Ads by Google Ads by Google

Onosa’i I Mea Tiga

Onosa’i I Mea Tiga

 

Tusia: Akenese Ilalio Zec

 

Vaega: 140

 

Alo maia, o le a toe fa’aauau atu la tatou tala. Ua talatalanoa nei Lilomaiava ma ona tuafafine o Filipina, Luisa fa’apea ma lona to’alua o Loleta i mea o lo’o tutupu i totonu o si o latou aiga. Ua uma fo’i, ona fai a latou tala e  uiga i fanau, ina ia apoapoa’i pea i tamaiti, ‘aua ne i vaivai le fa’atonu ma le fautua i ai i so’o se itu.

 

Ae fai mai, ua mao le tala a Lilo i si ona tuafafine o Luisa, e uiga i a Vesi. E le i tele lava i se pito, na oso ane nei le lo’omatua o Filipina, “Luisa, oi o le na lava e te le malie i a Vesi i le inuina o lana pia, va’ai oe le lo’omatua faigata, afai e te fia inu, alu ane i le faleoloa e ave sau Stein, e fa’afiafia lou mafaufau, a le o lou palaina fua o Vesi,

 

“Luisa, tu’u ia na mea, ua tatou matutua, ia tatou maua le fiafia ma le loto fa’afetai i le Atua, i le anoanoa’i o lona alofa i totonu o si o tatou aiga, ae tu’u ia na mea fa’apena, na o le vevesi ai o aiga, ma le maua se filemu,

 

“Luisa, tu’u ai pea Vesi, ua galo i a te oe le aoga ma le tautua toto o Vesi i totonu o lo tatou aiga, ua galo i a te oe, se Luisa, tu’u, ‘aua ne i ou toe fa’alogo atu lava o fai ni au tala e uiga i a Vesi, o Vesi o lou to’alua, ua tele tausaga o lua mafuta, ua tele fo’i tausaga o fai lava le tautua a Vesi i totonu o lo tatou aiga, ia e manatua mea lelei na fai e si tamaloa, ae ‘aua e te manatu i a mea e leai se aoga,

 

“O le na ua ou fai atu i a te oe, onosa’i lou loto, a e fia inu,  ona e alu atu lea i le Faleoloa, o le faleoloa e pule ai oe, a e fia inu, ia o le a le mea e leaga ai, pe a va’ai atu le afioga i a Lilomaiava, o fai mai le ta pa ti po’a lava i lalo o le la’au, se fai le mea e fiafia ai le loto, ae ‘aua e te fa’atiga i le loto o Vesi,

 

“Luisa, ‘aua ne i toe faia lau mea le na, ola fiafia ma  ola fa’afetai, e na o le lua lava fagu a si toeaina e alu atu au mai, ona sau lea inu ma nofonofo i le umukuka, o le a le leaga o le na mea, se ‘aua e te fa’apena Luisa, alofa i si toeaina, o le a fuli lava Vesi i le lua, o fai lava lana tautua, e le lava upu o le gagana e momoli atu ai la’u fa’afetai tele i a te oulua i mea uma lava,

 

“O lea fo’i e afio Lilomaiava ma le faletua, ou te talitonu, o lo’o manatua pea la oulua tautua mai lava i le amataga a’o soifua mai nai o tatou matua, Luisa, alofa mai si o’u uso, ‘aua e te fa’apena i si toeaina o Vesi.”

 

Fai mai, ua tele ane nei tala a Filipina, ae ua punou le lo’omatua o Luisa ma tagi, ua lagona i lona loto upu ma tala ua tautala ane ai lona uso la’ititi. E moni ma fa’amaoni mea uma, ae ua pau lava, aua o lona loto ia umi le mafutaga ma Vesi ma si a la fanau, ua matutua fo’i tamaiti.

 

Ua fa’aauau pea le tautalaga a le lo’omatua o Filipina, “Luisa, na alu atu fo’i si teine o Samalaulu ma loimata i le isi taeao, fai mai ua e nofo fo’i ma sasa, Luisa, se tu’u na mea, ua le toe aoga i vaitaimi nei, o tamaiti fo’i ua matutua, a i ai se mea e te mana’o ai, o lea e nofo atu Lilo ma Loleta, o lae fo’i ou te nofo mai a’u, savali atu, ou te le tu’ua lava se mea ia te oe le uso, o le na e te iloaina Luisa,

 

“Ae ‘aua le faia fa’apea Vesi ma tamaiti, pau lava lea o le mea ou te le fiafia ai ia te oe, a’o mea uma, e leai se mea e fa’aletonu Luisa, alofa mai, fai fa’alelei mea o le aiga, e le mafai ona ou tu’ua oe, ma ou fa’apea ifo ua ou le toe alofa ia te oe, e leai, leaga o oe o lo’u uso Luisa, fai lelei mea, ma ia e alofa i a Vesi.”

 

Ua na o le punou o le lo’omatua o Luisa ma soloi ona mata, na e’ue’u ane nei e Loleta i a Lilo, ma ua amata ai loa le saunoaga a Lilomaiava, i ona tuafafine. Ua lagona e Luisa le se se o lana mea o lo’o fai so’o i si ona to’alua ma si ana fanau. O lea na ia tali ai ma le loto malie ma le loto fa’afetai i lona tuagane ma lona uso e tusa ai ma le leaga o lana mea o lo’o fai i si ona to’alua ma si ana fanau.

 

E faia pea...