PALEMIA: Tala’aga soifuaga galue Tuilaepa S. Malielegaoi


Sui na tofia fa'apitoa e le Palemia o Samoa, Tuilaepa S. Malielegaoi e na te fa'ailo lana tusi PALEMIA i laufanua o Amerika Samoa - le tofa le To'oto'o o le Tusiupu lauiloa i Amerika Samoa, Fofo I.F Sunia. [ata: Leua Aiono Frost]

Ua atoa le 36 tausaga o le tautua a Tuilaepa Sailele Malielegaoi i le tofi Palemia o le Malo o Samoa, ma o le fa'auluuluga fo'i o le Vaega Fa'aupufai a le HRPP, e fa'afailele ma gafa taulima aia tatau a tagata lautele o Samoa, ae ua o'o fo'i i le toe nofoa'iga e agava'a ai ma lona le tofi, a'e mae'a loa ona tusia, lomia ma fa'atau mai lana tusi, e fa'asoa mai ai ona lagona, mafaufauga, o galuega sa fa'atino e tusa o sona tomai e fa'atino ai tiute tau lona avea ai ma Palemoa o Samoa.

 

"O le tofi e vevela, e tatau ona nofo ai le tagata ua masani e folau i le vasa sousou o le soifuaga o se malo tau atia'e, malo e fa'atautaia e ona lava tagata ma e mautinoa e fia vave ona to'ai taunu'u i manuia, aua e taula mea uma i lona fa'atuatua e alofagia mai i latou e lo latou Atua,” o se tasi lea o vaega o le tuleiga a le tofa le To'oto'o Fofo I.F. Sunia, o se tasi sa fili fa'apitoa e Tuilaepa e fa'alauiloaina lea tusi i Amerika Samoa.

 

"I lana ta'ita'iga, ua me'i ese mai ai Samoa mai le puipui sa i ai, o malo tau atia'e e mafai ona maua alagatupe e fa'atupe ai latou galuega atia'e, ae le toe tau totogia mai malo tetele o le Lalolagi. O se malo e fa'aaoga i ai fesoasoani fa'amatu'u mai e le UNO i ana galuega fa'aleleia o le tamaoaiga e fagaina ai o latou tagatanu'u, ma ua le toe lisia fo'i le igoa o Samoa i le lisi o malo e vaivai le tamaoaiga, ua lisia Samoa i le malo ua gafatia ona tausia ona tagatanu'u ma fa'amautu ana atina'e eseese."

 

"O lana ta'ita'iga fo'i ua iloga i le tele o fale tetele fa'apisinisi, saili ai le tamaoaiga o le Malo o Samoa, tele o galuega ua mae'a fa'amautuina e aofia ai le falema'i tele i Moto'otua, le Faleta'alo i Ululoloa, o le faletele o faamasinoga le anoanoa'i o falea'oga ma falefou e fa'anofoia ai Matagaluega o le Malo, ma le Malaeva'alele ua toetoe a mae'a mo le feso'ota'iga ma fafo."

 

"O lana nofoa'iga na toe suia ai le Taimi mo Samoa, Suia Aso mo Samoa, ma toe suia ai alatele mo feoa'iga o ta'avale i totonu o le atunu'u, sa matua luia lana ta'ita'iga ona o nei suiga tetele, ae sa matua mausali fa'ai'uga a le ta'ita'i, ma ua sologa lelei ai folauga a Samoa ma fa'ateleina ai fefa'ataua'iga atoa ma le tamaoaiga tausi o ona tagatanu'u i le taimi nei. O se fa'ailo o se ta'ita'i malosi ma le lotomau."

 

"Ua talimalo Samoa i le anoanoa'i o fonotaga fa'avaomalo i lana nofoa'iga, e aofia ai ma tulaga talimalo o Samoa i le tele o Taaloga a le Pasefika ma e fa'ailo ai le tulaga gafatia e Samoa ona milo fa'atasi ma malo tetele i le taimi nei.”

 

Mai lona tupuaga i lona aiga, o matua na soifua a'e ai i Lepa, Aleipata, o lo ua fa'ailoa e Tuilaepa, e tolu lava mea o tausisi i ai mai a'oa'oga a lona tama ia mulimuli ai. Ia iloa ona sua fa'amatai Samoa. E faia poka e fa'atalie ma fiafia ai le fa'atasiga, ona fa'ato'a avatu ai lea oni mataupu ogaoga mo le silafia, ae ua mae'a fa'anofo filemu lagona. O le ata le fofo sili o mea fou. Lona lua ia mamalu lau folasaga i sui uma, ia iloa lou nofoaga ma lou tulaga o le ta'ita'i e tautua. Ma le mea mulimuli, afai e te faia ni folafolaga, ia e taulamua ona mulimulita'i ai ma fa'atino au folafolaga.

