Vaega: 43

Fa’atalofa atu ma fa’afeiloa’i atu i le mamalu o le atunu’u, i lou alafa’i mai i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola vaivai.

Ia manuia le alo atu o le atunu’u i faiva ma tiute o le a feagai ai i lenei aso. Na muta mai la tatou tala, ina ua tapena nei le aiga o Loleta e fa’atali mai le o’o atu o Lilo ma lana failauga le toeaina o Lefefe, lea fo’i o lo’o i ai ma le tamaloa o Vesi le to’alua o le tuafafine o Lilo.

Fai mai le tala, o le taimi atoa na fai ai sauniuniga a le aiga o Loleta, o le taimi fo’i lea o lo’o fai le talatalanoaga a Lilo ma lana failauga, ae o lo’o tu’i pea le mulipapa ma taupua’i faiva mai i fanua ia matua o Lilo, le toeaina o Mose ma le lo’omatua o Malia.

O lea ua iloa nei e tuagane o Loleta le fuafuaga ua i ai nei lo latou aiga, ma o lea ua tapenapena ai loa mea uma, aua fo’i le masi’i atu o le fala si’i gata, a le afioga i a Lilomaiava ma lana failauga. Ua talatalanoa nei Lilo ma Lefefe ma Vesi, “Lefefe, ua lafo atu lo’u fa’atuatuaga ia toe oe si o’u tama, ia malie fo’i lou finagalo ua ta’u tama atu lava oe, ae alo i ou faiva, o le a ma tapua’i ma le uso ia Vesi, ae o le a lafo atu ia te oe upu o le tatou afiafi.”

Ua punou Lefefe na ona ea a’e lava i luga o le toeaina alu atu loa ma le lauga e le i toe fa’atali. Ae manatua, o lea ua muamua fa’ata’ita’i i le Ofisa o Lilo le lauga a Lefefe, ae e le i o’o i matua o Loleta. O upu nei o le lauga a Lefefe, ua ma’ea ona tapena lelei, aua le feiloa’iga ma le aiga o Loleta.

“Ae ou te le i utufia le vai moe ma le vaita fai mai na momo’o i ai Letagaloa, e muamua ona ou fa’apoipoi tuvanu aua le paia o le aiga, tulouna le malae e afio ai tama ma o latou aiga, o aiga fo’i ma a latou tama. Ona ou tu ai lea i fatifatiga ma ou matamata i uluvao tetele. Ua fa’asolo mai fa’asolo mai le lauga a Lefefe, ua matua’i ninimo i le fa’alogo a Lilo ma Vesi upu ua tautala ai Lefefe.

Na i’u lava ina fa’apea ane Vesi, “Lefefe, ae a pe a fa’apu’upu’u la’ititi lava, ua fai lava si umi, aua ou te iloa o matua o Loleta ia ta’ilo, ai loga e lelei se fa’aSamoa a le toeaina ma le lo’omatua, e a, e sa’o a’u Lilo.”

Ua na o le punou o Lilo ma lulu lona ulu, fa’atoa fa’alogo lea o le tama i ni upu fa’apea, aua e moni lava e atamai lona tama le toeaina o Mose i lauga fa’aSamoa, ae e le ano ane lava i ai le tama, o lea la ua maua i le va lea, aua fa’atoa fa’alogo lea o Lilo i ni upu fa’apea.

Na tali le failauga o Lefefe e fa’apea, “Se a tele lava upu o le lelei fo’i lea o se mea, ma o upu fo’i nei, o upu e mamalu, e mamana fo’i, aua o lafolafoga ia fa’atama seugogo, o le lauga ua leva ona ou a’oina, o lea la ua maua le avanoa e fa’ailoa ai, se Vesi, fa’atali oe, se i ma’ea la’u lauga, ona ou a’oina lea o oe i lauga fa’apea, ia ae maise fo’i o le afioga ia Lilomaiava, leaga o Lilo lava ia, na o le fa’amaepaepa lava, ae vae ma lima tatou e tautua.”

Ua ‘ata Lilo ma tilotilo ane ia Lefefe, “Lefefe, se e leai, e le o so’u igoa le na, o le na fo’i ua e fa’aopoopoina le mea, na o Lilo lava lo’u igoa na fa’aigoa ai a’u e nai o’u matua.”

“Lilo, o lona uiga e le i tau atuina e ou matua le uiga o lou igoa, sole, se o mea la ia, o mea la ia lea e tupu ai le fenumia’i o mea uma, ae tu’u mai se i sau se taimi ona ta fetufa’ai ai lea Lilo. Ae o maia tatou o, ai ua fa’atali mai matua o Loleta, ai ua vela mai le moa sunusunu a le toeaina ma le lo’omatua.

Na fe’eu’eua’i nei Lilo ma Vesi ma tilotilo ane i a Lefefe ma savavali loa i fafo. Ua toe manatua e le toeaina o Lefefe, o lona uiga e le i ta’uina e Mose ma Malia i a Lilo le uiga o lona igoa. Ua alu le solo i fafo, a’o le taimi lea, ua matua’i sekueli palegi lava le failauga i lea taimi.

E faia pea….