Ads by Google Ads by Google

Onosa’i I Mea Tiga

Vaega: 137

 

Alo maia, o le a toe fa’aauau atu la tatou tala i lenei aso. Se i o tatou asia le Faletua ia Onosa’iimeatiga ma le Fa’afeagaiga ia Peniamina po’o a fo’i mea o tutupu ae po’o fa’apefea mai le galuega a le Atua o lo’o galulue ai.

 

Fai mai le tala, o le aulotu a Peni ma Tiga, o se aulotu ua matua’i mata’utia ona tagata, na gata lava i le amataga o le galuega foliga lelei ma foliga tausa’afia o tagata, ae ina ua fa’aumiumi le galuega, o lea ua va’aia ai nei e Peni ma Tiga uiga o tagata.

 

O le tele o aso, e uma ane le aso, pe to’a valu to’a sefulu tagata ua o’o ane i le maota o le Fa’afeagaiga, o le mea ua tupu, o le o’o ane o tagata o le aulotu, ua le iloga le tala e fai ane i le Faifeau ma lona Faletua. E i ai i si Aso Sa, fai mai, e uma le lotu ma le tapua’iga, ae va’ai atu le Fa’afeagaiga ma lona Faletua, o tau vaovao mai misa’aga i fafo o le Falesa.

 

Fai mai, fa’atoa fa’alogo lea o Onosa’iimeatiga i tala e lafo i lea taimi, o tala leaga uma o le lalolagi nei, o lo’o fai ai tauga upu i luma o le Falesa, a’o lea fa’atoa tu’ua le lotu. Ua fa’alua ona faia ia tulaga, fa’atolu loa, e le i toe fa’atali ai le Fa’afeagaiga na tu mai loa i luma o le pulela’a ma fa’atonutonu mai ai loa lana aulotu.

 

“Le paia ma le mamalu o le Ekalesia, ua lagona lava lo’u fa’anoanoa tele, e le gata ia te a’u, ae ua fa’apea fo’i le Faletua, ona o le fai so’o o uiga mataga ma uiga  le a’oa’ia, o le a le aoga o le tou o mai i le lotu i Aso Sa uma, sa sili ai ona nonofo i le fale,

 

“O le a le manatu o outou i isi Ekalesia, na o le o mai ma talie mai, fa’atoa ou va’ai lea i se aulotu ua fa’apenei uiga o tagata, afai, o le faiga lea, o le a ave la’u tusi i le Puleaga, ia ‘aua ne i toe au maia se Faifeau i le tou nu’u, pe afai o le faiga lea o outou,

 

“O outou tina, ua sili atu ona faigata outou, tu’u lalo o le isu, e le o se mea lelei, tu’u fai fua e le isi tina o tala a le isi tina e le o se mea lelei, o lea lava ou te pese atu pea i luga o le pulela’a ia outou nonofo fealofani ma maua le loto gatasi ia te outou tina, a’o lea, e tau solomua ia te outou le fa’aleaga o le galuega,

 

“O tina, ua outou malamalama i le tala, a leai se Atua, a’o lena o lo’o i ai le tina, aua o tina, o pae ma le auli i totonu o aiga, nu’u ma Ekalesia, a’o tina ia e maua i le aulotu lenei, se le o ni tina atoatoa, ua na o fasi tina, mea ia ou te va’ai atu i ai, ua leai se tofa po’o se fa’auta ia te outou, afai e fa’apea outou, e fa’apea fo’i tulaga e o’o i ai tama o le aulotu lenei.”

 

Fai mai, ua leai se mea e toe ga se i lea taimi, ae ua le taofiofia lava le Fa’afeagaiga i lea taimi, o tiga ma mafatiaga sa nonofo ma la’ua ma talatalanoa ai, o lea ua folasia nei i malae e ala i apoapoa’iga ma timaiga ua tu’u atu nei i le itupa vaivai.

 

O le taimi lea, ua na o le punou o Onosa’iimeatiga ma fogifogi lona isu, ua a’apa ane nei i ai si ana tama, lea o lo’o la nonofo fa’atasi. Ae ua na o le maligi ifo o loimata o le Faletua i lea taimi. A alu alu le tagi a le Faletua, fa’apea ifo ona mafaufauga, “Se ua ta fia pa’i atu lava i se lo’omatua, na o le numinumi lava ma momono i lalo o se ma’a, ua ta le lava onosa’i nei faiga e fai mai.”

 

E faia pea...