Ads by Google Ads by Google

Onosa’i I Mea Tiga

Vaega: 61

 

Na muta mai la tatou tala ina ua talatalanoa nei le toeaina o Mose, Malia ma le la fanau, o lea la e siu su’e lava e le toeina o Mose le ‘au o le paipa, po’o le a tonu le mea na tupu i le malaga na alu nei e fa’amalamalama i matua o Loleta. Fai mai, ua tau mafaufau nei Lefefe i se tala e fai ane i le toeaina o Mose, ae na fa’ate’ia le fika a Lefefe ina ua toe fa’apea ane Mose.

 

“Lefefe, ou te mana’o ia e tautala sa’o mai ia te a’u, ‘aua lava ne i nanaina se mea e tasi, ta’u mai ia te a’u, ia e pepelo lava i nisi mea, a’o le mea lea, ia e tautala sa’o mai ia te a’u.”

 

Fai mai, na vave lava ona tilotilo ane Lefefe ia Vesi, ae na lue ane i ai le ulu o Vesi, o lona uiga, ia ta’u sa’o ma ia tautala sa’o loa Lefefe i a Mose i mea uma lava. Ua fa’apea lava ona fai, fai mai ua fa’amatala uma nei e Lefefe ia Mose mea uma na tutupu.

 

“Mose, a e va’ai i lavalava o le teine na o matou o’o atu o ‘ofu, se na moei’ini o’u mata ma ou tilotilo atu ia Vesi. Ua pei o ni lavalava o se teine pa’umumutu ia lavalava o Loleta. O ona mata, ua matua’i vali atoa, ia pei o se teine ta’apo.”

 

Ua le tautala Mose ae ua na o le lulu o lona ulu, a’o Vesi lenei, ua ‘ata ma punou i lalo. Ua fa’aauau pea le tala a le toeaina o Lefefe. “Mose, e ‘ese fo’i uiga na o ma va’ai i ai ma Vesi, e fai o uiga o le teine, ae o uiga leaga a lona tina, ou te fai atu lava Mose, ua  matua’i i’ivi lava o’u mata. Ae e le mavae le alofa i Lilo, o le mea fo’i lea sa teu ai i lo’u loto, po’o le a lava le tauanau mai a le lo’omatua o Susitina, sa leai lava sa’u tali na tu’u i ai.

 

Sa teu pea i lou loto, o lo’o oulua alo i le faiva o tapua’i, ma o lo’o oulua fa’atali atu fo’i mo se tala e uiga i le matou malaga, ae o le mea moni lava, ua le taofiofia le lo’omatua o Susitina, ua mana’o lava ma ua naunau lona loto ia fai vave le fa’aipoipoga a Lilo ma lana tama.”

 

“Ia o se tala atu le na e tusa ai ma le matou malaga na alu nei, ae e lafo atu lava ia te oulua ma le lo’omatua e te lua fetufa’ai ai, ae o la’u tu’u alalo, ia a’ami ane Lilo e fai se tou tala po’o fea o i ai lona manatu e tusa ai ma lenei mataupu.”

 

Fai mai le tala, e tautala ane lava Lefefe, a’o le taimi lea, ua matua’i afe maila musele o le fai’ai o le toeaina o Mose, e tau fa’avasega tala ia ua fai ane e Lefefe ia te ia. Ua le mautonu ai la le mafaufau o le toeaina, i lea taimi, ma ua na o le punou nei ma lulu lona ulu. Na i’u lava ina oso ifo le fa’aopoopoga a le tamaloa o Vesi.

 

“Mose, o le tala ua fai atu e Lefefe, o lo’u fo’i lea manatu, ma ua uma fo’i ona e silafia, oe le tama, o a’u ou te tautala sa’o atu lava i se mea o i ai lo’u manatu ma lo’u loto, ma o la’u tala lenei, e toe fetu’uana’i fo’i i ai le tofa ma le fa’autaga i a te oe le tama, Mose, ou te le mana’o e nonofo Lilo ma Loleta, e tele lava mea e mafua ai, lo’u le mana’o, ma e ma’imau Lilo i lenei teine fa’apea.”

 

Ua atili ai ona nenefu ata a le toeaina o Mose, o lea ua uma ona tautala mai Lefefe,a’o lea ua toe fa’aopoopo ane lona atali’i o Vesi, ua matua’i nunumi fa’asolo atoa ai ala toto o si toeaina i lea taimi. Na toe liliu ane lava Lefefe ma fa’apea ane, “Mose, se ma’imau pe ana tatou o, a e va’ai i le tina o Loleta, oka, e fai fai fo’i le malie lo’o ta’a i le sami e feololo, ua matua’i fea’i le lo’omatua i lona mana’o ia fai loa le talanoaga mo le fa’aipoipoga, e loka faku e, pei a ka’e.”

 

E faia pea….