Ads by Google Ads by Google

Onosa’i I Mea Tiga

Vaega: 39

 

Fa’atalofa atu ma fa’afeiloa’i atu i le mamalu o le atunu’u i lenei taeao fou, i lou alafa’i mai i le manuia i lenei taeao fou i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Le Ali’i e, ia tumau atu lava i Lau Afio le vi’iga o le fa’afetai ma le fa’amanu e le aunoa, ia e alofa mai mo i matou i lenei aso, foa’i mai le loto onosa’i ma le fa’apalepale ina ia mafai ai ona o matou lagona lou finagalo i mea matou te faia, a’o le vi’iga ma le fa’afetai e le aunoa i Lau Afio e fa’avavau, fa’avavau lava, Amene.”

 

Fa’amalo le onosa’i i le mamalu o le atunu’u, taeao manuia, ae alo maia, o le a toe fa’aauau atu la tatou tala mo lenei aso. Manatua, o lea o le a alu le fa’amalamalamaga a le tama o Lilo ma le matai o lona aiga o Lefefe, ae mulimuli atu ai ma le tama o Vesi. O Vesi lava ia, o lona fia fa’alogologo i tulaga fa’apea, pe fa’apefea ona fai le fa’amalamalamaga.

 

Ae o le upu moni lava ia, o lalo lava o le isu, aua o nei mea o tamaloloa, ua to’atele tamaloloa ua fai o latou papa ma o latou mu’umu’u, e uma tala ona fai e nei mea o tamaloloa, ae tatou onosa’i ia, o le soifuaga lava lenei o lo’o tatou ola ma soifua ai.

 

Ua manava galuega a le tama o Lilo, o le aso fo’i lea sa fa’ato’ato’a lelei lava le talanoaga a Loleta ma Lilo e tusa ai ma le tulaga o le a tupu i lea afiafi. O le mea ua tupu, e le o iloa e matua o Loleta o le a o’o atu le fa’amalamalamaga i lea afiafi. O le ala fo’i lea, ua tau alu feto’i ai le mafaufau o Loleta, aua ua fa’atei’a lona mafaufau ina ua fai atu Lilo o le a o’o ane i ona matua i le afiafi lea.

 

Manatua fo’i, o le aiga o Loleta, e fai le faleoloa, o le pa povi, o le pa moa ia fa’apea ma le a ‘oti. O le ala fo’i lea e fa’amaualuga ai lava le loto o Loleta pe a fai mea a le ofisa, e fa’aalialia, e fia teine mamafa, e fia teine maumea. O ona uiga ia ua iloa uma e le ofisa atoa, ae o le tama o Lilo, o se tama e tausa’afia ona uiga, e le o se tama e fa’aaliali ona uiga, ae e teu mau e Lilo uiga uma o le tagata.

 

Fai mai le tala ua alu le aso atoa o mata’i e Pule uiga o lana uo mamae o Lilo, manatua fo’i o Pule o le uo mamae a Lilo ma e faigaluega fa’atasi, e le fiafia Pule i le tama’ita’i o Loleta, ona o uiga o le teine ua masani ai tagata o le ofisa. Na mana’o lava Pule ia nonofo ma fa’atasi Lilo ma le teine o Lasi. Ae ui i lea, ia ua pau lava, le tala fo’i ia, “ia tu’u ia le tama a le lo’omatua e fai le mea ua loto i ai.”

 

“Lilo, ua e mautinoa lelei lava o lou tofi lelei lea.” Ua tali Lilo, “ioe, Pule, ua ou mautinoa lava o lo’u tofi lea, ae ia e onosa’i ia, a tonu lava e sau se taimi, o le a e iloa ai le alofa fa’amaoni o Loleta ia te a’u.”

 

Ua le tautala Pule, ae ua na o le pupula to’a ane nei i lana uo o Lilo i lea taimi. Ua lulu lona ulu ma savali ‘ese, ua iloa fo’i e Pule o le afiafi lea, o le a o’o ai Lilo e feiloa’i ma matua o Loleta. Ua na o le tilotilo ane nei o Pule ia Lasi, o se tama’ita’i e ‘ese le tausa’afia o ona uiga, e moni lava le upu, e tutupu mai tupu ia tupu, aua o le aiga o Valasi, o se aiga tautupu.

 

A’o fa’asolosolo mafaufauga o le tama o Pule, na i’u lava ina o’o i le laulau o lo’o saofa’i ai Valasi. “Lasi, o a mai oe, o e manuia?” Na tali Valasi, ioe, o lo’o manuia lava ia, ae na toe tali ane Pule, “Ua lelei, ae o fea o i ai lou loto, o nanei o le a o’o ai Lilo i matua o Loleta, e a?”

 

Ua le tautala le tama’ita’i, ae ua na o le tilotilo ane nei i a Pule, “Pule, o i ai se mea o fa’afatuulu i lou mafaufau.?” Ua le tautala Pule i lea taimi, ae ua na o le pupula to’a ane nei i a Valasi. “Pule, ia o le a fa’amamafa lava i lou mafaufau lena tulaga, ae va’ai oe, afai lava ua mana’o Lilo ia Loleta, e leai se mea o i ai, e pule lava le tamaloa latou i le la o si ona va’a, ae ‘aua e te popole i le na itu.”

 

E le i umi, ae va’aia loa e tagata o le ofisa le savavali ane i totonu o le toeaina ma se tama. Ua fesilisili nei po’o ai, ae na iloa ane e Lilo le alu atu o le solo a Lefefe ma Vesi i lea taimi. Ua tu a’e nei i luga ma savali ane ua fa’afeiloa’i, ma savavali loa i totonu o lona ofisa, ua pei o ni ufi e tutupu, fa’alogona o Lilo i lea taimi.

 

E faia pea...