Ads by Google Ads by Google

LOLO: E leai se manatu ma te tula’i ese ae tu’u malo e fa’aletonu


Ta’ita’i o le malo, le afioga i le ali’i Kovana ia Lolo Matalasi Moliga ma le lutena kovana ia Lemanu Palepoi Peleti Mauga. [ata AF]
ausage@samoanews.com

O le fonotaga a le Kovana ma lana Kapeneta i le vaiaso na te’a nei i le potu fono a le Ofisa o Fa’atoaga i Tafuna, na momoli ai e le tofa i le Tootoo ia Lolo Matalasi Moliga se feau malosi i Fa’atonusili ma Faauluuluga o Matagaluega ma Ofisa a le malo, le tatau lea ona galulue e fa’atino le tautua sa latou folafola i le atunu’u, o le faia lea o le mea sili e siitia ai le soifuaga manuia o Tutuila ma Manu’a.

 

Na toe fa’atepa e Lolo i le kapeneta le fa’aiuga o le palota na mavae atu nei, lea na fa’ailoa mai ai e le atunu’u lo latou talitonuga atoa ai ma lo latou fa’anaunauga, ia sili atu mea lelei e faia e le faigamalo i le nofoaiga mulimuli nai lo le nofoaiga muamua ua mavae atu.

 

E talitonu le ali’i Kovana, o folafolaga ma ta’utinoga sa tu’uina atu e le faigamalo i le atunu’u, lea na fa’aali e le atunu’u e ala i le fa’aiuga o le palota, o le mafuaaga fo’i lena e tumau ai pea lo la talitonuga ma Lemanu, e tatau pea ona faia mea sili ma le lelei e tautua ai le atunu’u.

 

“Ua uma ona ma fa’ailoa atu ia te outou lo ma talitonuga, e sili atu ona faigofie le nofoaiga muamua nai lo le nofoaiga mulimuli lenei, aua o le nofoaiga mulimuli lenei o le a tele ai lu’itau ma tulaga faigata ona o fa’aletonu o loo tatou maitauina, ae le avea lea ma auala tatou te solomuli ai mai le fa’atinoina o folafolaga sa tatou tuuina atu i le atunu’u”, o le saunoaga lea a Lolo i luma o le Kapeneta.

 

“E leai so ma talitonuga o i ai ma Lemanu ma te o ese ae tu’u le malo i se tulaga fa’aletonu, ma te finau pea e ala i lo tatou galulue fa’atasi e saili auala uma e si’itia ai le soifua manuia o tagata i soo se itu”.

 

O ni isi o taumafaiga e pei ona taua e le ali’i kovana ua mae’a ona fa’ataoto a le faigamalo e siitia ai soifua manuia o tagata, o le toe fa’alautele lea o le fa’avae o le tamaoaiga o le malo, o se fuafuaga e le i faia muamua, ae ua faia ona o le talitonuga ia tula’i ese le faigamalo o lo o i ai nei ae ua ta’atia se fa’avae mautu mo le atunu’u atoa.

 

Ae  ui i taumafaiga a le malo ina ia galulue fa’atasi e si’itia le soifua manuia o tagata, na taua e le ali’i kovana le maitauina o ni isi o sui o le kapeneta e le o manatu e galulue fa’atasi ma i laua i le unaia o suiga lelei mo le malo.

 

Ona o lea tulaga, ua ia tu’uina atu ai ni isi o tusi fa’ailoilo e fautuaina ai Fa’atonusili ia, ina ia toe mafaufau i le ta’utinoga sa fai i le atunu’u i auala e fa’atino ai le tautua a le faigamalo, ma le tulaga o lo o i ai lana tautua i le taimi nei.

 

“E foliga mai i le manatu lea ua amata ona ma vaavaai atu ia i ma le lutena kovana, e na o le tatou o mai lava e ti’eti’e ina ia uma le nofoaiga lenei ona tatou o ese loa lea. O se mea e faigofie ona tatou faia lena tulaga, ae aua ne’i galo la tatou tautoga sa fai i le atunu’u, tatou te sailia i lo tatou malosi soo se auala e fesoasoani ai ina ia siitia lo latou soifua manuia”, o le saunoaga lea a Lolo i le kapeneta.

 

“Afai la ua i ai se isi ua amata ona mafaufau fa’apea, ia toe tepa i le amataga o lenei fa’amoemoe, aua ou te ta’utino atu, ma te le toe solomuli lava i le ta’utinoga ua faia i le atunu’u, o le mafua’aga lena ma te talosaga atu ai ma le agaga maualalo fa’amolemoe, ia tatou faia le mea sili mo le atunu’u”.

 

O ni isi o tulaga fa’aletonu e pei ona taua e le ali’i kovana ua maitauina i ni isi o le kapeneta, o le fiu lea e saili i totonu o Ofisa e le toe maua ai, ae su’e atu lava ua malaga i Amerika poo isi atunu’u, ae ua le manatu e fa’atino le galuega na filifilia ai o ia.

 

Sa ia fa’afetaia le kapeneta e tusa ai o galuega lelei o lo o fa’aauauina pea mo le atunu’u, fa’atasi ai ma lo la talitonuga ma le lutena kovana, o le tautua ma galuega lelei uma o lo o fa’atino e le kapeneta, lea ua mafua ai ona ta’uleleia o la igoa i luma o le atunu’u.