Onosa’i I Mea Tiga

Vaega: 128

 

Alo maia, o le a toe fa’aauau atu la tatou tala. Na muta mai la tatou tala, ina ua vala’au mai nei Filipina e asi mai si ona aiga. Fai mai, ua fa’amatalatala mai nei e Filipina le matalasi o Amerika i si ona tuagane o Lilo ma lona uso o Luisa.

 

A alu alu tala a le lo’omatua, fa’alogo atu Lilo ua sau le nanau a le lo’omatua, o isi taimi e fa’alogo atu Lilo ua uma le ‘ata, ae ua tagi mai i le telefoni, ua toe fia fo’i vave mai i Samoa.

 

“Pina, oi fa’apea lava a matou ua e o’o atu i le malo o lo’o tafe ai le susu ma le meli o le a e le toe fia sau i Samoa nei, a’o le na e ‘ese a oe ia, tafao ma fa’afiafia lou loto, a’o fea Ali’ioaiga.?”

 

Na tali mai Filipina i lona tuagane, ua uma le fa’au’uga o Ali’ioaiga, o lea la ua uma ona momoli i le nofoaga e amata ai ona tiute, a’o la’ua, o le a toe sauni e toe fo’i mai i Samoa, “Lilo, ou te oti lava i Samoa i le mea o lo’o e i ai, o le a lava le matalasi o nei Malo ma nei atunu’u, e sili lava i a te a’u Samoa, e filemu ma e maua avanoa matagofie e tapua’i i le Atua i aso ma taimi uma o le olaga, a’o nei atunu’u, se ou te le fia nofo ai.”

 

Ua fa’apea lava ona fai, ua amata galuega a le tama o Ali’ioaiga, ae ua toe fo’i mai nei i Samoa ona matua. O se fiafiaga sili lea mo Lilo ma Luisa, ona sa i ai lo la manatu, o le a taofi nei e Roger ia Filipina la te nonofo i Amerika, ae ua fa’afiafiaina o la loto, ina ua fai mai Filipina o la’ua e toe fo’i mai i Samoa.

 

Ina ua taunu’u le malaga i Samoa, fai mai ua le iloga se mau tala ua fai nei e Filipina, a tua’i tala a le lo’omatua, ua velo iluga lima e tau fa’amatala ai le matagofie ma le matalasi o le Malo o lo’o tafe ai le suasusu ma le meli.

 

A’o alu le malaga a Filipina ma Roger e momoli Ali’ioaiga i Amerika ma se i o’o fo’i i uso o lona tama, o le vaitaimi tonu lea na o’o ane ai le fa’amalamalamaga a le Faifeau i a Lilo ma Loleta. Fai mai le tala, o se ali’i ua ma’ea ona fa’ae’e lona tofi Faifeau, ae sa tau va’ava’ai pea se tama’ita’i e tala feagai ma lona mana’oga, ae maise o le galuega a le Atua o lo’o galue ai.

 

O le afioga i a Lilomaiava ma lona faletua o Malia Loleta, e to’a fa le la fanau teine, ae to’atasi le tama, o igoa o tama’ita’i, e ulumatua le teine o Mataniu, lea ua fa’aipoipo i le ali’i Palagi o William. O le tama’ita’i lona lua, o Ataataota’ulelei ua fai fo’i lona to’alua ma e to’atasi le la tama ua maua nei.

 

O le tama’ita’i lona tolu o Alofagiaimeauma, e le i faia sona to’alua, ae o lo’o faigaluega pea e o’o mai i le taimi lea. O le tama’ita’i la’ititi, o lo’o faigaluega fo’i, ma e le i faia sona to’alua. Sa i ai le manatu o Lilo ma Loleta, ai e alu ane le fa’amalamalamaga a le Faifeau ma matai o lona aiga, ai o le tama’ita’i o Alofagiaimeauma, ae taunu’u ane le Faifeau, o le tama’ita’i, o Onosa’iimeatiga, lea ua mafua ai ona susu ane le Fa’afeagaiga.

 

O lea la e taunu’u mai le malaga a Filipina ma Roger, ua amata tapenapenaga mo le aso fiafia o le tama’ita’i o Onosaiimeatiga ma le Faifeau, le susuga ia Peniamina. Ae fai mai le tala, ina ua lauga le Faifeau i le nu’u lea o lo’o i ai le aiga o Lilomaiava, o i’ina na va’ai ai le Faifeau i uiga tausa’afia o le tama’ita’i o Onosaiimeatiga.

 

E le o se tama’ita’i, e fa’alialia pe o se tama’ita’i fo’i e so’ona gaoia, e le mimita vale, pe fa’apea sona manatu, ua maua e lona aiga le tamaoaiga, e leai. O lona olaga, e fiafia e alu i le fale o le Faifeau, o a lava mea a le Autalavou, e i ai lava le tama’ita’i. Ua fa’auluulu fo’i i ai mea uma lava, o le Autalavou, o A’oga a tamaiti, ma e fa’amoemoeina e le Faletua i so’o se mea.

 

E faia pea...

Comment Here