Onosa’i I Mea Tiga

Vaega: 68

 

Aalo maia, o le a toe fa’aauau atu la tatou tala.

 

Ua fa’asolosolo pea aso o le soifuaga, ae o lo’o tulimata’i pea e le toeaina o Mose ma le lo’omatua o Malia, ia uiga fa’aalia o le tama’ita’i o Loleta. Fai mai le tala, o isi aso e o’o ane ai le teine, e maitau lava e le lo’omatua ona foliga, e pei e mana’o e moe i taimi uma. A le o le na, ua na o le fa’agaulua i le isi itu o le fale. A’o le mea na iloa e le lo’omatua na avea ma ona masalosaloga, o le va’ai atu lea i le teine, ua amata ona fa’asuati.

 

Ina ua toe fo’i le tama’ita’i o Loleta i lea afiafi i lo latou aiga, na maua ai loa le taimi e talatalanoa ai Mose ma Malia. Na fa’atei’a le toeaina ina ua fa’apea ane Malia, e i ai lava le mea ou te fia talanoa atu ai ia te oe, a fai e sa’o la’u va’ai, e pei lava ua ma’itaga Loleta, e sa’o a’u.”

 

Ua le tautala le lo’omatua o Malia i lea taimi, ae ua na o le tilotilo ane ia Mose, “Mose, se ou te fai atu sa sili ai pe ana fai sou papa ma sou mu’umu’u, ou te ofo i lou iloa o na mea, o outou tamaloloa se, e fai fai fo’i gutu o fafine e feololo, Mose, se o galuega a ia a mea nei o tamalolo, o le umukuka lava, ma le fa’atoaga, ae le o le faitatala ma fela’ula’ua’i tala, o se mea ua matua’i le lelei lava le na mea.”

 

Ua le tautala le toeaina o Mose, ae fai mai, ua onosa’i lava le toeaina, ona a fa’afetaui loa, o lona uiga e fa’alogologo uma tuaoi o alu atu le pi tautau a le lo’omatua ma ua sili ai loa pe a tu’u.

 

Ua le mautonu le mafaufau o Loleta, fai mai, a o ma Lilo i le galuega, ua le toe mana’o Loleta e talanoa se tama’ita’i ia Lilo, ua mana’o na o ia lava. Ae o le faletupe o lo’o faigaluega fa’atasi ai nei, e feagai lava Lilo ma galuega faigata, ona o ia o lo’o va’ai le aufaigaluega, lea la e lavea atu ai ma Loleta.

 

O aga a Loleta, fai mai, ua le o’o i se va’a afi, ua na o va’a meli e mafaia. Ua iloa uma fo’i e tagata faigaluega uiga o Loleta, ua fia teine mamafa, ae a fuafua atu i  ai pe a i le selau onosefeulu ona pauna, fa’aopoopo atu loa i ai ma le tama’i Loleta lea ua ola ola ae i totonu, ona maua ai lea o le luaselau pauna. Ua leai se isi o le fale faigaluega ua le maitauina uiga ma aga a Loleta, ua pei o ia ua pule, ae le o Lilo.

 

Manatua fo’i, o lo’o i ai le uo mamae a Lilo o la faigaluega fa’atasi le tama o Pule, ae ina ua uma le fa’aipoipoga a Lilo ma Loleta, ua iloa lava e Lilo ua sui uiga o Pule ia te ia. Ae sa fa’ata’ata’a lava le moa, aua e i ai le taimi e ioio mai ai, e le i amanaiaina e Lilo uiga ia o Pule, aua ua iloa lelei e Lilo, o Pule e amio fa’akomikomi i isi taimi.

 

Na i’u lava ina tau fetaui Loleta ma le isi teine o le fale faigaluega, fai mai, e le i va’ai lava le teine i se pito, “E Loleta, tu’u au aga na se i e o’o i le fale ona fai lea, a e sau i totonu o le fale faigaluega lenei, e tutusa uma lava tatou, ua e fa’alogo mai, ia va’ai fo’i oe e pa mai i fafo lou isu, fai fai lamu mai, fai fai lamu mai, tu’u au figka, e le o oe o se pule, ua ma’imau Lilo ia te oe, e lo ta fatu e, o le a nuti.”

 

E faia pea...

Comment Here