Vaega: 92

Alo maia, o le a toe fa’aauau atu la tatou tala, ae ia manuia lou alo atu i faiva ma tiute o le a feagai ai ma oe i lenei aso. Na muta mai la tatou tala, ina ua maua le tala fiafia na toe ala a’e i luga Filipiina, ina ua uma ona ia fanauina se tama tane. Peita’i, o lea e fa’atalitali pea Luisa ma Mareta i le falema’i, mo se isi tala ma se fa’aiuga a foma’i pe tatau ona o i le fale pe leai. Ua alu Lolesio i lo latou fale i lea taimi, ae ua tu’u nei na o Luisa ma Mareta i le falema’i.

O le taimi lea, o lo’o mafuta pea Lilo, Loleta ma lo’omatutua i le fale o le uso o Malia. Ua le toe i ai se popole i le loto o Lilo, ae manatua fo’i, e le o i ai Lilo i le falema’i, ua na o Luisa ma Mareta lea o lo’o i ai. Ua manatua vave e Lilo le to’alua o lona tuafafine, le tamaloa o Roger, lea ua alu lana malaga i Ausetalia.

Na toe mafaufau nei Lilo, e le iloa po’o fea e maua i ai Roger, ae na toe fa’apea ane i ai Loleta, e tatau ona o i le Ofisa o le Va’alele lea o lo’o faigaluega ai Roger, e ta’u ane se telefoni e mafai ai ona fa’afeso’ota’i i ai. Ua tonu nei i le mafaufau o Lilo, se i aulia a taeao ona fai lea, aua ua o’o ifo le pogisa.

Na vala’au fa’anatinati nei Loleta i le la tama o Matainu, pe ua manava lana galuega, ae pe ua tu’ua ane fo’i le a’oga a Ataata. Ua fa’amatala nei e Loleta i lana tama le mea na tupu ia Filipina. Fai mai, e fa’alogo atu Loleta, ua tagi mai Mataniu i le telefoni, ua fiu lava lona tina e tau fa’amatala atu, ae ua tapuni mai e le teine le telefoni.

O le mea ua tupu, fai mai, e ‘ese le alofa o Mataniu i a Filipina, le tuafafine o lona tama. O mea uma lava a Mataniu, o Filipina lava e faia, e fiu matua o Mataniu e fai atu i a Filipina e leai mai o le teine. O le ala fo’i lea, a alu se malaga a Roger ae umi, e alu ane lava Mataniu e nonofo ma Filipina i lo la fale.

O lea la ua maua e Mataniu le tala e uiga i a Filipina ua vaivai ai le loto o le teine, ua fia o’o i le falema’i, o a lava nisi tala e toe fai ane i a te ia, ua le fia fa’alogo i ai le teine. Na tu a’e nei i luga Mataniu ma savali atu i le fale o lo’o i ai Vesi ma Lefefe, “Vesi, a sau Ataata, ona ta’u mai lea ia te a’u, ma te o i le falema’i e asi Filipina.

O le taimi lea, ua manava atu fo’i galuega a le fanau a Vesi ma Luisa, ma ua fai nei le talatalanoaga ma Mataniu. Ua tonu nei i loto ma mafaufau o teine, se i taunu’u ane Ataata, ona o latou o lea i le falema’i, ona o le fia maua lava o se tala sa’o mai ia Filipina, po’o a mai.

Ua na o le fetagisi nei o teine, ona e fai mai, e ‘ese le auau o teine i a Filipina, aua ua o latou iloa le aoga o Filipina ia i latou, o taimi o ao’oga, o a lava mea uma, e punou lava Filipina e fai mea lelei mo latou. O lea la ua ta’u ane le tulaga na o’o i ai Filipina, pau lava le mana’oga o teine, ia o loa e va’ai i le taimi lea.

E le i umi ae taunu’u ane loa Ataataota’uleleia, fai mai na tau mao ai Mataniu i lona uso, pe o le a le mea ua tuai ane ai, ua leva ona o latou fa’atalitali. Fai mai, e feosofi loa teine e to’afa o le fanau teine a Luisa ma Vesi, ma le fanau teine a Lilo i le ta’avale, ae sosolo atu loa ma le ta’avale a Lilo, Loleta ma lo latou tina.

E faia pea...