Ads by Google Ads by Google

Lagolago Faipule Tama’ita’i pili taualoa ai tautua Vaega Tausima’i


Faipule Tama’ita’i e to’alua, Vui Florence Saulo ma Atalina Asifoa. [ata AF]
ausage@samoanews.com

E ui e lei taliaina e le maota o sui le pili lea na fa’aulufale e le afioga i le Tama’ita’i Faipule ia Atalina Asifoa i le vaiaso na te’a nei, e fa’avae ai le tulafono mo le Vaega o Tausima’i i Amerika Samoa, peita’i na taua e Tama’ita’i Faipule e to’alua i totonu o le maota o sui ia Asifoa ma Vui Florence Saulo lo la matua lagolagoina o lenei tulafono, e fa’atulaga ai tulafono ma ta’iala e aloaia ai le tautua a Vaega Tausima’i i le atunu’u.

 

O le agaga atoa o le tulafono, ia fa’atulafono ta’iala e aiaia ai le fa’afoeina o galuega a le Vaega Tausima’i lea e aofia ai le Soifua Maloloina, aiaia ai le tofiaina o se Komiti Faafoe, ma fa’amanino ai malosiaga ma tiute a le Komiti Fa’afoe, e aofia ai le laiseneina o le Vaega Tausima’i, ma fa’atulaga ai loa tulafono e lima ta’ita’iina ai galuega fa’atino a le Vaega Tausima’i.

 

Mo le Komiti Fa’afoe, e to’a 7 totino o le Komiti Fa’afoe e tatau ona i ai, o i latou fo’i ia e tofia mai e le afioga i le ali’i Kovana, lea e tatau ona aofia ai Tausima’i ua mae’a ona laisene ma lesitala e to’a 5, ae o isi totino e to’alua e tofia mai i le atunu’u lautele.

 

O loo taua i le tulafono isi galuega fa’atino a le Komiti Fa’afoe, lea e aofia ai le tu’uina atu o laisene i le Vaega Tausima’i, fa’atulaga totogi talafeagai mo i latou, ma iloilo tulaga o laisene e tu’uina atu i le Vaega Tausima’i ina ia mautinoa o lo o sa’o ma talafeagai.

 

O le aso Faraile na te’a nei na fa’aulufale ai i luma o le maota o sui le tulafono 34-37, e fa’avai ai le Mataupu 09 i lalo o le Ulutala 31 o le Tulafono Toe Teuteuina a Amerika Samoa, mo le fa’alauiloaina o galuega fa’atino a le Vaega Tausima’i i Amerika Samoa.

 

Ae talu ai le fa’aulu o lenei tulafono ae ua tuana’i le taimi fa’atulafonoina i lalo o tulafono a le maota o sui e tatau ona fa’aulu ai se pili i luma o le maota, o le mafua’aga lea na taliaina ai le fautuaga sa fa’atula’i e le afioga i le ali’i faipule ia Vaetasi Tuumolimoli Saena Moliga, ina ia taoto le tulafono lenei se’i toe fa’aulufale mai i le nofoaiga lona 35 i le tausaga fou.

 

Na finau malosi le tama’ita’i faipule ia Asifoa mo se avanoa e talanoaina ai e le maota le tulafono sa ia fa’aulufaleina, ona o le taua ma le aoga mo le Vaega Tausima’i, peita’i na saunoa le sui fofoga Fetalai o le maota ia Fetu Fetui Jr e talia le fautuaga a Vaetasi.

 

Saunoa Asifoa e fa’apea, o le tuai o galuega a Loia sa taoto atu i ai le tusiaina o le tulafono taua lenei, o le mafua’aga lena o le tuai ona taunu’u ane o le tulafono i luma o le maota.

 

Na tula’i le afioga i le faipule ia Vui ma ia lagolagoina le saunoaga a Asifoa, e fa’atatau i le taua tele o lenei tulafono mo le Vaega Tausima’i i le atunu’u, atoa ai fo’i ma le le lava o Loia a le Fono Faitulafono latou te fa’atinoina galuega mo afioga i Faipule.

 

Saunoa Vui e fa’apea, e i ai fo’i le pili sa ia taloasgaina ai se tasi o Loia a le Fono Faitulafono mo le tusiaina ma fa’atulaga, e talosagaina ai ni sui fa’aopoopo mo le Itumalo o Tuala-uta i totonu o le Fono, e aofia ai nofoa fa’aopoopo e 2 mo le Senate fa’apea ai ma nofoa fa’aopoopo e 2 mo le Maota o Sui, peita’i e o o mai lava i le taimi nei e lei tino mai lea tulafono taua.

 

Ina ua fesiligia e le Samoa News ni isi o Ta’ita’i Sinia o le Vaega Tausima’i i Amerika Samoa e uiga i lenei tulafono, sa latou fa’afetaia ai le afioga i le Tama’ita’i Faipule ia Asifoa e tusa ai o lona taulagalaga i galuega lelei e fa’aleleia atili ai le tautua a le Vaega Tausima’i i le atunu’u, atoa ai ma le latou tatalo ina ia pasia lenei tulafono e afai ae toe fa’aulufale i luma o le Fono Faitulafono i le tausaga fou.