Pasia Fono isi tofiga a le kovana mo Fa’atonusili o Ofisa o le malo


Le Fa’atonusili fou mo le Ofisa o Fa’amaumauga a le malo, le ofisa o le KVZK-TV, afioga Tuimavave Tauapa’i Laupola. [ata AF]

Susuga Dr. Peter Tinitali, le Faatonusili tofia o le Ofisa puipuia aia tatau o tagata a’afia manaoga faapitoa o le tino ma le mafaufau. [ata AF]
ausage@samoanews.com

O lo o fa’aauau pea le pasiaina lea e le Fono Faitulafono o tofiga a le afioga i le ali’i kovana ia Lolo Matalasi Moliga, mo i latou ua mae’a ona filifilia e avea ma Fa’atonusili o Matagaluega ma Ofisa o le malo.

 

I luma o le maota o sui i le taeao ananafi, na pasia ai e afioga i Faipule sui e to’atolu ua mae’a ona latou fesiligia a latou agava’a i taimi o iloiloga a komiti eseese, e pei o le susuga a Motusa Tuileama Nua e avea ma Fa’atonusili o le Matagaluega o le Soifua Maloloina, ma Dr. Peter Tinitali e avea ma Fa’atonusili o le Ofisa e puipuia aia o i latou e a’afia manaoga faapitoa o le tino i le palota e 17-1, ma le susuga ia Jonathan Fanene e avea ma Faatonusili o le Ofisa o Tupulaga Talavou, Tina ma Tama’ita’i i le palota e 16-2.

 

Ae i luma o le maota maualuga i le taeao ananafi, na pasia ai le suafa o le faletua ia Evelyn Satele e avea ma Fa’atonusili o le Ofisa o Tagata Matutua i le palota e 17-1, ma le susuga a Tuimavave Tauapa’i Laupola e avea ma Fa’atonusili o le Ofisa o Fa’amaumauga a le malo, le KVZK-TV i le palota e 18-0.

 

ILOILOGA TUIMAVAVE LAUPOLA

 

E tele i fautuaga saunoaga sa tu’uina atu e afioga i Senatoa, i le taimi na fesiligia ai agava’a o le susuga a Tuimavave Tauapa’i Laupola i le taeao ananafi, e tusa ai o le tofiaina o ia e le kovana e avea ma Faatonusili o le Ofisa o Fa’amaumauga a le malo, le KVZK-TV.

 

O se tasi o mataupu sa fesiligia e ni isi o senatoa e aofia ai Tuaolo M. Fruean ma Tuiagamoa Tavai, o le fa’aaogaina o tupe o loo totogi atu e Ekalesia pe a pu’e faigalotu, ae pe i ai fo’i se tulafono e fa’atagaina ai le fa’aeeina atu o nei totogi i le atunu’u.

 

Saunoa Tuimavave e fa’apea, e taunu’u atu i le Ofisa o loo fa’aauau pea le totogi e Ekalesia o le totogi e i le va o le $400 e oo atu i le $500 pe a pu’e faigalotu, ae ina ua mae’a ona faia sa laua feutanaiga ma le ali’i kovana, ua faia ai loa le fa’aiuga e taofia le toe totogiina o nei tautua mo Ekalesia.

 

Saunoa atili fo’i le molimau e faapea, o se tasi  fuafuaga i tupe o loo totogi atu i le Ofisa, e totogi ai tagata faigaluega, ae ina ua taunu’u atu i le Ofisa ma su’esu’e le fa’aaogaina o tupe nei, e foliga mai ai e le o manino auala o loo fa’aaoga i ai nei seleni.

 

Na fautuaina e Tuaolo le molimau ina ia silasila toto’a i tulaga ia, ona e le o tusa ma le tulafono lo latou fa’aee o totogi o tautua i le atunu’u e aunoa ma se tulafono na pasia atu e le Fono. Sa ia fautuaina fo’i le molimau ina ia silasila toto’a i polokalame o loo fa’asolosolo atu i aso ta’itasi, ina ia fesuisuia’i polokalame e pei o le aso Sa, e na o pesega lava a aufaipese e maimoa i ai le atunu’u i le aso Sa atoa.

 

Na lagolagoina e Tuiagamoa Tavai le finagalo o Tuala e fa’atatau i polokalame o loo fa’asalalau e le Televise a le malo, atoa ai ma tupe o loo totogi.

 

Na fautuaina e Tuiagamoa le molimau ina ia silasila i ana tagata faigaluega o loo o i tua e pu’e mai polokalame mo talafou, ina ia fa’atino lelei a latou galuega, ona o le tele o taimi, o le sauniga ua amata ma ua saunoa fo’i le ulua’i Tootoo o le sauniga, ae ese lava le itu o loo evaeva mai ai le au pu’eata, o le mafu’aaga fo’i lena e le maua uma ai polokalame pe a pu’e.

 

“I tulaga o ‘news’, e matua le manaia lava i se matamata, e tipi uma e outou le ‘interview’ a le tagata sa fai, ma ua le atoatoa ai le fa’amatalaga e uiga i se mea sa tupu, ae a outou matamata i ‘news’ a Upolu, e fa’aalu uma e latou le ‘interview’ sa fai, ia toe vaavaai toto’a i tulaga na”, o le fautuaga lea a Tuiagamoa.

 

Na fesiligia e Alo Fa’auuga le mafua’aga e tuai ai ona amata le tautua a le KVZK-TV i ni isi o taeao, e pei o le taeao o le aso Lua na te’a nei, lea na fa’atoa ola atu ua ta le 6:43 i le taeao, ae o le itula e 6:00 i le taeao e tatau ona ola ai, ae na taua e le molimau e fa’apea, o se tasi o mafua’aga o le tuai ona ola o alaata a le KVZK-TV i ni isi o taeao, e mafua mai i le tulaga fa’aletonu ua i ai ni isi o masini, ona ua fai fo’i si tuai o masini o loo fa’aaoga.

 

Ae na toe saunoa Alo e fa’apea, “Ina ua te’a le 6:00 i le taeao e tatau ai ona ola mai le tautua a le “T.V”, sa ou vili atu ai loa i la outou Ofisa, ae tali mai e le Teu Fale fai mai, e lei usu atu lava le aufaigaluega, o nai vaega na e toe silasila toto’a i ai”, o le saunoaga lea a Tuiagamoa.

 

Ae na taua e Fai’ivae Iuli Godinet le tatau pea lea ona i ai se tupe e totogi e le atunu’u i soo se taimi e fa’atinoina ai e le aufaigaluega le tautua, ona o le tele o polokalame o loo pu’eina i le mae’a ai o taimi faigaluega fa’atulaga a le malo. Sa ia fa’afetaia fo’i le Fa’atonusili ua mavae atu, i le tele o polokalame tuai ua mafai ona toe fa’aali e maimoa i ai le atunu’u.

Comment Here