O le aso ananafi lea na fa’amae’a aloaia ai aoaoga fa’apitoa sa faia mo Leoleo o le malaeva’alele i Tafuna, mo le a’otauina lea o i latou i auala eseese e fa’atino ai galuega mo le puipuia o le saogalemu o le atunu’u femalagaa’i, aemaise lava i le toe fa’afouina o a latou laisene e umia ma fa’aaoga ai a’upega mo le puipuiga.

“O aoaoga fa’ai’u ia na fa’agasolo i le vaiaso lenei e aofia ai le fa’aaoga o isi gaioiga i taimi e tutupu ai fa’alavelave, e pei o le fa’aaogaina o le ‘Pepper Spray’ ma le ‘Taser’ i le taimi e fetai’i ai Leoleo o le malaeva’alele ma le tagata o loo fa’atupuina le vevesi poo se fa’alavelave, o isi ia o vaega e tatau ona a’oa’oina ai Leoleo i le fa’atinoina o a latou aoaoga”, o le saunoaga lea a le Pulesili o le Vaega o Leoleo a le malaeva’alele, susuga Chief Na’oiamasionasoa Fetaiaiga Fanene Kava i se fa’atalatalanoaga ma le Samoa News i le taeao ananafi.

E le o Leoleo uma e to’a 30 o le malaeva’alele na pasia suega mo le fa’aaogaina o a’upega i le aoga sa faia i le vaiaso na te’a nei, e pei ona fa’amaonia mai e le susuga a Kava, peita’i e ui e to’alaiti i latou e lei mafai ona pasi, peita’i sa molimauina le maualuga o le tulaga sa oo i ai le silafia o ali’i ma tama’ita’i Leoleo i le fa’atinoina o le aoga.

“E to’alaiti lava Leoleo e lei pasia le aoga e fa’aaoga ai le a’upega ae o le to’atele sa auai i le aoga ua pasia i latou, ma ua mafai ai fo’i ona toe fa’afouina a latou laisene e mafai ai ona latou fa’aaoga a’upega i soo se taimi e fa’atino ai a latou tiute, ae o le vaega to’alaiti lea e le’i fa’amanuiaina i le aoga i le vaiaso na te’a nei, o le a maua le isi avanoa e toe fa’aleleia atili ai vaega o loo moomia le fa’aleleia i le aoaoga lea ua fa’amoemoe e faia i le masina o Oketopa, pe a toe taliu mai le ali’i faiaoga i le atunu’u mo le fa’atinoina o le isi vasega o loo sosoo ai, le susuga ia Ernie Haleck”, o le saunoaga lea a Kava.

O le isi aoga lea ua fa’atulaga ia Oketopa o le tausaga nei, o le a aofia ai loa ma Leoleo o le uafu tele i Fagatogo, ona o le naunau lava ina ia fa’aleleia le silafia o le aufaigaluega i le fa’atinoina o a latou galuega i le puipuia lea o le saogalemu o le atunu’u.

E pei ona taua e Kava i le ulua’i fa’atalatalanoaga ma le Samoa News i le vaiaso na te’a nei e fa’apea, o le aoga lenei e toe fa’afou ai laisene mo le fa’aaogaina e Leoleo o le malaeva’alele o a’upega, e fa’atasi ona faia i le tausaga ina ia mafai ai ona fa’afou laisene a Leoleo mo le umiaina o a’upega, e tusa ai o tulafono ma ta’iala a le vaega o le Feterale o loo pulea malaeva’alele i totonu o setete ma teritori o le Iunaite Setete.

Ae o le tulaga lea ua maitauina i le aoga sa fa’atinoina i le vaiaso na te’a nei e pei ona saunoa Kava, o Leoleo e lei pasia a latou aoga mo le fa’aaogaina o aupega, e le mafua mai i le le iloa fa’aaoga le a’upega, ae mafua mai ona o ni isi o mafu’aaga e fa’atatau i le sauni lea o le mafaufau mo le fa’aaogaina o le a’upega.

“Sa lelei uma vaega taitasi mo le aoga, ae pei ona silafia, o nai o tatou Leoleo o le malaeva’alele e le masani i latou i le fa’aaogaina o a’upega e pei o Leoleo i fafo, e ta’i 2 masina ma faia a latou aoga, toeititi fo’i o aso uma latou te fa’aaogaina ai a’upega i fa’alavelave e tutupu mai, ae o i tatou i Amerika Samoa nei, e leai lava ni fa’alavelave fa’apenei e tutupu, o isi e faigata ona fa’amasani i le uuina o le fana, aua e le o se ituaiga olaga e masani ai le soifuaga i Amerika Samoa nei”, o le saunoaga lea a Kava.

O Leoleo ia ua pasia i aoga e pei ona fa’atinoina, ua mae’a nei ona toe fa’afouina a latoau laisene ma o lo o fa’aauau pea lo latou tauaveina o a’upega i taimi uma e tiute ai i le malaeva’alele.

“O lo o fa’aauau pea le fa’aaupegaina o Leoleo o le malaeva’alele i le 24 itula mo aso e 7 o le vaiaso, ina ia mautinoa le malupuipuia o femalagaaiga a le atunu’u, e le gata i va’alele laiti ae fa’apea fo’i i va’alele tetele mai fafo, ma o lenei tautua o loo fa’amoemoe e tatau fo’i ona fa’alautele atu i le vaega o loo i ai le uafu tele a le malo i Fagatogo, e ala lea i le a’oa’oina o ali’i ma tama’ita’i Leoleo o loo galulue i le uafu”, o le saunoaga lea a Kava.

Na taua e Haleck i le Samoa News i le vaiaso na te’a nei e fa’apea, e le na o le fa’apaina o le fana e tatau ona aoaoina ai Leoleo a le malaeva’alele, ae i ai fo’i isi la’asaga e tatau ona latou silafia i le fa’atinoina o a latou tiute.

“O le fa’apaina o le fana, o le gaioiga mulimuli lava lea e tatau i le Leoleo ona ia fa’atinoina, pe afai ua uma gaioiga uma e tatau ona faia e tete’e atu ai i le tagata fa’atupu fa’alavelave, ae o loo maitauina pea lona taumafai e fa’atupu le fa’alavelave, ona fa’atoa fa’aaoga loa lea e le Leoleo o lana a’upega, peita’i ao le’i fa’aaogaina le a’upega, e mafai ona fa’aaoga isi a’upega mama e pei o le ‘pepper spray’ ma le ‘taser’, ina ia tete’e atu ai i le tagata fa’atupu vevesi, ma afai lava e le mafai ai ona taofi, ona fa’atoa fa’aaogaina loa lea o le a’upega”, o le saunoaga lea a Haleck.

O le fa’aiuga o le vaiaso nei lea ua fa’amoemoe e toe taliu atu ai le susuga a Haleck i Amerika, i le lata ai i le 3 vaiaso lea na malaga mai ai e fa’atino aoaoga mo Leoleo o le malaeva’alele.