Vaega: 33

Tatou va’aia ataata o ta’ulelei i lenei aso fou, ua o tatou fa’alogoina fo’i le tausagi mai o manulele e fa’ailoa mai le silisili ‘ese o le alofa o lo tatou Atua mo i tatou i aso uma o lou soifua fa’apea ma si o’u nei ola. Ona o tatou fa’apea ifo lea ma o tatou loto maualalo, “Le Ali’i e, sa e onosa’i pea i ou puapuaga a’o e alo atu mo Lau galuega togiola mo i matou le tagata agasala, ia malu Lou finagalo ma ia e fa’amagalo mai ia i matou, a’o le vi’iga o le fa’afetai ma le fa’amanu matou te fa’afo’i atu lava i Lau Afio e fa’avavau, fa’avavau lava, Amene.”

Ia manuia le alo atu o le mamalu o le atunu’u i faiva ma tiute o lea feagai ai i lenei aso, ae alo maia o lea toe fa’aauau atu la tala. Na muta mai ina ua feiloa’i nei Lilo ma ona matua, ma ua ma’ea ona fa’ailoa ane i ai e le tama lona manatu i le o’o muamua lea va’ai ma feiloa’i i matua o Loleta, ona fa’atoa o’o ane ai lea e va’ai la’ua.

Ae manatua fo’i, o le lo’omatua o Malia, o se tagata e ‘ese fo’i ona tafatafa, ae ina ua maua i ma’i o le tino lea na tauave solo ai mo se fofo e fesoasoani i ona tiga, o lea na suia ai mea uma i le soifua o le lo’omatua, ma ua tauto i a Mose ma le la fanau, o le a tu’u   ‘ese uma lava ona uiga tuai sa i ai, ae o le a suia i ni suiga lelei, e pei ona i ai le loto maualalo, le loto fa’amaualalo, le loto onosa’i ma le alofa.

A’o lea ua fa’alogologo ane le toeaina o Mose ma lona atali’i o Lilo, oka, ua pei e mafuli mai mauga ma pa pa faititili i lea taimi i le leo o le lo’omatua. Fai mai, na taufetuli ane nei Vesi ma Luisa i le fale o le lo’omatua ma le toeaina, ina ua fa’alogologo mai o mea masei mea ua tutupu atu. E fai o le leoleoa o le lo’omatua ma fa’ataitaio, ae, o le aunagi ane fo’i o le toeaina o Mose ina ia fa’ato’ato’a mea uma, ae ua le taofiofia le lo’omatua i lea taimi, ua alu ane nei le ao fa’aniuto i lana tama o Lilo.

“Lilo, se ou te ofo, ou te ofo lava a’u Lilo ia te oe, sa ou fa’apea o oe o se tama e tele lou loto, e muamua ia te oe ma’ua ma lou tama, a’o lea ua ou va’ai atu, oka, oka e,  Lilo, fa’alogo mai oe, ou te le fia to’ilalo i mea fa’apea, ua e fa’alogo mai, a ma fai atu e te lua o mai muamua ia ma’ua ona fai lea, ae le o le fa’aosooso ane o oe e le na isumu e leai se si’usi’u, ona e sau ai lea fa’apea mai au tala i a ma’ua. Lilo, ‘aua, ‘aua lava na i o’u toe fa’alogo atu i lau tala le na ua fai mai i le taimi lenei, oka, ua sili a’e ia te oe matua o Lofela ea po’o ai, ta inoino e, e ta fia maliu, e, lota loto e, o le a pa a’e…Lilo ia ‘aua lava, afai o uiga na o le na isumu ua e ta’u mai, ia ‘aua ne i o’u va’ai atu lava i ai i totonu o le aiga lenei, ua e fa’alogo mai, e sa sa lava ona pupula atu i ai o’u mata, mo le mea o le isumu ae fia teine mamafa mai, a’o ai lea pua’a ‘elo e ta’u mai ia te a’u…e le lalolagie e.”

Fai mai, ua na o le punou ifo o le tama i lea taimi ma lona loto mafatia, ua tilotilo ane nei i lona tama mo se fesoasoani, ae va’ai ane le tama, ua maligi ifo loimata o si ona tama i lea taimi. Na tu a’e nei i luga ma savali ane ua fusi lona tina. Ae ua le mafai le lo’omatua o Malia i lea taimi, ua tagi au e, au e, nei ma ‘ava’ava solo, ae taunu’u ane loa Luisa o Vesi ma si a la fanau.

Fai mai, na ona tilotilo ane lava o le teine o Luisa ua ‘ese le tulaga ua o’o i ai si ona tina, alu sa’o loa ia Malia i lea taimi. “Malia, se onosa’i, onosa’i, ia e va’ai alofa i si o matou tama, ua le lava fo’i le malosi o si toeaina e tatali ai nei mea, ae ia e alofa mai, va’ai mai ia ma’ua ma Vesi lea ua ma o mai ma si a ma fanau, tina, alofa mai, fa’ato’ato’a lou loto ma lou mafaufau, alofa mai.”

O le taimi lea, o lo’o ta’oto pea le tamaita’i o Filipina ma pulou lona ie’afu, fa’atasi ma ona loimata ua pei o timuga ua afu to ifo mai le lagi. Ua fa’alogo mai nei i le leo o lona tina, ua matua’i ‘ese lava, ua toe fo’i lava lona tina i ona uiga tuai sa i ai. Ua le mautonu ai lona loto ma lona mafaufau, aua o lea sa fa’atutu lona le malie i si ona tuagane, a’o lea ua fa’alogo atu i le leo o lona tina, o se leo lava e le maua ai se filemu ma se to’amalie o le aiga.

Fai mai, e le i umi lava, ae ulufale loa ma le toeaina o Lefefe, le matai o le aiga o Mose, ua tilotilo solo nei le toeaina, ma ona iloa ai, o le lo’omatua o Malia lea o lo’o tagi au e, au e, nei. “Malia, Malia, sa e fai mai fo’i i a matou ua suia mea uma, a’o lena lava e te fa’apena mai.”

E faia pea...