Ads by Google Ads by Google

Nofovaavaaia le Tina talavou na ia ta tui lona niece i le atigi fagu

ausage@samoanews.com

E 24 masina lea ua nofovaavaaia ai le Tina talavou e 25 tausaga le matua lea ua ta’usala i le moliaga mama o le fa’ao’olima i le tulaga tolu, e mafua mai i le fa’alavelave lea na tula’i mai i le vaiaso na te’a nei i Leone, lea na ia fa’aaoga ai se atigi fagu ta’e e fa’ao’o ai manu’a i le tino o lona niece 22 tausaga le matua, e ala i lona ta tui o lona lima taumatau atoa ai ma ona foliga.

 

Na ulua’i tu’uaia e le malo ia Fa’anenefu Hall i le moliaga mamafa o le fa’ao’olima i le tulaga muamua, o se solitulafono o lo o fa’atulaga mai i le vaega A o solitugatulafono mamafa, lea e mafai ona fa’asala ai se tasi i le toese mo le olaga atoa, po o le fa’asala fo’i i le umi e le itiiti ifo i le 10 tausaga ae le silia ma le 30 tausaga i totonu o le falepuipui.

 

Ae i lalo o se maliliega na sainia e le malo ma le ua molia, lea fo’i na talia e le afioga i le ali’i Fa’amasino ia Fiti Sunia i le vaiaso nei, na tali ioe ai Hall i le moliaga mama o le fa’ao’olima i le tulaga tolu, le solitulafono e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000, po o le fa’asala fo’i i fa’asalaga uma ia e lua.

 

I le tali ioe ai o Hall i le moliaga e pei ona ta’usala ai o ia e le Fa’amasinoga Fa’aitumalo, sa ia ta’utino ai i lona fa’aaoga lea o se atigi fagu ta’e e fa’ao’o ai manu’a i le tino o lona niece.

 

Na taua i fa’amaumauga a le fa’amasinoga e fa’apea, sa ‘ona Hall i le taimi na tula’i mai ai le fa’alavelave, ma o le fagu uaina lea sa fa’aaoga i le taimi o le inugapia, o le fagu lea na tata’e e le ua molia ae fa’atino ai le solitulafono, lea na mafua ai ona taofia lona niece i le falema’i i Faga’alu mo ni nai aso, ona o togafitiga sa faia i lona tino e mafua mai i manu’a sa a’afia ai o ia.

 

O le mae’a ai ona talia e le fa’amasinoga fa’aitumalo i le tali ioe a Hall i le moliaga mama i le aso Gafua, na faia ai loa ma le poloaiga e tatala o ia i tua e faatali ai le lauina o lana fa’asalaga i le taeao ananafi, tusa lea ua mae’a aso e 8 talu ona taofia o ia i le toese i Tafuna.

 

A o le i tu’uina atu le fa’asalaga a le fa’amasinoga fa’asaga ia Hall, na fa’atoese le ua molia e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i lona aiga e tausi lana fanau e to’atolu o lo o i ai. Sa ia fa’atoese fo’i i lona niece na a’afia, ma ia fa’aalia ai lona salamo e tusa ai o le fa’alavelave sa tula’i mai.

 

Na talosaga le tamaitai loia fautua ia Kate Hannaher sa tula’i mo Hall i le fa’amasinoga, ina ia talia tuutuuga o le latou maliliega ma le malo, o le faanofovaavaaia lea o le ua molia mo le 24 masina, e aunoa ma le toe tu’uina atu i ai o se isi fa’asalaga fa’a falepuipui ia te ia.

 

O ni isi o itu lelei na taua e Hannaher e mafai ona fesoasoani mo se fa’asalaga mama mo Hall, o lona fa’atoa tula’i lea i luma o le fa’amasinoga mo se solitulafono, atoa ai ma le avanoa e tatau ona fo’i ai i lona aiga e tausi lana fanua.

 

Ae ui i le tulaga matuia o le gaioiga sa faia e Hall atoa ai ma manu’a na a’afia ai le tino o lona niece na a’afia e pei ona taua e le loia a le malo ia Woodrow Pengelly, peita’i sa ia lagolagoina le fa’afinauga ina ia fa’anofovaavaaia Hall mo le 24 masina, e aunoa ma le tu’uina atu i ai o se isi fa’asalaga fa’a falepuipui.

 

A o le i tu’uina atu le fa’asalaga a le fa’amasinoga fa’asaga ia Hall, na faaalu e Sunia se taimi e fa’asoa ai lagona o le fa’amasinoga e tusa ai o lenei mataupu, aemaise lava le tulaga matuia o le gaioiga sa faia e le ua molia i lona niece, e ala i lona fa’aaoga o se a’upega ma’ai e fa’atino ai manu’a i lona tino.

 

“Ua laki e le matuia le fa’alavelave na tula’i mai, aua o le gaioiga lea sa e faia, e ono ese se taunu’uga na se manu e tula’i mai ai, e aofia ai ma le ma’imau ai o le soifua o le na a’afia ina ua e fa’ao’olima i ai, e ui lava la o lea ua finau mai loia i le leai o sau solitulafono sa faia muamua, peita’i i le silasila a le fa’amasinoga, e fai lava si matuia o le gaioiga sa e faia”, o le saunoaga lea a Sunia.

 

“O lea ua manino i fa’amaumauga a le fa’amasinoga, o oe o se Tina talavou e na o le 25 tausaga o lou soifua, to’atolu lau fanau ae leai sau galuega, ao lea sa e inupia ma ‘ona i le taimi na tula’i mai ai le fa’alavelave. O ituaiga mataupu fa’apenei, e le manatu mama i ai le fa’amasinoga, ae tatau fo’i ona e silasila toto’a i le ituaiga filifiliga e te faia, po o le fa’amuamua o lou naunau i le ‘ava malosi nai lo lau fanau, po o le ave fo’i o lau fa’amuamua i lau fanau”, o le saunoaga lea a Sunia.

 

E 12 masina na manatu le fa’amasinoga e fa’asala ai Hall i le falepuipui, peita’i ua fa’amalumalu le tuliina o lea fa’asalaga, ae ua fa’anofovaavaaia o ia mo le 24 masina i lalo o tuutuuga e ao ona ia usita’i i ai. O ni isi o ia tuutuuga e aofia ai le matua fa’asa lea ona ia toe tagofia le ‘ava malosi, auai i aoaoga fa’a faufautua mo le ‘ava malosi ma le ita, totogi le salatupe e $200, aua ne’i ona toe solia se isi tulafono a le malo,.

 

O se tasi o tuutuuga faapitoa o le nofovaavaaia a Hall, o lona tuliina lea o aso e 60 i le toese i Tafuna, peita’i o lea tuutuuga o le a taofia lona fa’ataunu’uina, ae ua lava aso e 8 lea na taofia ai o ia e fai ma ana fa’asalaga, ae o le paleni o lo o totoe ai o le a taofi lona fa’ataunu’uina, fuafua lava i lona usitaia o isi poloaiga uma a le fa’amasinoga.

 

“O lea ua tu’u atu tuutuuga nei e te usita’i i ai, aemaise ai lava le fa’asa lea ona e toe tagofia le ‘ava malosi poo fualaau fa’asaina, afai e te le usitaia se tuutuuga ua tuuina atu, o le a poloaina oe e te tuliina le fa’asalaga fa’a falepuipui lea ua fa’amalumalu. Ia e filifili lelei fo’i po o fea e fa’amuamua, poo le ‘ava malosi po o lau fanau e to’atolu”, o le fautuaga mulimuli lea a Sunia mo Hall.