 

I lona auai atu i le Palemene a Samoa i le tausaga e 1991 na avea ai o ia ma Sui Totino o le HRPP ma sa lagolagosua o ia i le tele o fa'aiuga a le tofa Tofilau Eti Alesana, o se tasi na avea ma Ta'ita'i o lena Vaega Fa'aupufai o Malo i le palemene. I lea lava tausaga sa iloga ai ona malosi le HRPP ma avea ai ma vaega fa'aupufai sili ona to'atele ona sui tofia i le Palemene, e o'o mai lava i le taimi nei.

 

Na sui ta'ita'i o ia ia Tofilau, ma ina ua tu'ua e Tofilau le mafutaga, sa avea loa ia ma taitai. O le malosi o le HRPP ua iloga atili i lana nofoa'iga, aua na taumuagia lana ta'ita'iga lea i taimi fita ma ala sousou i le maliu o se tasi o lana vaega fa'aupufai Levaula Kamu, ae na i'u le fa'amasinoga ma fa'amaonia ai, na fasiotia o ia ona o ni fa'atonuga mai nisi o lana lava vaega fa'aupufai,  ma o le amataga fo'i lea o le tusi, Palemia.

 

Peita'i mai lena sousou e o'o mai i le taimi nei, ua tula'i le HRPP ma sui e 47 mai le 50 sui o le Palemene i le palotaga na se'i mavae atu, o sui na e to'atolu, o nisi e tuto'atasi.

 

I le folasaga a Fofo sa ia fa'ailoa ai, sa ia fesiligia Tofilau, le tuagane o lona tina, i le taimi na asiasi ai i ai ina o gasegase o ia, ma ua lagona ua fitaituga le tulaga o i ai, "O ai o lo ua e manatu e ta'ita'i le HRPP? Pei e sili pe a totofi le sui e tula'i mai mo le tou itu a'o e le'i tu'ua i latou?"

 

"O le tali sa ou iloa ai, sa tau lona finagalo, ae i ai lona, Ua ou tu'ua e tofi mai e le Atua le sui, ae ou te mautalitonuina fa'ai'uga uma na fa'asoa mai ai Tuilaepa ia te a'u."

 

O le toe upu mai a Fofo sa ia fa'apea ai, "O la'u mau, O Tuilaepa na fili mai e le Atua e ta'ita'i lona malo o Samoa."

 

I sana saunoaga na fofogaina e le afioga Fiame Naomi Mata'afa, sa ia fa'apea ai, "O le Palemia, ua na'o nai mulumulugaveve ua tu'ufa'atasia mai nai tuiga loli ma tuiga se ua milo fa'atasi ma le fa'apolokiki militino ai ma le paoa ma viliga ai lava i le vaiania."

 

Peita'i o le tusi lava ia, e matua aoga tele ina ia silafia fo'i e nisi o alo o le atunu'u, e ui ina louloua le tai i folauga a tatou malo fa'a-atumotu, ae o lo'o foa'i le Atua e ala i o tatou tama fanau, ae a le folauga i le lumana'i. O le 'afa sa fa'atusa i ai le filiga fa'atasi o le Aganu'u a Samoa ma aganu'u fa'apapalagi ma Fai fa'aupufai Polokiki fa'atemokalasi ua mautu ai nei le taumafaiga a le faigamalo a Samoa. O lea ua fa'aatagia atoa i le Palemia.”

 

Na tu'ufa'atasia se ata to'atele o i latou uma na auai e le vaega a le SSAB Pago i Amerika Samoa, ina ia fa'ao'o atu ai ni fa'amanuiaga ia Tuilaepa o lo'o si'i gasegase i Niu Sila ma e le'i fa'atasi mai ai i le tatalaina o fa'atauga o lana tusi i Amerika Samoa nei i le aso Faraile na te'a i le Gov. Rex Lee Auditorium.

 

"Peita'i, i le olaga o se tamaititi Samoa mai tua i Lepa, Aleipata, nofo a'oga i Apia, o le fili numera muamua o le "fia'ai." A'oga i Apia i le Malisi, soso'o ai ma le si'itia i Niu Sila e saili tusi pasi maualuluga i le Iunivesite o Aukilani, maua fa'ailoga maualuga, Masters in Economics/Business taliu mai faigaluega i lona malo, ulufale ai i le Palemene ma avea ma Palemia. E fitu suafa Matai ua ia tautua ai i lona aiga potopoto.

 

O lenei tusi ua maua i le faleoloa SSAB Pago i Tafuna.

Comment Here