loo nonofo i Aunu’u, ma o ia fo’i o se tasi o totino tuai o le Komiti Fa’afoe mo faiga faiva a Amerika Samoa, ua lava lona silafia i auala e fa’aleleia ai atina’e fa’apenei i le atunu’u.