Ads by Google Ads by Google

Leai ni mataupu a le Fono ina ua toe tatala lana tauaofiaga


[ata: archive]
ausage@samoanews.com

Na filemu maota e lua a le Fono Faitulafono e aunoa ma ni mataupu sa mafai ona talanoaina, ina ua toe tauaofia ana galuega masani i le taeao ananafi, i le mae’a ai lea o lana malologa e 3 vaiaso sa alo atu i ai.

 

O le afioga i le sui peresetene o le Senate ia Nuanuaolefeagaiga S. Nua na ta’ita’ia le tauaofiaga a le maota maualuga, ina ua le mafai ona fa’atasi mai le peresetene o le Senate ia Gaoteote Palaie Tofau, ona o lo o i ai o ia i Amerika mo toe sauniga o le afioga i le sa avea ma Faipule a Amerika Samoa i le Konekeresi a le malo tele, le tofa a Faleomavaega Eni Hunkin, ae mo le maota o sui, o le afioga i le fofoga fetalai ia Savali Talavou Ale sa taitaia galuega a le maota.

 

I le taimi o folafolaga a le maota o sui, na tula’i ai le afioga i le tama’ita’i faipule mai le itumalo o Tualauta, afioga Vui Florence Saulo ma fa’ailoa i luma o le maota se tala fiafia, i le mae’a lea ona tu’ufa’atasia le afioga i le Fofoga Fetalai ia Savali ma lona faletua fou, i le Sakalameta o le fa’aipoipoga, ma fa’ai’u ai loa galuega a le maota o sui i se latou taumafataga mo le aoauli sa faia i le fale’aiga a le Paradise Pizza i Pago Pago.

 

E ui sa alo atu le fono mo lana malologa e 3 vaiaso, ae na fa’afetaia e ta’ita’i o maota e lua galuega sa fa’atinoina e afioga i senatoa ma faipule i le taimi o le malologa, lea e aofia ai le fonotaga a le Litaea sa usuia i Hawaii i le lua vaiaso talu ai, lea na malaga atu i ai komiti o le Litaea a maota e lua.

 

Na taua e ni isi o afioga i Faipule tulaga manuia sa i ai le fonotaga a le litaea i Hawaii, lea e aofia ai ma le tulaga manuia o loo i ai teugatupe a Amerika Samoa i maketi o loo inivesi ai tupe a le litaea i fafo, ma fa’atusatusa ai le teugatupe o le litaea a le malo, o le teugatupe pito sili lea ona tulaga lelei mai litaea a teritori a le malo tele i le Pasefika.

 

A o aga’i atu ai galuega a le Fono mo le fa’amae’aina o ana fono o loo totoe mo lana ulua’i tauaofiaga lea ua toe amataina nei, sa fautuaina ai e Savali afioga i ta’ita’i komiti ina ia fa’agasolo mai i totonu ni isi o galuega e tatau ona fa’atinoina mo le faia i ai o fa’aiuga a le maota.

 

Na taua e le afioga i le ali’i faipule Vesi Talalelei Fautanu Jr tulaga manuia sa i ai la latou fonotaga ma ta’ita’i o le Falema’i o le LBJ a le atunu’u i le vaiaso na te’a nei, ina ua latou talanoaina le tele o mataupu taua o loo moomia le toe fa’aleleia i le totonu o le pulega a le falema’i.

 

E ui o lea fo’i ua toe fo’i lava le falema’i i Fagaalu i le tulaga tuai sa i ai, e pei o le le lava o foma’i atoa ai ma tulaga fa’aletonu i tupe o lo o fa’atino ai galuega a le falema’i.

 

A o fa’agasolo ai galuega a le Fono mo aso fono o loo totoe i lana ulua’i tauaofiaga lenei, ua sauni ai le maota o sui e toe fa’aauau la latou iloiloga ma sui o le Asosi o Tausima’i, mo le fa’amautuina o tuutuuga o le pili lea ua i luma o le maota o sui, e fa’avae aloaia ai le Asosi o Tausima’i i Amerika Samoa.