Ads by Google Ads by Google

Onosa’i I Mea Tiga

Vaega: 34

 

“Ieova o au e, o Lau Afio lava o le Mataisau o mea uma lava, o a lava faigata ma tiga e o’o mai i a i matou, e taula pea o matou loto i le mafanafana o Lou alofa, ia e alofagia si o matou atunu’u o Samoa, e amata mai i mauga maualuluga se ia o’o i mauga iti, ia E alofa, fo’ai mai le loto onosa’i ina ia mafai ai ona o matou talia faigata ma tiga o le soifuaga nei, a’o le vi’iga, fa’afetai ma le fa’amanu matou te fa’afo’i atu pea i Lau Afio e fa’avavau, fa’avavau lava, Amene.”

 

Manuia le alo atu o le atunu’u i faiva ma tiute o le a feagai ai i lenei aso, ae alo maia, o le a toe fa’aauau atu la tatou tala mo lenei aso. Na muta mai la tatou tala i le vaega lona tolusefulutolu, ina ua ufitia nei le aiga o Mose ma Malia i faigata ma tiga, ona o le tulaga ua mana’o i ai le la tama o Lilo. O lea la o lo’o tau fofo pea le fa’afitauli lea, ae taunu’u ane loa ma le toeaina o Lefefe.

 

Fai mai, o Lefefe, o le matai taule’ale’a a le toeaina o Mose, o se tagata fo’i e ‘aga malie, o se tagata fo’i e tele upu, fai mai, po’o le a lava le vevesi o se mea, e fofo fa’alelei lava e le toeaina o Lefefe. O le mea ua tupu, ae e le i o’o ane Vesi ma Luisa i le fale o Mose ma Malia, fai mai, na tuli muamua lava e Vesi si ona atali’i matua e alu e fai ia Lefefe e alu ane i le feau a Mose ma Malia.

 

O lea la ua taunu’u ane nei Lefefe, ma o se va’aiga fa’amomoi loto ua va’ai nei i ai le toeaina. Ua le iloa e Lefefe po’o fea o le a tu ai, e le o malamalama le toeaina po’o le a le mea lea e tupu ae po’o le a fo’i lona mafua’aga. Ua tu nei Lefefe ma pupula ane i le lo’omatua o Malia lea o lo’o tagi tautala.

 

“Oka, oka e, Lilo, e ‘ese lou leaga, ou te manatu fa’amaualuga lava ia te oe i mea uma lava, a’o lea ua ou va’ai atu, ua ‘ese mai ou uiga, afai o le lena tama’i isumu ua suia lou mafaufau, oka, se ua ta fia tago lima atu lava i ai, ae ‘aua, ‘aua lava ne i pupula atu i ai o’u mata i totonu o le aiga lenei, e ta inoino e, po’o ai lea manuki e ta’u mai ia te a’u….”

 

Ua soafa’i ifo nei i talane o Mose le toeaina o Lefefe, ona o lona fia malamalama i le mea ua tupu, o lea na musumusu ane ai loa Mose ia Lefefe, ta’u i ai le mea tonu lava ua fa’ataitaio ai nei le lo’omatua.

 

Ua le tautala Lefefe i lea taimi, ae ua na o le fa’alogologo nei i upu ua lafo e le lo’omatua o Malia. O ni upu lava ua le fia fa’alogo lava i ai se tagata, ua tilotilo atu nei Lefefe ia Lilo, ua na o le punou o le tama ma ona loimata o lo’o tafe ifo i ona alafau i lea taimi.

 

Ua le gagana le tama o Lilo i lea taimi, ae ua le mafai ona taofiofi ona loimata, ma lona loto ua matua’i manu’alia lava i upu ua lafo ane nei e lona tina. E moni lava le upu, e sili pe a sasa lota pa’u, ae ia tu’u upu ma tala, ona o upu ma tala, e le mafai ona galo, ma e le mafai fo’i ona toe ave’esea ona tiga.

 

Ua tau to’a le lo’omatua o Malia i lea taimi, ona o lea ua o’o ane i ai si ana tama fai o Luisa, ma si ana fanau e tau fa’ato’ato’a le lo’omatua. “Tina, onosa’i mai fa’amolemole, fa’ato’ato’a lelei lou loto ma lou mafaufau, o lea ua tunu’u mai si toeaina o Lefefe, o lea ua i totonu o le fale.”

 

Fai mai, na ona ta’u ane lava e Luisa i lona tina, o le toeaina o Lefefe lea ua i totonu o le fale, uma malie lava ma le leoleoa o le lo’omatua i lea taimi. Na liliu ane nei ma fa’apea ane i lana tama fai o Luisa, “Oi e a?, a’o fea na alu i ai le na le popoi o Lefefe, se o Lefefe se ua matua’i ova le faitatala, ai fo’i ua sau e fa’alogologo i a’u tala, o fea o i ai?”

 

Fai mai, o le taimi lea, ua fetilotilo fa’i solo mata o Lefefe, ua tilotilo ane nei i le toeaina o Mose ma fa’a’ivi ane i ai lona mata, aua ua iloa lelei e Mose le alofa o Malia ia Lefefe, o a lava mea a le aiga e fai, e ‘au lava Lefefe i tonu a Malia. Ua tau oso ai la le masalosalo o le loto o si toeaina o Mose, po’o le mea o fai si fa’anice a Lefefe ma Malia, ua tau oso ai le toto maualuga o si toeaina i lea taimi.

 

E faia pea...