Onosa’i I Mea Tiga

Vaega: 100

 

Alo maia, o le a toe fa’aauau atu la tatou tala, na muta mai la tatou tala ina ua vala’au Lilo e su’e le to’alua o lona tuafafine, le tamaloa o Roger, lea na alu lana malaga i Ausetalia, aua o le ali’i e Kapeteni i va’alele tetele. Ua atoa le masina talu ona alu Roger, ae ua manatua nei e Lilo, o le tala na fai ane a Roger ia te ia, e lua vaiaso e alu ai e ave le malaga a le va’alele e aga’i atu i Ausetalia.

 

Ae se i o tatou talia pea, po’o fea ua o’o i ai Roger ae po’o le a fo’i le mea ua tupu ia te ia. Fai mai le tala, na taunu’u manuia lava le faigamala a Roger i Ausetalia o le ala fo’i lea na tu’u ane ai e le ofisa le numera o le telefoni e vala’au ai Lilo e su’e Roger.

 

Ua le mafai ona toe sao se tala a Lilo i lona to’alua, ina ua uma ona ta’u i ai e Lilo le mea na tupu ina ua tali mai e le teine le telefoni a Roger i totonu o lona potu. “Oi ta fe fe Lilo, a’o ai le na teine, oi talofa e, ia Pina ma si ana tama, o lona uiga ua fai se isi to’alua o Roger, oi ta fe fe Lilo.”

 

“Loleta, se tau to’a mai, to’a mai, o lea fo’i e mamafa i lo’u loto lenei mea, ae fa’ato’ato’a mai oe, ma mafaufau i se auala e tali atu ai i fesili a Filipina pe a fai mai e uiga i lona to’alua, aua, ua ou le iloa se isi tala o le a toe fai i si o’u tuafafine.”

 

Ua toe nofo ifo i lalo Loleta i lea taimi, ua toe fa’asolosolo ona mafaufauga, pe o le mea ua fai se isi teine a Roger i fafo, po’o le mea e sa’o ma alofa moni Roger i a Filipina, pe na o se ata na fa’aali e Roger i lo latou aiga. Na toe manatua vave nei e Loleta ia uiga o le tamaloa e fa’aali, fai mai, o le lelei o Roger, na o latou va’aia le alofa fa’amaoni o Roger i a Filipina, a’o lenei, ua tupu mai lenei mea, oka, se mea a fa’aletonu o nei mea.

 

“Lilo, o le a le tala a le teine na fai mai ia te oe, ta’u mai, ou te fia iloa, ona fuafua atu lea i ai o lo’u mafaufau, o le a le tala a le teine na fai mai ia te oe.?” Ua na o le punou o Lilo, ma na i’u lava ina va’ai atu Loleta, ua maligi ifo loimata o si ona to’alua i lea taimi.

 

Na a’apa atu nei Loleta ma fusi mai Lilo i lea taimi, “Lilo, tautala mai ia te a’u, ou te fia iloa, ona mama ai lea o le avega ma ta fetufa’ai ai fo’i, po’o le a le mea e tatau ona fai.”

 

O le taimi atoa na talatalanoa ai Lilo ma Loleta i lalo o le la’au, fai mai, o lo’o atutilotilo mai uma le au faigaluega i lea taimi, ua leai se isi e toe faia se galuega. O le manatu o le aufaigaluega, ai fo’i ua fa’atiga e Loleta le loto o Lilo fua i le fa’apea o le tama. Ae lilo i o latou manatu e leai, ua le toe faia e Loleta ia uiga, ma ua iloa fo’i ma molimau le aufaigaluega i suiga lelei ua i ai le teine.

 

Na toe aunagi ane lava Loleta i lona to’alua, ona o lona fia iloa sa’o o le tala na fai mai e le teine i luga o le telefoni i a Lilo. Afai e mautinoa lea itu, ona faigofie lava lea o mea uma, ae pau le tagata ua alofa nei i ai Loleta o Filipina ma si ana tama o Ali’ioaiga. E le gata i lea, ae ua toe manatua vave e Loleta si o latou tina matua, o Malia. O se avega mamafa i a latou uma lava, ua le gata i a latou matutua, ae ua fa’apea fo’i i nai teine, ua fa’aitete lava le faiga o mea uma, ina ia ‘aua lava ne i i ai se mea e man’ua ai le loto o le lo’omatua.

 

Na toe fesili ane lava Loleta i lona to’alua, “Lilo, tautala mai, o le a e tagi la, ae e te le tautala mai, o lea fo’i ou te pogisa a’u ia, ta’u mai, o le a le tala a le teine na fai mai ia te oe, ua e tiga ai?”

 

“Loleta, o le tala a le teine na fai mai ia te a’u, po’o ai a’u, ona ou fai atu lea i ai, o a’u o Lilo, o Roger o le to’alua o lo’u tuafafine, o lea e fia maua atu Roger ma te talanoa, e uiga i lona to’alua.” Na oso mai nei Loleta, “O le a la le tala a le teine, se tautala mai, o le a lana tala na fai mai ia te oe?”

 

E faia pea...

Comment Here