O le pepa o fa’amatalaga lea na tu’uina mai e le Matagaluega o le Puipuiga o le Saogalemu Fa’alotoifale a Amerika Samoa (TEMCO) i le itula e 5:00 i le vaveao o le aso To’ona’i na te’a nei, na mafai ai ona fa’anofo filemu lagona atuatuvale ma le popole o se vaega to’atele o le atunu’u ma fa’amaonia mai ai, e leai se fa’alavelave na tula’i mai i Manu’a e pei ona taua i ripoti sa salalau solo i upega o tafa’ilagi i le vaveao ananafi.

Na taua i le ripoti sa tu’uina mai i le Ofisa o le TEMCO le leai o se fa’alavelave na tula’i mai i Manu’a, leai se fana sa fa’apaina, e leai fo’i se tasi na manu’a i se fa’alavelave. O le atoaga lenei o lea ripoti mai le ofisa o le TEMCO.

“O se fa’aaliga taua fa’apitoa lenei mai le Matagaluega o le Puipuiga o le Saogalemu Faalotoifale, auina atu i le itula e 5:00 i le taeao nei, le aso To’ona’i, aso 22 Aperila 2017. Talu ai ona o telefoni mai ni isi o le atunu’u e fesiligia ai se fa’alavelave le mautinoa ua lipotia mai i Ta’u Mau’a. O se fa’amatalaga ua maua e fa’apea, o se faiga faiva a ni isi lava o Ta’u Manu’a sa vaaia ai se tulaga e le o fa’amaonia i le gataifale. O lea tulaga ua mafua ai ni fa’amatalaga eseese ma le sese. E fautuaina le mamalu o le atunu’u ina ia aua ne’i fa’apopoleina, o le fa’alavelave le matuainoa sa lipotia mai ua fa’ailoa atu i le Ofisa e gafa ma le gataifale (Coast Guard), fa’apea ai ma le Ofisa o Leoleo. E leai se fana sa fa’apaina, e leai se tasi o afaina, ma o loo saogalemu uma tulaga i Ta’u Manu’a. O loo vaavaaia pea ma o le a toe auina atu nisi fautuaga mai le Ofisa o le ASDHS-TEMCO pe afai e i ai nisi fa’amatalaga fou”.

O le vaveao lava fo’i lea o le aso To’ona’i na maua ai e le Samoa News le tele o telefoni mai ni isi o le mamalu o le atunu’u, i lo latou fesiligia lea o se tulaga sa’o e tusa ai o le fa’alavelave e pei ona taua sa tula’i mai i Manu’a, ma fesiligia ai loa e le Samoa News e faamaoniga mai le Ofisa o Leoleo atoa ai ma le Ofisa o le Puipuiga o le Saogalemu Fa’alotoifale.

Na taua e se sui sinia o le Ofisa o le Puipuiga o le Saogalemu Fa’alotoifale i le Samoa News, ina ia fa’ailoa i le atunu’u e aua le atuatuvale e le o fa’amaonia ripoti e pei ona tuuina mai.

Na taua e se tasi o Tina sa valaau mai i le Samoa News i le taeao lea o le aso To’ona’i mai Tafunaj, lona popole tele ina ua ia fa’alogo ua i ai tagata ua maliliu mai Ta’u.

Na taua e le Tina matua lea e fa’apea, o fa’amatalaga sa maua e lana fanau mai luga o le “Facebook”, o lo o taua ai le maliliu o tagata Ta’u ina ua aga’i atu se va’a pa’u sa malaga atu ai ni tagata mai se va’a o lo o taula mai i gatai o Manu’a ma tafana tagata o le nu’u, ona toe sosola ese lea o tagata i le va’a pa’u.

Sa fautuaina e se tasi o Leoleo sinia i le taimi na salalau ai nei ripoti le atunu’u, ina ia fa’aeteete le fa’alogo i ripoti sese o loo salalau solo, ae fa’afeso’ota’i le Ofisa o Leoleo mo se ripoti tu’u sa’o e uiga i fa’alavelave fa’apenei.

Na fa’amaonia mai fo’i e le afioga i le ali’i Senatoa ia Misaalefua J. Hudson i le Samoa News lona mauaina o le ripoti lava fo’i lenei e tusa ai o lenei fa’alavelave, ma ia fautuaina ai tagata o le itumalo ina ia aua le atuatuvale ma popole ae fa’atali i se ripoti mai le Ofisa o Leoleo.

E ui i nei mau ripoti, ae o le itu taua e pei ona taua i le ripoti a le Ofisa o le Puipuiga o le Saogalemu Fa’alotoifale a le atunu’u, e le i mafai ona fa’amaonia ia ripoti, ae o lo o tulaga saogalemu pea lava le itumalo o Manu’a.