Onosa’i I Mea Tiga

Vaega: 89

 

Na muta mai la tatou tala, ina ua maua atu e le tuagane matua o Loleta, le tama o Lolesio le ta’avale a Lilo ma Loleta o lo’o tu i le auala. Na fesili loa Lolesio i lona tuafafine, pe ua i ai se mea ua tupu, na tali ane i ai Loleta, o lo’o i ai le mea ua tupu o lea e mafatia ai le loto o Lilo.

 

Ua fa’atafa nei i tua le ta’avale a Lolesio ua paka ai, ma savali mai loa i le ta’avale a Lilo ma Loleta, ua oso mai nei i fafo Loleta ma savali mai e fa’afetaui le alu atu a lona tuagane. Fai mai, ua fa’atei’a Lolesio i le tala ua fai ane nei e lona tuafafine ia te ia. O le fesili muamua lava a Lolesio, po’o a mai le lo’omatua, pe ua iloa e Malia le mea lea ua tupu ia Filipina.

 

Na tali Loleta, o le mea lea o lo’o agai atu iai, e fa’ailoa i le lo’omatua le mea ua tupu i le falema’i. Fai mai, na savali ane nei Lolesio ma tatala le faitoto’a i le itu o lo’o nofo ai Lilo. “Lilo, se talofa se, ia fai po’o le a le tonu, ae ia e loto tele uso, va’ai i si lo’omatua, ua matua fo’i Malia, toe pau lea o si o tatou tina o lo’o totoe, fa’ato’ato’a lelei lou mafaufau ma talanoa filemu i si lo’omatua.”

 

Fai mai, ua le tautala Lilo i lea taimi, ae ua a’apa ane le tuagane o Loleta ma fusi atu i lea taimi. “Lilo, loto tele, ‘aua e te loto vaivai, afai e mo’omia se fesoasoani, ia vave logo mai a’u, o le a ou fa’atali atu mo se tala, ae o mai i na o, ia logo si lo’omatua, ma ia fa’ato’ato’a lou mafaufau Lilo.”

 

Fai le tala, a’o le i maliu le tina o Loleta, ua uma ona talanoa le lo’omatua o Susitina i lana fanau tama, i le tupua lilo sa ia natia mo tausaga e tele. O lea fo’i la ua iloa e tuagane o Loleta, ua lagona ai le alolofa ia Lilo, ona ua le manatu lava Lilo i nisi itu, ae ua alofa fa’amaoni Lilo i si o latou tuafafine e to’atasi. O le ala fo’i lea, po’o le a lava le mea e mana’o i ai Loleta, e fai lava e ona tuagane, aua o le mavaega lea a lo latou tina, ae le i maliu, ia tausi ma alolofa i si o latou tuafafine, ma ia alolofa ia Lilo ma lona aiga.

 

Fai mai, e le misi le suavai a le lo’omatua o Malia, e momoli lava e tama i le fale, o le tele fo’i o taimi e fiafia tele tuagane o Loleta e o e asi le lo’omatua o Malia, aua fai mai, a ta nei le faleaitu a le lo’omatua, na o le talie o nai tama. Ua toe alu le ta’avale a Lolesio, ae paga lea, ua mamafa lava i lona loto le mea ua tupu, ae ua uma ona fa’amatala e Loleta i lona tuagane, o lo’o fa’atali mai Luisa ma le tausoga o Lilo i le falema’i.

 

Fai mai, na ona liliu lava o le ta’avale a Lolesio, faga sa’o loa i le falema’i. Ae e le i o’o le tama i le falema’i, na afe le ta’avale i le fale’aiga e fa’atau ai le mea’ai a Luisa ma Mareta, ona fa’aauau ai lea o lana malaga e agai atu i le falema’i. Na fa’ate’ia Luisa ma Mareta ina ua tu ane Lolesio ma le la mea’ai. Ua tu’u fesilisili nei i le mafaufau o Lusia, ai ua logo e Loleta ona tuagane i le mea ua tupu i a Filipina.

 

“Luisa, ia tatou loto tetele, ‘aua e te loto vaivai, o faigata lava nei ma mafatiaga o lo’o feagai pea ma i tatou i aso uma, ae ia e loto tele. Ua saofa’i ifo nei Lolesio i talane o Luisa ma fusi Luisa i lea taimi. Fai mai ua atili ai ona tagi le teine, e taunu’u ane Lolesio o fai lava fetagisina a Luisa ma Mareta.

 

E le i umi, ae toe savali ane loa le tama’ita’i tausima’i,“O oe o Luisa?” O le fesili lea a le tama’ita’i tausima’i. Na tali Luisa, “Ioe, o a’u o Luisa, e i ai se mea ua tupu i si o’u uso, fa’amolemole, e i ai se mea ua tupu i si o’u uso?”

 

E faia pea...

Comment Here