Vaega: 64

A alo maia, o le a toe fa’aauau atu la tatou tala mo lenei aso. Na muta mai la tatou tala, ina ua te’i valevale a’e i luga le tama o Lilo ma fa’apea ona manatu, ua ma’itaga Loleta, fua i le naunau mai o lona tina ia fai loa le fa’aipoipoga. Ae se i o tatou fa’atalitali pea, pe o le a le tulaga o le a o’o i ai le fa’amoemoe o le afioga i a Lilomaiava.

Ua ma’ea le talanoaga a Mose ma Malia e uiga i le mataupu na talanoa ane ai Lefefe, ina ia fai vave loa se feiloaiga, se tau sa’ili ai po’o le a tonu le mafua’aga ua manatu ai le tina o Loleta, ina ia fai vave loa le fa’aipoipoga. Fai mai, e le i au le ‘afa a le lo’omatua o Malia, ae na fa’amalamala pea e le toeaina o Mose le autu o sona manatu, o lea na tau tu’u mai ai i lalo le agi a le matagi, a le lo’omatua.

“Mose, va’ai oe, e moni lava oe, ae e i ai fo’i nisi itu ua ou le fiafia ai tele i le aiga o le na tama’i isumu, va’ai, ua ou toe mafaufau, e i ai lava le mea malie o lo’o tupu. Ae se i o’u talanoa atu pea, e i ai lava lo’u manatu o lo’o i ai se mea matuia lava ua tupu i le na tama’ita’i o Loleta, fua i le naunau mai e fai le feloa’iga.”

Ua le tautala le toeaina o Mose, ae ua na o le punou nei i lalo, na toe ea a’e nei i luga ma fa’apea atu ia Malia, “Lia, va’ai oe, malie maia lou loto o a lava o tatou manatunatuga ma o tatou mafaufauga, ua na o ni mafaufauga lava, ae e tasi lava lona taunu’uga, ia tatou talatalanoa ma matua o Loleta, ona o ta maua ai lea o le tonu sa’o ma le mea o lo’o tupu, e sa’o a’u.”

Ua le tautala le lo’omatua o Malia i lea taimi, “ia ae a, e tasi lava lo’u masalosaloga Mose, ou te iloa ua ma’i le teine, fua i le naunau mai e fai loa le fa’aipoipoga, ae se o ta talanoa i a Lilo, pe moni, pe leai, oka, oka e, Mose, o lona uiga ua muamua ta le ‘aufa’i, ae mulimuli fa’anoi, oi lo ta loto e, pei a malepe.”

“Mose, ta fefe ae iloa nei e tagata lenei mea, aemaise ai o le nu’u ma le Ekalesia, o le a nei le mea o le a fai, oi ta fe fe, Mose, ua fai e Lilo le mea ua sili ona ou tiga ai, ailoga e iloa e Lilo o’u mafatiaga lea o lo’o i ai nei. E le i taitai lava ona fai sona to’alua, e moni ai le tala a Filipina, e le i taitai lava uma ona totogi lana aitalafu, a’o lea fo’i ua toe tupu mai ma lenei mea, oka, oka e, Mose na o mea lava e vave ai ona pe lo ta fatu, uma atu ma taita.”

Ua atili ai ona punou ifo i lalo le toeaina o Mose, ua le tautala. Na toe tuli tatao mai lava e le lo’omatua, “Mose, ou te le fia oti vave, oi ae a fai o mea ia o lo’o tutupu mai, oka, Mose, e vave ai ona ou le toe va’ai ia te oe, aua po’o le a lava le tele o le tiga o lou ulu ia te a’u, ae o nei tausaga e tele o le ta mafutaga, sa e onosa’i lava i mea uma, fa’afetai Mose, si o’u to’alua pele.

“Afai fo’i sa i ai ni taimi na e fa’alogo ai i lo’u leo, ma va’ai fo’i ou mata i mea e le talafeagai ma lau silasila, ia malie lou loto si o’u to’alua pele, ona ua pau fo’i o uiga o lenei lo’omatua, ae ua ou talitonu lava i lou alofa fa’amaoni ia te a’u, i mea uma lava, fa’afetai Mose, ae o le a ou talia le mea ua e mana’o i ai.

Ua fa’apea lava ona fai, ua tapena nei le feiloa’iga a Mose, Malia ma matua o Loleta, ona o mea ‘ese ia ua iloa nei e le toeaina ma le lo’omatua, ma o le upu moni lava, o lo’o fia iloa lelei po’o le a le uiga o nei mea uma. Na fiu Lilo e fa’atali le o’o ane o Loleta e faigaluega i lea aso, peita’i, na vala’au ane, e le faigaluega i lea aso.

Fai mai, ua atili ai ona niniva fa’asolo atoa le fai’ai o Lilo, ma ua mautonu ai loa i lona loto ma lona mafaufau, e moni lava, ua i ai le mea ua tupu ia Loleta, ae ua le tautala sa’o mai ia te ia. Ua fa’aauau pea galuega a Lilo, ma o taimi uma lava, e alu lava lona mafaufau ia Loleta, ma fa’apea ona mafaufauga, a ou ‘osi’osia le pepa lenei, pei lava ua ou ‘osi’osia fela o Loleta.

E faia pea...