Vaega: 67

Alo maia, o le a toe fa’aauau atu la tatou tala mo lenei aso. Na muta mai la tatou tala ina ua talatalanoa nei Mose ma si ona atali’i o Lilo, ma ua iloa ai loa e le toeaina, mafatiaga o lo’o feagai ma si ona atali’i.

Ua fa’asolosolo aso o le olaga, ua uma fo’i ona fai le feiloa’iga a matua o Lilo ma matua o Loleta. O le mea ua tupu, e moni lava masalosaloga ua ma’itaga Loleta, ae o le upu moni lava, e le o se to a le tama o Lilo, e leai. O le mea fo’i lea o lo’ofa’afatu’ulu lava i le mafaufau o Lilo.

O le mea ua tupu o lea ua iloa e matua o Lilo le mea ua tupu, o le ala fo’i lea sa o la naunau ai loa ina ia fai le fa’aipoipoga, ina ia tau nana ai le mea lea ua aliali mai. Pau le tagata o lo’o ia iloaina le mea lenei mai lava i le amataga o le lo’omatua o Susitina, le tina o Loleta. Ae fai mai, e leai ma se gagana o le lo’omatua i se mea e tasi, ua fai lava lona fia tagata ua le mana’o ia ta’uleagaina le igoa o lana tama.

O le misitelio lilo lea, o lo’o natia e Lilo i lona loto ma lona mafaufau i le fa’asologa o le mafutaga ma Loleta. E moni lava ua taumafai Lilo e fa’agalogalo, ae e le mafai lava. E foliga mai, ua fa’aaoga ia e matua o Loleta, e tau pupuni ai le mataga lea ua tula’i mai i le la tama. Ae fai mai le upu, e fiu lava e nana le tama’imoa, ae i’oi’o mai lava.

Ua uma le fa’aipoipoga a Lilo ma Loleta, ma ua amata loa le la aiga, ae fai mai, na finau malosi le lo’omatua o Malia, ia nonofo Lilo ma Loleta i lo latou aiga. O le manatu o le lo’omatua, se i va’ai i uiga o Loleta pe talafeagai ma lana tama o Lilo.

O a lava faigata ma mafatiaga na o’o i ai, ae ua fa’ataunu’u lava, ona o le alofa o Mose ma Malia i le la tama, ae o le misitelio o lo’o natia pea e o’o lava i le aso na fai ai le fa’aipoipoga o lea lava e nofo ma Lilo ma lona loto mafatia. Fai mai, ua uma ona ta’u ane e le lo’omatua o Susitina ia Lilo le mea o lo’o tupu ia Loleta.

O le aso na iloa ai e Lilo, o le aso fo’i lea na to’otutuli ai Falaniko ma Susitina i a Lilo, ma fai ai le fa’ato’esega, ae e le o iloa lava e matua o Lilo se mea e tasi. O lea lava ua mimita le lo’omatua o Malia, o le a maua se atali’i po’o se afafine o si a la tama, e tausia aiga. E fai lava la le fa’aipoipoga, ae ua pei o se ao uliulito o lo’o pulou ai le ali’i o Lilo.

Ae fai mai, o uiga o Loleta i lea aso, e le salamo, ua na o le ‘ata’ata ma tilotilo ane ia Lilo. Ua ‘ai tonu si ana maugu i le ulu o Lilo, ae fai mai, le upu fo’i lea, e tuai lava, ae fai mai. O lea lava ua nofo Lilo ma ona tiga ma ona mafatiaga, a’o lea o lo’o ‘ata’ata Loleta, ua tali ioe Lilo i ona matua.

Talofa i si o tatou olaga, ia ae tatou onosa’i pea, e pei lava o na i ai le igoa o la tatou tala fa’asolo, “Onosa’i i Mea Tiga.” O lea la ua feagai nei Lilo ma ona tiga, ma e le o ni tiga laiti o le matua’i mafatia lava o le loto o Lilo. Ae fai mai le tala, e le o se tagata e tautala so’o, e le o se tagata fo’i e gaoia i se mea, e nofo lava, ae o lo’o ia maitau uma lava tala ma uiga o tagata.

Ua nonofo fa’atasi nei Lilo ma Loleta ma matua o Lilo o Mose ma Malia, o se avega mamafa ua amo nei e Loleta, aua fai mai, e leai se mea e gole i le lo’omatua o Malia. A va’ai atu Malia o fai mai ni lavalava fa’aletonu o Loleta, “E Loleta, alu e toe tatala ‘ese ou ‘ofu na, ua e le toe teine, ua e fafine, fai mai aga fa’atina, ae le o le fai mai o au aga na e vave ai ona to’ulu mai i lalo lou lauulu.”

E faia pea...