Ads by Google Ads by Google

Onosa’i I Mea Tiga

Vaega: 97

 

Alo maia, o le a toe fa’auau atu la tatou tala fa’asolo. Na muta mai la tatou tala, ina ua o nei Mataniu ma Matalena i le falema’i e va’ai Filipina.

 

Fai mai, na uma le tala na fai ane e si o la tina matua o Malia, ae fuli ane i ai ma Loleta ma Luisa, ua fai tala i nai teine. O le mea ua tupu, e o fua fo’i, ae ua matua’i iloga ona lailai i upu ua lafo ane e Loleta ma Luisa i a i la’ua. Ae o le mea ua tupu, fai mai, e alu le ta’avale a Mataniu ma Matalena, ae liliu ane le lo’omatua o Malia ia Loleta ma Luisa.

 

“Fa’alogo lelei mai lava oulu, ua uma ona ou faia le tala i teine, ua lava le na, ae le o le toe feosofi mai fo’i o oulua ia ma fa’atele ai fua mea e fufulu, se tau to’a mai, o teine ua matutua, o ane oulua e musumusu a lua tala ia Lilo ma Vesi, ae o le a musumusu atu fo’i a’u tala i a Lefefe.”

 

Fai mai, ua alu nei le tali e, i lea taimi, ae na toe fa’apea ane le toeaina o Lefefe, “E a Malia, ia o se ta taumusumusuga lea o le a fai, a’o a fo’i na taumusumusuga ua ta matutua, pau le tagata lea ou te fia musumusu i ai, o Lonisi. O lenei o le a fuli i le lua, ua ou fiu e musumusu i a Lonisi.”

 

Na toe tulitatao ane lava e le lo’omatua, “Lefefe, o le mea le na ua ou iloa ai nei, e leaga au mea faigaluega, toe leaga ma au upu, ua e iloa fo’i, se po’o ai lava le tagata fai mai e maa’a lona loto, ae a susua fa’aupuga ma tala e fai i ai, se e matua’i tatala lava e le toe taofiofia.”

 

Ua toe alu nei le talie, ae ua tu’u lava se i fai a la ta’uga. Fai mai, o le isi lea mea e sili ona lelei i le lo’omatua o Malia, ona o lo’o malamalama lava lona mafaufau. O a lava tala e fai i totonu o le fale, pe tau musumusu pe a, e lagona uma lava e le lo’omatua. E tete’i lava i le oso atu o le lo’omatua, “O ai, o ai le na e fai i ai a outou tala.?”

 

Ua ‘ata le toeaina o Lefefe, “Ioe Malia, ou te ta’u sa’o atu lava, ua matua’i le toe lava lava lau tama i se mea, ia o a nisi mea o le a mafai, ua e va’ai mai nei, ua tau le mafai ona savali, ae tu’u ia Lonisi ia, se i fai le mea ua loto i ai le tama a le lo’omatua.”

 

O le taimi lea, ua taunu’u le ta’avale a Mataniu ma Matalena i le falema’i, fai mai, na ona tu lava o le ta’avale alu ma le tuli e aga’i atu i le falema’i. Na fesilisili nei i tagata, po’o fea e i ai le potu failele, ma na fa’asino ane i ai e tagata, toe liliu toe alu le tuli e agai atu i le itu lea.

 

O tagata uma na tu’u fesilisili i ai tama’ita’i, fai mai, ua na o le tilotilo ane nei i teine, o le matua’i aulelei lava o nei tama’ita’i. Na ona taunu’u lava i le potu failele, alu loa ma le solo i totonu. “Fa’amolemole lava, po’o fea o taoto ai Filipina MacMillian, o le fa’aiu le na o si o ma tina.”

 

Na fa’asino ane nei i ai le potu ma ua alu loa ma le solo i totonu. E taunu’u ane, ua  alu le moe a Filipina i lea taimi. Na saofafa’i ifo nei i nofoa o lo’o i totonu o le potu lea ua ave i ai e foma’i Filipina e taoto ai. “Mataniu, ta o e va’ai le pepe, po’o a mai.”

 

E faia pea...