Ua i ai se fuafuaga a le malo ina ia fa’amalosia fanau aoga e fa’au’u mai i Aoga Maualuluga i le atunu’u, ina ia fa’aaoga a latou avanoa sikolasipi e aooga ai i le Kolisi Tu’ufa’atasi i Amerika Samoa (ASCC) mo le ulua’i 2 tausaga, ona fa’atoa malaga atu ai loa lea i aooga i Iunivesite ma Kolisi i fafo mo le fa’amae’aina ai o le isi 2 tausaga o le latou fa’ailoga BA.

Na taua e le afioga i le ali’i kovana ia Lolo Matalasi Moliga i le fonotaga a le Kapeneta i le 2 vaiaso na te’a nei e fa’apea, o le taua o lea fuafuaga e pei ona taumafai mai i ai le faigamalo, ina ia mafai ai ona sasa’a uma tupe o lo o totogi i aoaoga a fanau aoga i totonu o le Kolisi Tu’ufa’atasi a le malo, ina ia atina’e ma fa’aleleia atili ai le manaoga tau tupe o lo o tula’i mai i totonu o le Kolisi.

“O le isi itu taua o le una’i o fanau e fa’au’u mai i aoga maualuluga e aooga muamua i le Kolisi mo le ulua’i 2 tausaga, e le gata e fa’amasani ai i latou i le olaga aoga i Kolisi ma Iunivesite, ae taua fo’i le ulufale atu i le isi la’asaga tau aoaoga ae o loo maua pea le avanoa e mafuta ai ma matua ma aiga, ina ia toto ai le fatu fa’a Samoa moni e tatau ona maua e le tama ma teine aoga Samoa”, o le saunoaga lea a Lolo ina ua mae’a le folasaga a le Peresetene o le Kolisi Tu’ufaatasi i luma o le Kapeneta e fa’amanino ai ni isi o fuafuaga mo le amata ai o aoga a le fanau i le amataga o le masina lenei.

I le talanoaina ai o le itu tau tupe o lo o mana’omia e le Kolisi Tu’ufa’atasi mo le fa’aleleia atili o lana auaunaga mo fanau aoga, na taua ai e le latou peresetene ia Dr. Rosevonne Pato i luma o le Kapeneta i le 2 vaiaso talu ai, le mae’a lea ona faia o ni fonotaga a le pulega o le Kolisi ma ni isi o tagatanu’u ma pisinisi, mo le tau sailiiliina lea o ni auala e fa’aleleia ai auauna ma tautua a le Kolisi i le atunu’u.

Sa ia talosagaina fo’i matua ina ia fa’amalosia fanau e o atu i le Kolisi, e le gata e maua ai tupe mo i latou ae atina’e ai fo’i le tomai i mataupu eseese o lo o a’oa’oina i le Kolisi.

I tulaga o lu’itau o lo o fetaia’i ma fanau aoga i le taimi nei i le fa’aletonu o fa’aiuga o a lataou suega, na taua ai e le ali’i kovana lona fautuaina o le Komiti o Sikolasipi faapea ai ma le Faatonusili o Aoga a le malo ma lana pulega, ina ia silasila toto’a i auala e fa’aleleia ai lea fa’afitauli, ina ia mafai ai ona si’itia le maualuga o le tulaga e i ai aoaoga mo fanau aoga.

Na taua e se sui o le Komiti o Sikolasipi i le Samoa News i le vaiaso na te’a nei, le mae’a lea ona tauao e le latou Komiti o se fautauga mai le ali’i kovana, ina ia fa’aitiitia tupe mo sikolasipi a fanau mo aoga i fafo, ae fa’amalosia i latou e aooga muamua i le Kolisi Tu’ufa’atasi a le atunu’u.

I le taimi na fesiligia ai e le Senate sui o le Komiti o Sikolasipi i se taimi e lei mamao atu, na fesiligia ai e afioga i Senatoa sui o lea Komiti i se auala e mafai ai ona fausia se tulafono e fa’amalosia ai fanau aoga e fa’au’u mai i aoga maualuluga i le atunu’u, e aooga muamua i le Kolisi Tu’ufa’atasi ona fa’atoa malaga atu ai loa lea i fafo e fa’aauau ai a latou aoaoga.

I ni ripoti mai le Ofisa o Aoga i tausaga ua mavae sa mafai ona fa’asoa atu i luma o le Fono Faitulafono, sa taua ai le tulaga lea e fa’apea, o se tasi o fa’afitauli e fetaia’i ma fanau aoga mai Amerika Samoa e fa’au’u sa’o mai lava i aoga maualuga ma aga’i atu loa i fafo e aooga ai, o le le mae’a lea o le aoga pe vave fo’i ona toe fia fo’i mai i le aiga, ona e le i lava se taimi e fa’amasani i latou i le olaga aoga i totonu o Kolisi ma Iunivesite i fafo, ae afai e aoga i le Kolisi Tu’ufa’atasi mo le 2 tausaga, o le a fesoasoani malosi lea tulaga ia latou tapenaga o aoaoga i fafo.