Ads by Google Ads by Google

Onosa’i I Mea Tiga

Vaega: 15

 

Fa’atalofa atu i le mamalu o le atunu’u, i lou alafa’i mai i le manuia i lenei taeao fou, e ao ona o tatou fa’afo’i le mua ma ave le vi’iga i le Atua Soifua, ona o Lana tausiga alofa, aemaise o Ana fa’amanuiaga, lea o lo’o tatou sa’a ai pea i ma’aomalie i aso uma o lo tatou ola. Ae alo maia, o le a toe fa’aauau atu la tatou tala, ae ia manuia le alo faiva o le atunu’u i feau ma galuega o le a feagai ai i lenei aso.

 

Na muta mai la tatou tala ina ua toe fo’i le si’igama’i a Mose ma Malia ma si a la fanau, ma a’o alu pea le ta’avale, o lea ua fai le mavaega oti a Malia i lana fanau o Lilo ma Filipina, ae o lo’o fai le muimuiga o si lo’omatua e le toeaina o Lefefe, lea e uliina le ta’avale.

 

Fai mai, ina ua taunu’u le ta’avale i lo latou fale, o lo’o tutu mai Luisa ma Vesi ma si a la fanau e fa’atalitali le taunu’u ane o le si’iga ma’i. Ae ua ma’ea ona saunia e Vesi le mea’ai o le afiafi, fai mai, a’o fa’atino e Vesi lea fuafuaga lelei, sa fai lava, ma mafaufau alofa i le lo’omatua o Malia. Ua toe fafagu mai uma i a Vesi uiga o le lo’omatua, o le taimi muamua na o’o ane ai e fa’amalamalama ia Mose ma Malia e uiga i a Luisa.

 

A fa’asolosolo fa’asolosolo mafaufauga o si tamaloa faiava o Vesi, ‘ata, ua ia toe manatua le tuliga o ia i fafo ma le fale, e le lo’omatua o Malia. E le gata i lea, ae ua lalau le matitiva ma le mata i maile o si tamaloa. Ua o’o lava i matua o Vesi, ua fa’asolo i ai le agi a le afa a le lo’omatua o Malia.

 

Ua toe fafagu mai uma i le mafaufau o Vesi ia tulaga fa’alupelupeina, fai mai, na te’i lava ua maligi ifo loimata o le tamaloa faiava, ua ia manatua le tulaga ua o’o nei i ai le soifuaga o le lo’omatua o Malia. Fai mai, ua suia lava i se suiga lelei, ona ua lagona ua matua, ua lagona fo’i ua ma’i. Fai mai mafaufauga o Vesi, “Talofa e , i si o tatou ola vaivai, e fai lava lea ma lea, ae tatou te i’u uma lava i le matua o le soifuaga, ma tatou te i’u uma lava i le palapala, ae o le a fai mo ai mea o lo’o tatou losilosi vale nei i ai.”

 

Fai mai, na fa’ate’ia mafaufauga ia o Vesi, ina ua fa’alogo atu ua sau le vala’au a si ona to’alua o Luisa, o lea ua taunu’u le ta’avale, ua toe fo’i atu le si’igama’i. E pei o le o o lima o le asiosio le alu solo o lima o Vesi i lea taimi, ua amata ona mu le moasamoa, lea na ia matua’i liliu e fa’amanogi lelei, aua se mea’ai a le si’igama’i.

 

Na ona uma lava ona tu’u e Vesi le moasamoa i luga o le laufa’i ua uma ona lagilagi lelei, tamo’e loa e le i toa fa’atali, ma na muamua lava tilotilo i le pito i luma, po’o i ai le lo’omatua o Malia. E tilotilo ane Vesi e leai se isi o nofo atu ai, tamo’e fa’anatinati atu loa i le pito i tua o le ta’avale, e fetaui lava le taunu’u ane o Vesi, ae tu loa i luga ma le lo’omatua o Malia.

 

Fai mai, na ona va’ai atu lava o Malia i a Vesi, fa’apea ane loa, “Vesi si a’u tama, tago mai e si’i atu a’u i lalo, ua le mafai ona ou savali.” E le i toe fa’atali Vesi i lea taimi, na liliu ae nei i a Lilo, “Se Lilo, tago e tu’u mai le lo’omatua i luga o lo’u tua, na ona e tago lava e tu’u mai i luga o lo’u tua ona ou fafaina lea i le fale, fa’avave, ua ma’ea ona fai le meatausami a le lo’omatua ua leva ona tou o.”

 

Ua fa’apea lava ona fai, ua fafa nei e Vesi le lo’omatua o Malia i le fale, ae fai mai, a’o faia lea galuega lelei e Vesi, ma fa’ate’ia le tamaloa faiava ina ia fa’apea le musumusu ane a le lo’omatua i lona taliga. “Vesi, fa’afetai tele, ua malie lo’u loto i lau tausiga, afai o lo’u ma’i lea, ou te alu ma le malie atoatoa o lo’u loto i lau tausiga, ia oulua manuia, ma ia manuia si a oulua fanau, ia e alofa ia Lusia, Lilo ma Lesina.”  Fai mai, e topetope lava le savali a Vesi, ae ua tau le iloa ma’ama’a o le auala, aua ua pei o timuga ua afuto ifo mai le lagi ona loimata.

 

E faia pea…..