Ads by Google Ads by Google

Onosa’i I Mea Tiga

Vaega: 56

 

Alo maia, o lea toe fa’aauau atu la tatou tala mo lenei aso. Na muta mai la tatou tala, ina ua fai nei le talatalanoaga a Mose, Malia le matai o le aiga o Mose le toeaina o Lefefe fa’apea ma le fanau a Mose ma Malia. Fai mai, o le faletali e, ua fai nei ona o uiga ma tala a le lo’omatua o Malia ua fai nei.

 

Ae le iloa atu le tulaga ua o’o i ai le aiga o Falaniko ma le lo’omatua o Susitina, lea ua toe titi pa’i lima le lo’omatua ma le matai o le aiga o Falaniko, fa’atasi ai ma lona mana’oga ia fai loa le fa’aipoipoga a le la tama ma le tama o Lilomaiava. Na toe liliu ane lava le lo’omatua o Malia ma fa’apea ane ia Vesi ma Lefefe.

 

“Ia fai mai se lua tala, e a la le lua va’aiga i le tama’ita’i ua fa’ananau i ai le loto o Lilomaiava?” Fai mai le tala, ua fetilotilofa’i solo nei Lefefe ma Vesi, ua le iloa po’o ai o la’ua o le a tali i lea taimi, ae na fai ane Lefefe i le lo’omatua. “Malia, ia malie maia lou loto, oe le lo’omatua faigata, va’ai, se i o’o mai lava Loleta, ona e va’ai tino lea i ai, ae e leai se ma tala ma Vesi e faia, ona o lea fo’i o lo’o afio le afioga ia Lilomaiava, malie mai ai lou finagalo oe le lo’omatua faigata.”

 

Fai mai le tala, ua ‘ata’ata le lo’omatua o Malia ma tilotilo ane i si ana tama e pele i lona loto o Lilo. E moni lava o lo’o i ai si ana fanau teine e to’alua o Luisa ma Filipina, ae e pele lava i le lo’omatua lana tama tama o Lilo. Ua le tautala Lilo i lea taimi, ae ua na o le punou.

 

Ae fai mai le tala, ina ua taunu’u ane le savali a Lefefe ma Lilo ma Vesi i le aiga o Loleta, ae na fa’ate’ia le toeaina o Lefefe i le va’ai atu, o savali mai le tama’ita’i ma lona ofuae vae pupu’u, o ana vali laugutu ma ona mata ua vali fa’asolo atoa. O le upu moni lava, fai mai o i’ina lava na liliu ai le loto ma le mafaufau o le toeaina o Lefefe.

 

E le gata ia Lefefe, ae ua fa’apea fa’alogona na o’o i ai Vesi, o se va’aiga e le fiafia i ai, ae ua leai se la tala na fai i le lo’omatua, ona ua iloa lelei lava e Lefefe ma Vesi le tulaga e o’o i ai, o lona uiga o i’ina fo’i e oso ai le fe’afe’a o le lo’omatua o Malia. E muliga fo’i le fefete o le si’usi’u o le pi pi a le lo’omatua o Susitina i le fefete o le si’usi’u lea o lea fa’alogo i ai i lea afaifai.

 

Ua na o le punou o le toeaina o Mose ua le tautala, ae o lo’o fa’asolosolo lemu ona mafaufauga i le uiga o le mea a le aiga o teine lea ua fai, ae maise ai o le naunau o le lo’omatua ia vave loa ona fai le fa’aipoipoga a le la tama ma lona atali’i. Ua tu’u fesili i le mafaufau o Mose, po’o le a lava le mea ua naunau ai le lo’omatua, le tina lea o Loleta, ina ia fa’atino loa le fa’aipoipoga.

 

Fai mai, o lea ua fai lava le faletali e, a Malia ma lana fanau ma Lefefe, ae latou te le o iloa le mea ua o’o i ai mafaufauga faigata o le toeaina o Mose. Ua tau masalosalo le loto o le toeaina, po’o le mea, ua ma’itaga le teine, po’o le mea fo’i o i ai se isi tama i le olaga o le teine o Loleta, fua i le naunau o lona tina ia fai loa le fa’aipoipoga.

 

Fai mai, na i’u lava ina ta mau i le mafaufau o le toeaina o Mose le manatu e fa’apea, “Oi ta fe fe, o lona uiga ua ma’i tagata le teine, fua i le mana’o o le lo’omatua o Susitina ia fai loa le fa’aipoipoga, oi le Ali’i e, o le mea tonu lava lea ua tupu nei, ‘ai ua ma’i le teine.”

 

E faia pea...