Ads by Google Ads by Google

Malaga mai Foma’i Manu e fesoasoani i meaola i le atunu’u

ausage@samoanews.com

O le vaiaso fou lea ua fa’amoemoe e taunu’u mai ai se vaega o Foma’i Manu mai Amerika, mo le ofo fuaina mai o le latou fesoasoani i le tausia lelei lea o meaola i totonu o le atunu’u.

 

E to’a 21 le aofa’i o le au malaga mai le vaega o le Animal Balance i Amerika, lea e aofia ai Foma’i Manu e to’a 6 o le a taunu’u mai i le atunu’u i le po o le aso Gafua o le vaiaso fou, lea ua fa’amoemoe e malaga atu i nu’u i tua ma fesoasoani ai i le faia o taotoga mo meaola eseese i le atunu’u, i lalo o le latou galuega fai paaga ma le Faalapotopotoga o le Alofa mo Meaola, fa’apea ai ma le Matagaluega o Fa’atoaga o lo o gafa ma le tausia o meaola i le atunu’u.

 

I se pepa o fa’amatalaga sa tu’uina mai e se sui o le Animal Balance, o lo o taua ai le leai o se totogi mo le fa’atinoina o le latou tautua, i le faia lea o taotoga mo Ta’ifau ma Pusi.

 

O le faasologa o le latou polokalame e aofia ai le aso Lulu ma le aso Tofi o le vaiaso fou, Oketopa 12-13, lea o le a amata ai la latou tautua i le Pavilion i Fagatogo, sosoo ai loa le afioaga i Leone i le aso Faraile, Oketopa 14, sosoo ai loa le afioaga i Vatia i le aso Toona’i, Oketopa 15, ma le aso Sa, Oketopa 16 i le fale taalo a le aoga a le South Pacific Academy i Tafuna.

 

Na taua e le sui o le Animal Balance le i ai o se alaga tupe fesoasoani o lo o latou mauaina mai i le Alley Cat Allies, lea o lo o fesoasoani ai i le fa’atinoina o le latou tautua mo le taofiofia lea o le soona tupu televave o le faitau aofa’i o meaola o le Pusi.

 

Ae mo le Faalapotopotoga o le Alofa mo Meaola, o lo o latou mauaina mai se alagatupe fesoasoani mai le CSBG, tauala mai i le Matagaluega o Fefa’atauaiga ma Alamanuia, e fesoasoani ai i le fa’aitiitia o le fa’atupulaia lea o le faitau aofa’i o Ta’ifau i le atunu’u.

 

O le a mamai fo’i ona latou fa’atinoina isi tautua eseese mo Ta’ifau ma Pusi e pei o le faia o tui atoa ai ma isi lava togafitiga masani.

 

O lo o fautuaina malosi fo’i le mamalu o le atunu’u, e tatau lava ona Laisene Ta’ifau, ma afai e mafai ona e fa’atauina se laisene e $5 lona tau, o le a maua fua mai i le Animal Balance se “collar” e fa’ailoa ai ua mae’a ona laisene lau Ta’ifau.

 

Mo ni isi fa’amatalaga e uiga i lenei auaunaga, fa’afeso’ota’i le telefoni (684) 252-5366 mo le fa’atulagaina o le taimi ma le aso o taotoga mo au meaola, pe afai fo’i e moomia se auala e aumai au meaola e siaki.

 

Afai fo’i e i ai se tasi o loo fia ofo atu lana fesoasoani i lenei auaunaga e pei o foa’i tupe ma taumafa, o loo matala pea le faitoto’a mo le fa’atinoina o lea tautua taua, ma ia fa’afeso’ota’i le numera e pei ona taua mo ni isi fa’amatalaga e fia malamalama atili ai.