Le faamaonia moliaga fa’asaga i se ali’i Faiaoga

ausage@samoanews.com

E le i atoa se 30 minute na iloilo ai e le Vaega Iloilo Iuga le fa’aiuga o le mataupu na tu’uaia ai se ali’i sa avea ma faiaoga, ae tuuina mai loa le latou fa’aiuga, e le nofosala o ia i moliaga e 2 na tu’uaia ai o ia e le malo.

 

O le mae’a ai o aso e 3 o fa’agasolo le fa’amasinoga autu a le susuga a Tony Leatualevao i luma o le Fa’amasinoga Maualuga i le vaiaso na te’a nei, na tu’uina mai ai loa le fa’aiuga a le vaega iloilo iuga, e le fa’amaonia moliaga sa molia ai o ia e le malo, le moliaga mamafa o le faia o sauaga fa’asaga i fanau laiti, atoa ai ma le moliaga mama o lona faia o se gaioiga e ono lamatia ai le saogalemu o se tamaititi.

 

O le mataupu na tu’uaia ai e le malo ia Leatualevao, na alia’e mai i le aso 3 Novema 2016, a o avea ai o ia ma faiaoga i le aoga tulaga muamua a Coleman Elementary i Pago Pago. Na tu’uaia e le malo le ali’i sa avea ma faiaoga i lona fa’aaogaina o se tama’i foe alova’a laupapa e sasa ai le nofoi o le tamaititi e 11 tausaga le matua na a’afia, ma unaoa uma ai.

 

O le ali’i loia ia Robert Morris na tula’i mo le malo, ae o le ali’i loia ia Douglas Fiaui na tula’i mo Leatualevao.

 

E to’afa molimau na valaauina e le malo i le taimi o le fa’amasinoga, lea e aofia ai le ali’i aoga na a’afia ma lona Tina, fa’apea ai le Puleaoga o le aoga a Coleman i Pago Pago, ma le Leoleo sa autu i ai le suesueina o lenei mataupu.

 

E to’atolu molimau na valaauina e le itu tete’e, lea e aofia ai faiaoga e to’alua mai le aoga a Coleman, atoa ai ma le ali’i sa molia, le susuga ia Leatualevao.

 

I mau sa tuuina atu e le malo i luma o le fa’amasinoga ma le vaega iloilo iuga, na taula’i ai la latou fa’afinauga i le tulaga lea, o le gaioiga sa faia e le ua molia e ala i lona sasa o le tamaititi i se laupapa, o se gaioiga ua le tusa ma le tulafono.

 

Sa latou finau fo’i e fa’apea, na avea le gaioiga a le ai’i faiaoga ma itu na tau a’afia ai le soifua maloloina o le tamaititi na a’afia, lea na le mafai ai ona saili mo le 3 vaiaso, atoa ai ma le silia o aso e 3 e le o mafai ona nofo i le tiga o lona nofoi.

 

Ae o molimau sa tuuina atu e le itu tete’e, na autu lea i le mafua’aga na ala ai ona sasa e le faiaoga le ali’i na a’afia, e mafua mai i le ulavale i totonu o le aoga. Na taua e le itu tete’e le fai soo o le amio a lenei ali’i laititi, o le fiafia e fufusu ma isi tamaiti aoga, e amata mai lava i tamaiti laiti seia oo i tamaiti aoga o lo o i le vasega matutua.

 

E fa’atolu ona ave le ali’i aoga na a’afia i le Ofisa, ona o le amio o le fusu soo, taua’i misa ma isi tamaiti, taufa’alili pe taumafai fo’i e fai ni uiga e a’afia ai isi tamaiti aoga. O nei uiga uma e pei ona taua e le itu tete’e, sa taumafai malosi ai le ali’i faiaoga e a’oa’o ma fa’atonu le ali’i aoga, ina ia aoaoina e ia se lesona aoga mai mea sese o lo o ia fiafia e fai soo.

 

Na finau le loia a le ali’i faiaoga e fa’apea, e tasi le mafua’aga na ala ai ona sasa e le faiaoga le ali’i na a’afia, ona o lona alofa ina ia aoaoina e lea ali’i aoga se mea aoga i lona olaga, ma ia avea ai o ia ma tagata lelei i le lumana’i.

 

I le mae’a ai ona iloilo e tama’ita’i iloilo iuga e to’a 6 o mau fa’amaonia uma sa tuuina atu e itu e lua e uiga i lenei mataupu, sa latou fa’aiuina ai loa ma lagolagoina le mau a le itu a le ali’i faiaoga, e ala i le fa’aiuga e le nofosala o ia i tu’aiga a le malo.

 

Na taua e Leatualevao i le Samoa News lona agaga fa’afetai i le Atua, ona o le mautinoaga sa tuuina atu i tama’ita’i iloilo iuga, lea ua mafua ai ona latou tuuina mai le fa’aiuga fiafia mo ia ma lana mataupu. Sa ia fa’afetaia fo’i ona aiga uma, uo ma paaga i lo latou lagolagoina o ia, atoa ai ma le nonofo tatalo a o fa’agasolo mai lana mataupu talu mai le tausaga ua mavae.

Comment Here