Vaega: 79

Ae alo maia, o le a toe fa’aauau atu la tatou tala mo lenei aso. Na muta mai la tatou tala, ina ua suiga malie mea uma i totonu o le aiga o Malia ma Mose, e ala lea i suiga ua i ai nei le aiga i ona itu uma.

Ua iloa e Mose ma Malia, ua mautu le aiga o Lilo ma Loleta, ae o lea e va’ai atu i a Filipina, ua tau lagona ai le fa’anoanoa o le lo’omatua ma le toeaina, ona e va’ai atu i a Filipina, e le o i ai lava se manatu o le teine i se tama o le nu’u. Ae fai mai le tala, ua matua’i lalelei Filipina i le va’ai, o foliga uma lava o lona tina a’o talavou lea ua iloa nei e Malia.

Na i’u lava ina fa’apea ane le toeaina o Mose, “Malia, ua pei ua ou toe va’ai ia te oe le lo’omatua i aso o lou talavou pe a ou va’ai i si o’u afafine o Filipina.” Fai mai, ua ‘ata ta’avalevale le lo’omatua i lea taimi, ma fa’apea ane, “Mose ma le ‘ato’ofe, va’ai oe, a fo’i o o’u foliga a ia na e sopo atu ai, i lou fia faiava ia te a’u, ou te le i savali mai ia te oe, e leai, o oe na e sopo atu, tiga le mamao o le ala ma le pogisa, e te le i fa’avaivai ai, a ea.?”

Ua le tautala le toeaina o Mose i lea taimi, ua pei ua oso a’e se tiga aua e sa’o lelei lava tala a le lo’omatua lea ua fai ane ia te ia. “Ioe, Malia, na mafua lava lo’u sopo atu, ona o lo’u alofa atu ia te oe, e ‘ai lau popo, ae ina’i i le esi, ae na e o’o mai loa i lo’u aiga, ua na o le ‘ai lava o lau falaoa ae fa’apata i le pata, po’o le siamu.”

“E te le i masani ai i lou olaga atoa, ae o lena lava e tau maitau mai lava au mea, ia o mea na, o lo’u alofa fa’amaoni ia te oe le tama’ita’i faigata. Ae e le galo ia te a’u, lou tina, leaga lava le lo’omatua e poto tele e fa’apili a’u, a ma talanoa nei, e ‘ese fo’i le malie o uiga o si ou tina, a’o ou uiga, se ana tu’u ‘ese ou uiga fia teine leaga, ua leva ona e lelei, ae fai so’o na uiga faigata, na o le tiga ai o lo’u ulu ma tau oso mai ai lo’u musu.”

Fai mai, ua na o le ‘ata o le lo’omatua o Malia, “Mose, va’ai oe le tama faigata, po’o le a le tele o au teine ma au pa’aga, e tasi lava le tagata ua fa’ananau i ai lou loto, na o le teine lenei, e a e sa’o, ua ou iloa au mea valea uma lava, ae ou te le o popole i ai Mose, pau lava lea, ua e sopo atu e su’e mai a’u, ia la lea, la lea.”

Fai mai, na iloa lelei e le toeaina o Mose, e alu alu lava i’u ina taua’imisa ai i le va lea, o lea na ia fa’apea ane ai i si ona to’alua fa’apelepele, “Se Malia, o le a ea le mea o le a fai i a Filipina, ou te va’ai atu lava, e leai lava se naunau o le loto o Filipina e fai sona to’alua, a’o lea ua mautu Lilo ma Luisa, ae toe lava o ia lea ou te popole i ai.”

Na te’i lava ua fa’alogo atu le toeaina, ua tautala mai le lo’omatua, ua tagi, “Mose, o le mea lea e mamafa nei i lo’u loto, o lo’u fia va’ai o fai se to’alua lelei o si a’u tama o Filipina, ae a fa’apea fo’i e mana’o e fai sona tofi i le lotu, e leai lava se mea e leaga ai Mose, a o mea lelei mea na, ae o la’u tagi atu i le Atua i ao ma po, fa’ailoa ma alofagia Filipina i mea uma, “O a ni aso o totoe o lo’u ola, ou te fia va’ai i si a’u tama o i’u lelei lona olaga, atonu fo’i, o lo’o i ai lava lona mafaufau mo sona lumana’i manuia, ae sili ia pe a ta fa’atalitali pea, po’o le a se iuga lelei e au mai e Filipina mo ta’ua ta te fiafia.”

E faia pea...