MISAALEFUA: Amerika Samoa, ua ea le pologa o Manu’a


Le afioga i le ali’i Senatoa mai le Itumalo o Manu’a #2, le afioga i le Fa’atui ia Misaalefua J. Hudson i le taimi o lana saunoaga e fa’afetaia ai le faigamalo ona o le va’a fou e tautua ai le itumalo o le Manu’atele, i le sauniga e fa’apaia aloaia ai le va’a a le malo i le taeao ananafi i luga o le uafu i Fagatogo. [ata AF]
ausage@samoanews.com

Na tau fai pati pati le to’atele o le aofia ina ua taua e le afioga i le ali’i Senatoa mai Manu’a #2 ia Misaalefua J. Hudson i lana saunoaga fa’afetai i le Kovana ma le faigamalo, i le taimi na fa’apaiaina ai le va’a fou a le malo e tautua ai le itumalo o Manu’a, le tali o le Atua i talosaga a Manu’a ua tele tausaga o tagisa ai, mo se taimi e maua ai se va’a fou e fa’aleleia ai tulaga tau femalagaaiga i le itumalo.

 

“Amerika Samoa, ua ea le pologa o Manu’a ua tele tausaga o pagatia mai ai, ua lagomau mai Tiasa le to’atele o Tuaa sa o latou asaina mai le gasu o lenei fa’amoemoe, ona o le naunau ina ia vave mai se aso e maua ai se va’a lelei e tautua ai femalagaaiga mo le itumalo, a o lenei ua tali fa’aaliali le Atua e ala i le faigamalo a Lolo ma Lemanu, fa’apea ai le lagolagosua a le Ofisa o le Initeria, le Fono Faitulafono ma le Vaega o Fa’amasinoga”, o le saunoaga lea a Misaalefua, ao alala ai i ona tafatafa le tofa i le Tootoo ia Malemo Tausaga, o ia lea sa avea ma Fofoga o le aso.

 

E ui o le aso Lulu o le vaiaso na te’a nei na taunu’u aloaia mai ai le va’a fou i laufanua o Amerika Samoa, le MV Manu’atele, peita’i o le taeao ananafi na fa’atoa fa’ataunu’uina ai le sauniga e fa’apaia aloaia ai le va’a, lea na auai uma ai ta’ita’i o le Tafatolu o le Faigamalo a Amerika Samoa, fa’apea ai sui o le Fono Faitulafono i ona maota e lua, aemaise ai ni isi o sui o le Kapeneta filifilia a le kovana, ma le mamalu o le atunu’u na maua le avanoa e molimauina lenei sauniga taua.

 

O le susuga i le ali’i faifeau o le Ekalesia EFKAS i Utulei ia Rev. Elder Ioane Evagelia na ta’ita’ia le sauniga lotu e fa’apaiaina ai le Sa o le malo, ma viiga o le Atua na lagiina lea e le aufaipese a le Ekalesia EFKAS mai Vatia.

 

O saunoaga fa’apitoa o le polokalame na saunia e le afioga i le Peresetene o le Senate, le Tama’ita’i o le Ao ia Gaoteote Palaie Tofau, o le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega, Misaalefua  ma le afioga i le ali’i kovana ia Lolo Matalasi Moliga.

 

Na taua e Gaoteote i lana saunoaga lona agaga fa’afetai i le faigamalo, ina ua mafai ona maua se va’a fou e tautua ai le itumalo o Manu’a, ona o le isi lea mataupu e finauina soo pea e sui o Manu’a i le Fono Faitulafono, “o le leaga o auala o femalagaaiga i le itumalo”.

 

“E lelei Tutuila e na o le oso lava i le ta’avale ma alu i le fale, ae o Manu’a, e tau su’e le va’a e malaga ai i le itumalo, o lea la ua manaia le fou o le va’a mo Manu’a, atonu o le a amata ai loa ona toe mafaufau o tagata Manu’a o loo nonofo solo i Tutuila ina ia amata nei loa ona mafaufau e toe fo’i e tautua aiga ma le itumalo, poo le o fo’i i i le va’a e aso Sa i Manu’a, ona toe usu mai ai lea i galuega i le aso Gafua”, o le saunoaga fa’aataata lafoga lea a le ali’i peresetene na tali e ai le aofia.

 

Sa ia manatu fo’i e fa’asa’o le manatu lea ua to’atele tagata Manu’a alalaga i ai, fai mai “e le o se va’a o le malo, o le va’a e pule ai lava Manu’a”.

 

“O le fautuaga, tausi fa’alelei le va’a ma fai ia umi ona aoga”, o le saunoaga lea a Gaoteote.

 

Na taua e Misaalefua le maligi o ona loimata i le taimi na aga’i malie mai ai le va’a i totonu o le ‘ava i le vaiaso na te’a nei, ma ua le mafai ai ona tatali ona lagona fiafia ma le fa’afetai i le Atua, ina ua tali i talosaga a Manu’a.

 

“Soo se Tama o Samoa e lagona le fiafia ina ua ea le pologa, e le mafai ona gagana ae fa’aalia e loimata o le fiafia”, o le saunoaga lea Misaalefua.

 

Na taua e le ali’i kovana le faigata o le olaga sa soifua ai Manu’a i le tele o tausaga ua mavae, a o lea ua amata ona maua auala e foia ai.

 

“O aso ua mavae afai e fia utu se ta’avale, e avatu le kalone kesi i Tutuila ona alu ane lea o le ave ta’avale Manu’a ma le faga’au e mimiti ai le kesi i totonu o lana ta’avale, peita’i o le taimi nei ua i ai le pamu kesi e utu ai ta’avale, o lea fo’i ua i ai le va’a fou e tautua ai le itumalo o Manu’a, ma o loo fa’asolosolo malie pea atina’e mo le itumalo”, o le saunoaga lea a Lolo.

 

O le mae’a ai o saunoaga fa’apitoa o le aso, na sosoo ai loa lea ma le fa’apaiaina o le tino atoa o le Sa o le malo, e le afioga Mosiniolo ia Fr. Ioane Etuale, o ia fo’i lea o le Sui Epikopo o le Puleaga Samoa Pago Pago, a le Ekalesia Katoliko i Amerika Samoa.

 

O le faletua o le afioga i le ali’i kovana, Cynthia Moliga, fa’apea ai ma le faletua o le afioga i le Fa’amasino Sili, Gail Kruse na ootiina le lipine, o i laua fo’i ia na tata’eina le niu mo le fa’atinoina o le sauniga o le fa’apaiaina o le Sa o le malo i tu ma aga fa’a Samoa, e aofia ai le sasa’a lea o le sua niu i le tino o le va’a.

 

O le mae’a ai o le sauniga o le fa’apaiaina o le va’a na fa’ataunu’uina ai loa ma le asiasiaga masani a ta’ita’i o le malo i totonu o le va’a, ma fa’ai’u ai loa i se taumafataga sa saunia e le Fono Faitulafono.

Comment Here