Vaega: 20

Fa’afeiloa’i atu i lou alafa’i mai i le manuia i lenei taeao fou, e i ai le fa’amoemoe maualuga, o lo’o aoina pea le masina i le soifua laulelei o le atunu’u, e ao ai ona o tatou fa’apea ifo, “Le Atua e, o Oe o le Mataisau o mea uma, a o’o mai faigata ma mafatiaga i o matou tagata, matou te tepa a’e i a te Oe ma o matou loto fa’amaualalo, ma fa’atagisia lau fesoasoani i mea uma, matou te fa’afo’i atu lava le vi’iga ma le fa’amanu i a te Oe Tama e fa’avavau, fa’avavau lava, Amene.

Ia alo maia, o le a toe soso’o atu la tatout ala mo lenei aso, ae ia manuia lou alo atu i faiva ma tiute o le a feagai ai, na muta mai la tatou tala, ina ua momoe nei Lonisi ma Malia, a’o lea fo’i ua pipi’i atu i ai ma ave e valu o le fe’e a le toeaina o Lefefe. Fai mai, ua uma nei ona ‘ai le moa Samoa ma le fa’alifu talo lolo na fa’atino e si tamaloa faiava o Vesi, a’o lea ua toe liliu ane nei le toeaina o Lefefe, e sua le aulapa uta ma le au lapa tai.

Ua atili ai ona fia nofo nofo Lefefe i le fale o Malia ma Mose, ona o lea o le a moe ai le lo’omatua malie o Lonisi. Fai mai le tala, e le i maua se malologa a le ma’i i lea po, ua na o le ‘ata ma fiafia i tauga a Lefefe ma le lo’omatua o Lonisi. O Lefefe, ua leva ona maliu si ona to’alua, ua fai fo’i aiga o lana fanau, ma e fa’apena fo’i la le lo’omatua o Lonisi, ua leva fo’i ona fai i lagi le folauga a si ona fo’i to’alua, o lea la ua fetaui nei pusi i luga o le aupa i lea po.

E moni lava, o le fiafia o le loto, e vave lava ona mou malie ‘ese ai ma’i, o le ’ata fo’i ma fa’atasitasi ma tagata malie, e te’i lava ua malosi ai le ma’i. Fai mai, ua fai nei tauga a Lefefe ma le lo’omatua o Lonisi. “Si aula, Lonisi, se o le a ea le mea ua tuai ai ona e ioe mai i a te a’u, ua leva ona ou fa’atali atu mo sau tali, ae e foliga mai o lo’o fa’a’ata’ata lava ma au mea.”

Ua fa’ate’ia Mose, Malia ma Vesi i le tala a le toeaina o Lefefe lea ua fai ane nei, ona e leai se tasi na iloaina le mea lea e tupu. Ua o’o ifo nei mafaufauga o Vesi e fa’apea, leitioa lava a fia moe le lo’omatua o Lonisi i lo latou fale, ona o lea o lo’o i ai se mataupu o lo’o fia talatalanoa ai ma le toeaina o Lefefe. Ua tilotilo nei Malia i a Mose, tilotilo atu Mose i a Vesi, ae ua na o le ‘ata o Vesi ma punou i lalo. Na toe tatao atu lava e Malia le tala a Lefefe, “E a ea ali’i Lefefe, o lona uiga o oulua ma Lonisi, o lo’o fai sina lua fa’anice i le taimi lenei.” Ua ‘ata ne’e le toeaina o Lefefe ma fa’apea ane, “Se ioe Malia, o ala lava o tama tane i tama’ita’i, e fa’apea lava ona fai.”

Na fa’ate’ia le fale ina ua fa’apea ane le tala a le lo’omatua o Lonisi, “ioe, ua leva lava ona ma talatalanoa ai ma le toeaina nei, ia ae moni ai le upu fo’i lea a tamaiti, pau le popo uli, oso mai le meauli, pau le popo sami oso mai le palagi, pa’u le popo sua oso mai le lo’omatua, ia o lea toe fai i fea nei mea, ua le toe suasua aile.” Ua alu nei le tali e, a le fale, fai mai ua pei e ‘ene e se isi le lo’omatua o Malia, ua nofo sasa’e a’e nei i luga ma alo atu loa e fai le talatalanoaga lea ua amata e le toeaina o Lefefe.

Na toe tali mai Lefefe, “Se Nisi, se ou te tautino atu i a te oe, afai e te faia le mea lea ou te fai atu ai, e te le toe savali i lalo, e fa’atau lava ou se’evae fou i aso uma, a e le mana’o i se’evae laiti, e uma uma high heels, o le fale oloa o le Kolea o Kimi ona ou fa’atau mai e te se’e ai, o au vali laugutu, o au lipisiki, o mea uma e te mana’o ai, e velo atu lava le mea latou e le toe fa’atali.”

Na ‘ata nei Vesi ma fa’apea ane, “Sole Lefefe, ua e toe fia la’ititi ua e matua, ia o le a le mea o le a e toe mafaia, ua pulapula lagoto le soifua.” Ua ‘ata fa’amaela Lefefe ma fa’apea ane, “Vesi, tailo lava i maso o tama pi’i pe maua maso nei, ua ou malie lava e si’i fa’asolo atoa Nisi pe a mana’o i ai, na ona ioe mai lava i a te a’u, si’i loa lava e le toe fa’atali.”

E faia pea...